ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Стихи

Серафима Люлякина. МОНЬ ЭРЯМОМ

МОНЬ  ЭРЯМОМ

Мекс, авине, ризнат,

Тонолокс ченярдат,

Килеекс нурьгавты

Алов тонь тарадкеть?

Мекс тон сокоргадыть,

Ашолгадсь тонь принеть?

Мекс морамот кадыть,

Рангить тонь сельминеть?

 

Прок сляника ланга чийсь эрямом кепе.

Пингем ульнесь сэпев, ризксэнь тол пултась.

Лавтов лангсон канстокс сталмотне аштить:

Кирьга видьс мелявкссо седеем тарди.

Вейксэ топодсть, туинь эсень прям трямо,

Ды уш кемгавтовосо – пултонь сюлмамо.

Эзинь лисне ломаньс мазый панарсо.

Валскес эзинь аште килейне ало.

 

Войнась апак учо синдинзе мелем.

Ансяк сыремтекшнесь вечкемань толнэм,

Вечкевиксэм саизь васов ятт паньме.

Кепететсь масторось душманонть каршо.

Ниреждсь весе модась куломанть вастозь.

Апак нуе кадовсь паксясо сюрось.

Сэпей ризкстнэ пинксэкс лепштизь народонть.

Кевейксэе топодсть монень се шкасто.

Цёракс свал сявтылинь – лезкс учомс косто?

Ялган саизь войнав ятонть изнямо.

Монь вана кучимизь окопт чувномо.

Эзть ливтне вельксканок ятонть пулянзо,

Тосояк пек стакаль овсе вачодо.

Чинзэ-Чоп коймесэ моданть тон чуват.

Чамат теке содонь, лазнототсть турват.

Сат – баракось кельме, мик пси ведь арась.

Прат нарат лангс сэрьсэть – валске таго стямс.

Вакссом кулсить ломанть, монгак, нать, сивинь.

Ормалгадынь тифсэ, пек сэредезь сынь.

Кудов сынь – тиринем, вачодо таргозсть.

Монсень мельга куломась чить ды веть азгондсь.

Гуекс перькан кершавсь, малав а туи.

Икельдем раужось тиритнень саи

 

Сестэ лисинь мирденень, корьминець Чипай!

Горбун, вишка ломаннень, – войнав эзизь сайть.

 

Аволь вечкевикснэнь лисинь мирденень.

Пингем монсь яжия, секс фатинь тенень.

 

Эзь кирвазе седейсэм вечкемань толнэ.

Кирви вармат сезнесть вень пачк оймесэнь.

 

Эзь мизолдо зорякс кургом паламсто.

Стакачиде мендявсь рунгом од шкасто.

 

Кедензэ прок эень, зярдо кутморясь.

А чави седеем, бути сон арась.

 

                 * * *

 

Мон нурсемстэ морот пакшанень морсинь,

Эсь стака пингинем моросо ледстнинь:

Вай, чопода вене, авкай, чачтымик,

Вай, кизэ куншкава светс монь нолдымик.

Чачтымик тон, тирям, ревень кардосо,

Нилеце тейтерекс, мельсапаросо.

Корьминецькем, авкай, родной тиринем,

Тон аэрявиксэкс светс монь нолдымик.

Эзить кирвазтекшне валдо штатолнэ –

 

Нать, тон эзить веше уцяска монень.

Эряволь врадомс тень вишка пакшинекс,

Зярдо сэредекшнинь стака ормасо.

Эряволь врадомс тень одксчинь порасто,

Зярдо ормалгадозь сынь мон окопсто.

Вачо куломадо мон тынк ванстыдизь,

Куломанть коморсто мон тынк нельгидизь.

Сускомотнень кисэ эсь прям миия,

Отьмас эсень пингенть мон совавтыя.

Чопода векс ней мон печтян эрямнем,

Вай, коське чевгинекс коськсь монь рунгинем.

 

                  * * *

 

Кирви якшамотне совасть кудозом.

Раужо даволтнэ седейсэм-потсом.

Секс арась часиям, валдо уцяскам,

Арась эсень вакссо вечкевикс ялгам.

Мирдем куш вакскесэнь – теке мон дован,

Оямгак маласом – теке урозан.

Седейзэнь а педить сонзэ валонзо,

Ды аволь корязом сонзэ рунгозо.

Перькам сон тапардавсь, прок сярдов селей –

Аволь тонь корязот кочкия, седей.

Кармакшность сеедьстэ бурят вешкеме –

Сталмотне, горятне кармасть певтеме…

 

Вана толось палсь уш, вересь лейкс чудесь –

Вечкевикс ялгинем войнасо ульнесь.

Куломань кулятне эрьва чистэ састь.

Эсь ялгинем кисэ седеем ризнэсь…

Окойники яттнэ кармасть потамо,

Минек парт цёратне сынст модерямо.

Вечкевикс оинем войнасто велявтсь –

Вейке кеднесэнзэ колмо сурт арасть.

Мон зярдо неия пиче рунгонзо,

Эзть сыргавтовт  пильгень лисемс каршонзо.

Ношкстынь мон сеск пирев, прынь тикше пулос,

Седеем истя чавсь, арсинь сеск куломс.

Истя седей нилкскем ёмавтыя мон.

Пек ацирьгалекшнесь, зярдо марясь сон.

Виде, простякшнымим ды тердсь мартонзо,

Бажась вейсэндявомс, ульнесть валонзо:

«Пакшинесь тонь чачи, седейс нолдаса,

Эсень эйкакшинекс сонзэ примаса.

Улят вечкевиксэкс, тон монь полынем,

Оймавтсак, мазыйнем, томбазь седейнем».

Вай, мон пелинь сестэ Паздо, ломанде

Ды седеяк пелинь ятов мирдеденть.

Тетямгак энялгадсь, авам лайшезевсь,

Истя вечкий оям седейстэнь сезевсь.

Ды сон тусь велестэнть. Ве ёнов – ошов,

Вай, мон эзинь сода, эрясь сон косо.

Ялатеке седеем ульнесь мартонзо.


Продолжение

Категория: Стихи | Добавил: tati (11.04.2010)
Просмотров: 1074 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2018
    Сделать бесплатный сайт с uCoz