Начало

Пингинем ведьгевень чарокс свал чарась.

Ие ансяк ютась, васень полам сась.

Ульнесть вечкевиксэнть кавто поланзо

Ды кавтотнень пельде кавто пакшанзо.

Мон ношкстынь эсь кудов, вай, пелевене.

Родной аванень, тирянь тарказом.

Вай, пек музгордезь авам вастымим,

Те туеманть кисэ сон пек мурнимим.

Эзинь кенере рунгом эждямо,

Кармась монь мекев авам ильтямо.

Те шкане ортатне келес чикоргадсть,

Карей айгорось кижендезь тов совась.

Кудо кенкшентькак петат чикоргадсть:

Прок ловонь атя, монь мирдем совась.

Мизолгавтызе авам кургонзо,

Сеск каявтызе мирденть шубанзо

Ды кунсолынзе ятонть валонзо.

Зярдо мекев сынь, прям повамс арсинь –

Бука леентень ваямо якинь.

Эзь ёмавтов прям: пакшам ойме макссь –

Монь седей алдо састо суволгадсь.

Весе кенярксокс ульнесь тень паксям,

Весе уцяскам – монь потсо пакшам.

Лисян мон паксяв, оймем таргаса,

Корьминець сюронть мон кутмордаса.

Серьгедьса мором, лайши вайгелем,

Ёвтасынь валон – чудить сельведень.

Мон эзинь лисне ульцяв, чувто лангс,

Эзинь яксекшне вирев пештьс ды пангс.

Ансяк вастнинь вейс сюронь умасо,

Сюронь нуемстэ, пултонь сюлмамсто.

Пиземе ладсо мон сельведть правтынь,

Норовавиненть сельведьсэнь кастынь…

Ансяк монь кудос эзь варшта валдось:

Стака сталмотне седейзэнь кадовсть.

Мастор лангс чачтынь колмо пакшинеть:

Вейке цёрыне, кавто тейтернеть.

Нилецесь ульнесь уроз пакшине:

Теле куншкане совась буряне.

Сеньгак примия войнань шкатнестэ,

А содан косто сась пелевене.

Вай, войнась прядовсь. Ниле пакшинень.

Седей вакскесэнь ниле тарадкень.

Кармась ялгинем довас чийнеме,

Сеедьстэ вина кармась симеме.

Кармась монь лангсо ятось нарьгамо,

Кармась нулгодьксэсь эйсэнь чавомо.

Пелевене сы, прок верьгиз ирны,

Вай, мезе понги, сень эйсэ лошти.

Каштом лангсто стить удозь пакшинень,

Рангить, тандадыть седей росткинень.

Тельня ушосо увны бурязо,

А сон ёртсамам ушов кудосто.

Потпанарнэсэ вальмало аштян,

Покш якшамодо ушосо сорнан.

Лавсьсэ роказемсь вишка тякинем,

Колмотне пижнить – ладсемс а кинень.

              * * *

Шкатне вармакс ютасть кандыбуря марто,

Панкст седейстэнь лутасть кото монь пакшатне.

Ризкстнэ ды стакатне пеелькс эйзэнь пезнасть,

Тумонь неже ладсо монь мештезэнь неждясть.

Мастор кор мон кирдинь мирде марто эрязь.

Пой лопинекс сорнынь – теке эрямс эрявсь,

Теке морот ладсинь, морынь эрьва чистэ,

Чачк сельведень марто гайсэ морынь псистэ.

Кизна мон паксясо ды тельня фермасо,

Мон эзинь ульнекшне сеедьстэ кудосо.

Ансяк роботасо мизолгавтса кургом,

Нардасынь сельведем ды видемтьса рунгом.

Чокшне тевть певтеме, зоряс а прядовить.

Туян, ськамост пакшан кудынес кадовить.

Арасель ванстыцяст ды мельгаст ваныцяст,

Чинь-чоп сынст арасель столь экшсэ андыцяст.

Котонест азорокс сынст мон кудос каднынь –

Зняро сынст кувалма седей ризкс мон кандынь!

Полам мусь вечкема, теке боярава,

Сондензэ пек однэ – мазый эрзянь ава.

Виде, а ёвтави сонзэ мазычизэ.

Кармась ютавтомо тосо вензэ-чинзэ.

Вете иеть истя майсесь, кавтолгалесь.

Зря а мерян тензэ, сон пакшатнень жалясь.

Монь жо вете иеть вихорть ютавтсь пряван.

Мон ульнинь сисем эйкакшонь ава.

Ды икеле шкатнень текель мазычизэ:

Доват ульнесть ламо, ламонь сон вечкинзе…

Коданя а стакаль, теке шкатне ютасть.

Чаразь-велязь, вешкезь – ялатеке потасть.

Васенце пакшатне кармасть тонавтнеме.

Монень задачатне ушодовсть певтеме.

Мартост касы сталмось, касы мартост горясь,

Нужась сэпенть марто апак визде спорясь.

Ормалгады вейке, сэреди омбоцесь.

Кулось Вова цёрам, вишкинесь, сисемцесь.

Мейле васень цёрам школанзо кадызе,

Ансяк вете классо школанзо прядызе.

Горясь вешни ялгат, арась валдочизэ –

Светань стака ормась пек куватьс правтызе…

Теке а ёртови мештьсэнь гайги морось:

Ладсян, кода касы монь тиринь масторось.

Шказо яла юты, тякан яла касыть.

Толя озась тракторс,

Ниле школав якить.

Маша, уроз пакшась, штукатуркс тонавтнесь.

Эрьва чистэ кудов

Чугункасо ардтнесь.

Света якась школав,

Прась одс сэредеме –

Те пиштяканть пингесь

Сталмосо певтеме.

Топодсть кемзисемге – тусь сон роботамо.

Урьвакстсь Толя цёрам – тусь сеске служамо.

Совась монь кудозон од ломань, рузава –

Паро, чевте седей, мазый боярава.

Ульнесь дока авась – пек совась седейзэнь.

Сонгак, прок пакшинем, педясь лембстэ эйзэнь.

Ды мартонзо совась кудос валдочизэ:

Вечкемань коензэ монь мирдесь кадызе.

Сэтьмелгадсть варматне минек кудосонок.

Ансяк эзть вейсэньгадт, вай, оймтне ютксонок…

Вишка пакшань трямсто горятне вишкинеть,

Зярдо покшокс касыть – ризкстнэ покшолгадыть.

Кавто иень ютазь Люда урьвам тусь

Ошов роботамо – лия мирде мусь.

Кармакшность кастомо сюрот Казахстансо,

Тусь тов Толя цёрам, тусь тиринь кудосто.

Мельганзо Тамара венстинзе сёлмонзо.

Оште ниле тейтерть ней роботыть ошсо.

Кадовсь мартом вейке – вишкине пакшинем.

Седей оймавтыцям, Лена монь тейтернем.

Ох, тон, авань седей – отьма потмакстомо.

Эзинь кенерть веенст сельведть мон нардамо.

Чудикерьксэкс чудесть омбонстнэ чамаван.

Продолжение