Стихи эрзянских поэтов о РАСЬСИИ

http://erziana.my1.ru/publ/stikhi/stikhi_ehrzjanskikh_poehtov_o_rassii/2-1-0-896

ПОЛОВТ

Зярдо гувныть чопода менельсэнть,
Теке тонолт, якстере половт,
Мерят пингтне човорявкшныть превсэнь,
Ливтить вакскам кезэрень коволт,

– Конат чентязь качамосо-толсо,
Пек умонть шкатнесэ качадыть.
...Степь неян... Сонзэ эзга кополсо
Лишмень косякт мезе вий ардыть.
Ды марян мон, кода сорны модась, –

Сонсь эрямось буто аварьгадсь.
Сонзэ лангс таго ногаень ордась,
Верьгиз стаякс каявсь-уракадсь.
Эрьва енов ливтить налт, прок ендолт,
Прят-пильгть чавить тейтерть, ават, эйдть.
Степенть келес – качамо ды тонолт,
Полонязень лайшиця вайгельть.
Те монь модам аварди ды лайши,
Те мастором горяс-зыянс понгсь.
Оймесь толсо палы, тензэ бажи, –

Пингтнень пачк капшан лездамо монсь.
Ды друк весе емась – арасельгак,
Теке стака онсто мон менинь.

Тусть ногайтне, кекшевсть варманть мельга –

Неень шкантень одов велявтынь.

Ансяк лецтнить половтне ютазденть –

Неть тонолтнэ кезэрень Русьсэнть.
Ды икельгам вармась, теке ласте,
Вешкезь ливтясь ды ёмась степьсэнть.
Василий Демин

***
Монь симдьса, ведь,
Тонь эйсэ коське степенть,
Зярс пандтнэ ваясть
Чадыведень човс.
Мон симдьса рощанть,
Штобу лепеть кепе
Чиевельть тонеть,
Кандовольть цековт.
Нармунтне одс
Морасызь
Тонь уцясканть
Ды мерить сеск:
"Мастор лангс тундо сась!"
Мон симдьса, ведь,
Моданть,
Штобу Россиясь
Аволь сода, мезе те –

Коське шкась.

Александр Доронин

В.Васнецов. За водой (1880)

РОССИЯСО

Россиясо, минек Россиясо

Килей ведесь лечи сэредицят.

Од килейтне, валдомтозь сиясо,

Ки чирева неявить чиицякс.

Россиясо, минек Россиясо

Гайгезь гайги родной эрзянь келесь,

Сонзэ эйсэ кортат – ёжось касы,

Сонзэ эйсэ морат – ливти мелесь! 

Александр Доронин