ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Стихи

МАСТОРАВА.Кевейкееце ёвтамо. КИЛЯВА. Плач по Киляве.
МАСТОРАВА.Кевейкееце ёвтамо. КИЛЯВА.
Плач по Киляве.

Колмо чинь ютазь калмонзо лангсо

Тамашань чувто кассь — ашо килей.

Састо яхолесь сон тарадсонзо,

Тошкась сэтьместэ лопинесэнзэ,

Жойнесь лужанясто пилекссэнзэ.

Прок од тейтерь те чувтынесь ульнесь,

Мерят Килява лиссь кельме калмстонть.

— Кода те чувтонть ней лемдясынек,

Кодамо тензэ лем минь путтано?

Килявань лемсэ чувтонть сынь лемдизь,

Килявань лементь сонензэ максызь.

Се шкастонть тосо чувтынесь касы,

Суранть чиресэ жойни, кашторды.

Келя, морот сон ськамонзо моры,

Келя, сюморды, лайши, аварди.

Суранть чирева андямо моли,

Паро од аля паксява юты.

Ашо килеенть церась неизе,

Тамашань чувтонть алясь редизе.

Човине тарад андямо керясь,

Морыця кайга паро алясь тейсь.

Кува яки те од церась, седи,

Кува юты те од алясь, моры,

Кайгась Килявань вайгельсэ корты:

«Кренчень полкт вере менельга ливтить,

Батый вийть Эрзянь масторга молить...»

 

Марясызь эрзят кайгань вайгеленть —

Уроз Килявань моронть содасызь.

Начтсызь сельведьсэ калмолангонзо,

Кармить сюмордозь таго лайшеме.

Чудикерьксэкс сынст сельведтне чудить,

Чольдердезь срадыть чейга, паксява.

— Ийя-ох, вай-ох, уроз Килява!

Ийя-ох, вай-ох, пайстомо тейтерь!

Мекс чивалгомась течи нусманя?

Мекс чивалгомась палы толбандякс?

Вай, чи валдонок минек, Килява!

Вай, мазычинек минек, Килява!

Мезень кулома, евтак, саинзеть?

Мезень емамо, евтак, муинзеть?

Каршот раужо кулома лиснесь.

Равжо куломась се тонь саинзеть,

Равжо куломась се тонь костинзеть,

Коськсть, Килява, тонь ашине кедеть.

Кода каль лопат, Килява, пужомсть

Тонь кемень сурот, чова сур принеть.

 

Вай, мазычинек минек, Килява,

Вай, Чипазонок минек, Килява!

Минек идемстэ, минек ваномсто,

Килява, эзик жаля эсеть прят,

Максык эсь ойметь тон куломантень.

Куломанть кедьстэ минек ойменек,

Килява, саить эсь паро кедьзэть.

Чокшнень удома тон эзить сода,

Чистэ оймамо тон эзить нее,

Пекеть пешкедемс тон эзить ярсне.

Чокшне миненек тон морот морыть,

Чевте тарка лангс минек мацтневтить.

Сехте икеле валске тон стякшныть,

Гайги вайгельсэ эйсэнек пувтыть.

Зярдо сыргакшнось, Килява, варма,

Зярдо сыргакшнось сексень пиземе,

Эсь селмот ало минек кирдимизь,

Эсь рунгинесэть минек эждимизь.

 

Вай, уцясканок минек, Килява!

Вай, урозчинек минек, Килява!

Мекс ней минек тон, евтак, кадымизь,

Мекс емамонтень, евтак, максымизь?

Эрьга марика тон вайгеленек,

Эрьга кундыка кавто пилесэть!

Адя явомо эсь раськеть марто.

Весе ломантне пси сельведть правтыть,

Тонстеметь уроз кукокс кукордыть.

Лангозот сельведтне, Килява, прыть,

Кода штатолнэть састыне цитнить.

Туить, Килява, велестэ-сядсто.

Кода килейть минь ней авардтяно,

Кода пиземе минь пизетяно —

Сюморды кисэть весе раськенек,

Тонь велькссэ лайшить весе эрзятне.

Куломань самс ней тонь а нетядызь,

Сюпав анелявксот* а мусынек,

Важов васькавксот а содасынек;

Масторонть лангсо зярс ёрятано,

Мельспаросо тонь минь лецтнетядызь.

Варма мельга тон нолдык эсь виеть,

Менельстэ прась тонь валдо тештинесь,

Кекшсь вирь удало лембе Чипазось...

 

Моданть, Килява, колмо ужонзо,

Эрьва ужосонть — сырнень палманне.

Палмантнень лангсо кукот кукордыть,

Палмантнень лангсо нармунть озадо.

Весе нармунтне — раськеть, сазорнэть,

Вейке авань сынь ды вейке тетянь.

Ансяк сазортнэ ялгакс а кундыть,

А эрить вейке превсэ-мельсэ сынь,

Карадо-каршо а сыть, а молить.

Миньгак истяня, уроз Килява:

Ялгакс мекс-бути а тейнетяно,

Вейке превнесэ а эрятано...

 *Анелявкс — каванямо.

см. Продолжение


МАСТОРАВА.Кевейкееце ёвтамо. КИЛЯВА. Плач по Киляве. Перевод Вирявы
Категория: Стихи | Добавил: tati (11.01.2011)
Просмотров: 518 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. З... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
[01.02.2010][Мои статьи]
Александр Маркович Д... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz