ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Стихи

Серафима Люлякина. МОНЬ ЭРЯМОМ (Продолжение 2)
Споринь нужанть марто,
Изнинь ризксэнть вийсэнь.
Теке ладсинь морот мон эсень седейсэ.
Мон а содан, косто
Зняро вий тень сакшнось.
Нать, чачома чистэнь Пазось гайтть тень макснесь.
Ладсинь скирда боксо ды пакшань нурсемстэ.
Ладсинь ютко шкасто эйсэст пелевестэ.
Монь масторонть ланга нармунькс ливтясть морон,
Моротнень кувалма виевгалесть сёлмон.
Неть моротнень кисэ сюдозь ламоксть ульнинь.
Мирдем кедь кепсекшнесь,
А весть монь чавнымим.
Ятонь мирдем згилясь, кежсэ эйсэнь сюдось,
Теке монь мельспарокс ульнесь велень клубось.
Сельведень нардтнесынь ды лисян морамо,
Стувтсынь стака ризкстнэнь – ды мелезэнь паро.
Сан кудов – пурьгинекс лангозон серьгеди,
Берянь валтнэ ёндолкс кургстонзо верьгедить.
Теке эзинь лотксе мон моронь морсеме,
Эзь лоткавтовт мелем моротнень ладсеме.
Кандтнинь седей потсон, сырнень рисьмекс кодынь,
Мастораванть лангс мон виде налтокс нолдынь.
Кармасть монь моротнень лияткак морамо,
Кармасть эрьва косо монь моротнень шнамо.
Ды пачкодсть моротне Эрзянь масторлангов:
Ливтясть нармунь ладсо Саранск покш ошонтень.
Карминь мон морамо эрзянь эсь раськентень.
Кармасть печатамо морон газетасо.
Вайгелем гайгезевсь эрзянь радиосо.
Карминь Саранскоев сеедьстэ ардтнеме.
Те ардтнемась монень кеняркс макссь певтеме.
Чуди леекс сыргасть эсь масторсон тевень.
Аламнеде оймасть ризкстнэ, валдомтсть мелень.
Састь тень сёксня инжеть Саранскоень ошсто
Састь снимамо эйсэнь телестудиясто.
Кенярксом монь – менельс,
Дивась весе велесь,
Перькаван, прок ёндол, ливтнесь валдо мелесь.
Седе мейле морон пурнынь, кучинь ошов.
Саранскойсэ ваннызь:
«Берянть!» – кучизь одов.
Лоткинь сёрмадомо, кучинь музейс тевень,
Мекс, монськак а содан, чополгалесть превень.
А сёпови: сестэ пек мон ацирьгалинь,
Саранскоень ошов ардтнеман лоткавтынь.
Ятонь ризкст певтеме сыть, зярдо а учат,
Сыть сынь апак терде,
Хоть мельгаст а кучат…
Толянь куломазо мирдем пек мендизе:
Ожолгадсь пой лопакс, куломась саизе.
Колоньгемень кавксо иеть минь эринек,
Вейсэ сисем пакшат тринек ды кастынек,
Ламо вейсэ трямсто сталмот минь кандынек.
Зяро нужа-горя сынст трямсто неинек!
Сон пингензэ ютамс оймсема эзь сода:
Туиль чоподава, сыль, зярдо чоподаль.
Беряньстэ эринек, нужасо пиштинек,
Нужась эрьва ёндо яла пирясь минек.
Кона кулы, туи – мекев а велявты,
Кадовиксэсь эри, пародо мелявты.
Саранскоень ошсто инжеть тенек састь,
Покш Толкан велентень сынь весе лоткасть.
Моро ды Радаев, Втулкин, Инжеватов,
Режиссертнэ мартост телестудиясто.
Сеске моньгак мельга састь ды тов саимизь.
Парсте, пси седейсэ тосо монь вастымизь.
Клубсо, сцена лангсо аштинь мартост вейсэ,
Мейле эрзятненень морынь морот гайсэ.
 
                    * * *
 
Вай, кодамо стака течи монь седейсэ:
Чизэяк кувака, орма тапи эйсэнь.
Течи яван эсень тиринь кудом маро,
Косо печтинь пинге ды эринь стамбаро.
 
Колоньгемень иеть те таркасонть эринь,
Путыя тей вием, ламо нужа керинь.
Тесэ сисем пакшат мон лавськесэ нурсинь,
Ламо сынст нурсемстэ лавсень морот ладсинь.
 
Зяро сэпе-горя те кудосонть неинь!
Нужанть марто спорязь, эрьва тевенть теинь.
Тесэ монь мастором,
Тесэ чачи велем,
 
Тесэ кастынь морон,
Тесэ монь седеем.
Тесэ пакшань иень,
Тесэ монь одксчим,
 
Тезэнь кавто калмазь
Тякинень кадсынь.
Тезэнь мон калмия
Авань тетянь марто,
 
Мода потс кекшия
Пингень эрий ялгам.
Озавтозь эсь кедьсэнь
Умарькс ладсо кадсынь
 
Пакшинень, яван мон.
Кадса эсень пизэм.
Ков путыя вием,
Кадса тиринь велем,
 
Мартонзо седеем.
Иля ризнэ, седей,
Теке тестэ туян,
Тосто седе валдо,
Манейчи мон муян..
 
Тосо эсень морон
Седе пек кастасынь,
Саранскоенть ёндо
Сёлтокс сынст нолдасынь.


Категория: Стихи | Добавил: tati (11.04.2010)
Просмотров: 302 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz