«Эрзиана» ловномапусмось – те васенце топавтозь шкинема пелькстамонть тевтёкшозо, кона ютавтозель 2009-2010-це иетнестэ эрзянь сёрмадома шкинемасонть интернет вельде.

Эрзянь сёрмадома шкинемань пусмонть лисемазо неть шкатнестэ, зярдо Эрзя раськенть эрямонзо калгодосто лепшти минек раськенть «мордвакс» теема политикась - те пек важов тевесь эрзянь келенек ванстоманзо, идеманзо туртов.

«Эрзиананть» лопатнень вельде ловныцясь тееви содавиксэкс неень шкань сёрмадейтнень ды валморонь ладсиця шкинемаст марто, конат сёрмадыть кода ванькс эрзянь кельсэ, истя эрзянь оймесэ рузокскак. Неть ломантнень вейсэндинзе гайтев эрзянь келенек, эрзя раськень ды сонзэ эрямопингензэ-культуранзо вечкемась, бажамось панжомс эсь валморов, валдо эрзянь ойменть.

Ломаненть туртов арась седе покш уцяска, кода улемс сюлмавозь эсь тиринь раськенть уцясканзо марто. Самай эсь раськес вейсэндямо мелесь-ёжось, эрзянь ойменть вейкетькстэ ёжомарямось вейсэндинзэ те пусмосонть ломантнень, конат тунь а вейкеть иест, сёрмадома лувост ды сёрмадома коест-темаст корява.

Ули меленек ёвтамс-алтамс кода шкинема пелькстамонть изницятнень туртов, истя весеменень, кить невтизь эйсэнзэ эсь сёрмадксост-арсевксэст: кандост сынь весе эрямопингест перть Инешкипазонь максозь тенст валдо эрзянь оймень толнэнть. Шкинемасо изнявкст, одт сёрмадкст-арсевкст тенк!
Ванстост ды ламолгавтост сынь Эрзянь раськень кезэрень ды неень шкань койтнень-илатнень!

Эрзянь раськесь эри ней, карми эрямо икелевгак!
Кода мерить эрзятне: «Виесь – солы, мазысь – олы, паро тевесь – пингеде пингес кадови!»

Интернетсэ сёрмадома шкинемань пелькстамонть теицякурось.