ЭРЗИАНА эрзянский литературный сайт

ПРЯКСЛОПА
Категории раздела
Мои статьи [336]
Стихи [571]
КАВТО ВАЛСО
Статистика
Главная » Статьи » Стихи

МАСТОРАВА.Кевейкееце ёвтамо. КИЛЯВА. Плач по Киляве. (Продолжение)
МАСТОРАВА.Кевейкееце ёвтамо. КИЛЯВА.
Плач по Киляве. (Продолжение)
см.НАЧАЛО

Вай, тон, Килява, ятонь чавиця,

Душманонь ханонть оймень саиця!

Иля тандале минек вайгельде,

Иля соракадт лайшемань валдо.

Валскень зорява течи минь стинек,

Кедьзэнек коське чевкскеть саинек.

Якатано минь кудо юткова,

Листяно ушов минь, соватано —

Арасят, Килява, тон мартонок.

Рукштядинек минь кавто кеденек,

Пувордынек минь кемень суронок,

Таго карминек лайшезь лайшеме.

Марятано — сонсь пижни Юртавась,

Несынек минь — сонсь урни Кудавась.

Сон вечки зоря ланга стякшныцят,

Сон вечки валске кудонь уштыцят.

Мекс сон аварди истя, Кудавась?

Мекс сон сюморды истя, Юртавась?

Нать, арась кинень кудонть уштомс ней...

 

Пингест ютавтозь, эсест шкаст прядозь,

Атятне кулыть бабатнень марто.

Тон, Килява, кулыть а шкастонзо,

Емить, Килява, шкадо икеле.

Ужо, Килява, тонь пирятадызь,

Калминеть перька минь ютатано.

Козонь пильгенек минь чалгасынек,

Кона таркаванть минь ютатано,

Стявтано сырнень палманть, Килява,

Пижень уське минь тува таргатано.

Козонь кадтано минь карень тешкскеть,

Тозонь видтяно ламо цецят, кстыйть.

Ве пиренть перька минь ютатано —

Кипариз чувто минь озавттано,

Кадык пек мазый чувто теть ули;

Пильге пезэть минь, Киляй, стятано —

Якстере инзейть минь озавттано,

Кадык колмоксть сынь иень перть панжить,

Кадык колмоксть кстыйть ламо кенерстить.

Кадык васенце инзейтне улить

Кото таргонь тонь паро лецтнемас;

Кадык омбоце инзейтне улить

Пеле иень тонь вадря лецтнемас;

Кадык колмоце инзейтне улить

Колмо иень тонь лемень кундамос.

Бути пря пезэть минь аратано —

Умарь чувтыне теть озавтано:

Иень перть кадык колмоксть сон панжи,

Кадык колмоксть сон умарть кенерсти.

Кадык васенце умартне улить

Кото таргонь тонь паро лецтнемас;

Кадык омбоце умартне улить

Тонь пеле иень вадря лецтнемас;

Кадык колмоце умартне улить

Колмо иень тонь лемень кундамос.

Секс минь пиридизь тонь эрьва ендо,

Секс тонь перька минь весе ютынек —

Кадык а ризны нучкань седееть...

 

Вай, тон ванномизь минек, неимизь,

Вай, тон неимизь минек, редямизь:

Раужо пацят сюлмазь прясонок,

Сельведень пацят нурьгить кедьсэнек.

Вай, Тоначива, Киляй, молемстэ,

Тусто-чопода вирьга капшамсто,

Иневедень трокс, Киляй, ютамсто

Сонзэ сэдекс тон эстеть аравтсак.

Раськенек минь теть вал евтатано,

Таго, Килява, минь превс путтадызь.

Пиже куштавкссо, паряк, вельтяват,

Тюжа човарсо, паряк, ацават,

Паряк, шанжавонь коцтсо кодават.

Лиснека валскень стямсто, Килява,

Шлякшнока лембе ведьсэ, Килява,

Ашо пацясо чамат нардтника...

 

Вай, тон валонок, Киляй, маритя,

Лиси чи енов, раськенек, варштак —

Лиси чи ендо давол кепсети,

Велес-сядос сон покш зыян канды.

Моли чи енов, раськенек, варштак —

Виев пиземе товолдо сыркси,—

Велесэ-сядсо пси сельведть туить.

Чивалгомав тон, раськенек, варштак —

Апаро пельне тосто кепсети,

Велесэ-сядсо покш риске ней ули...

 

Кона валтнэнь минь тонеть евтынек,

Кона валтнэнь минь тонеть пшкадинек –

Ашо паця потс, Килява, сюлмить,

Коморо потсот досужсто кирдить.

Паряк, кевкстядызь Тоначисэ тонь —

Минек валонок эсь мельсэть кирдить

Эсеть ванстыцякс, эсеть идицякс,

Оймень, седеень, мелень кастыцякс...

 

Вай, прадо, сельведть, пиземекс прадо!

Лайшеде, нучкань седейть, лайшеде!

Виензэ Мастораванть сыргозстинк,

Менелень Пазонть удомсто пувтынк!..

 

Сисем чить ды веть эрзятне авардсть,

Сисем чить ды веть Килявань лайшесть.

Окойники сынь рунгост видемтизь,

Ашо пряст мекев верев кепедизь.

Таго эрзятне эрзякс теевить,

Тюштянь ломанекс снартнить улеме.

А вечкить эрзят урекс пракшномо,

Ятонь икеле сявдикст мендямо.

МАСТОРАВА.Кевейкееце ёвтамо. КИЛЯВА. Плач по Киляве. Перевод Вирявы
Категория: Стихи | Добавил: tati (11.01.2011)
Просмотров: 945 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[19.01.2010][Стихи]
Александр Арапов. С... (1)
[21.10.2010][Стихи]
Исланкин Юрий Иванов... (0)
[24.01.2010][Мои статьи]
Регина БУДАРИНА. Пут... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2024
    Сделать бесплатный сайт с uCoz