СМ. НАЧАЛО

Ульяна СОСНОВСКАЯ

 Поэма

     2

Ве лекстявкс Мастяс лиядсь! 

Э-ге-ей! — прянь апак ванст,

Велеванть айгорт ливтить

Ды раздезь раздить панстт.

Мазыйть ды шождат нурдтнэ,

Сынст алксост — ашо жесть.

А чарькодят, ков пурдыть,

А содат, превсэст мезть.

Од ловось пильгест алдо

Кайсеви тей ды тов.

А кардавить сынь, ардыть,

Ды кургстост ливти чов.

Келемтезь гармониясь,

Морозо пси ды ён.

Седеесь зыйтьс лепиясь,

Ды ушось — теке он.

Варматне шканть човорить,

Менельсэнть налкси чись.

Ульянань пиже зорят

Чиявтызь ды «симизь».

«Вай, тейтерьксчим, тон косат?

Кодамо вирьс ёмить?!»

Эх, цяркат — пуреть-позат!

Ох, одирьвань янт-кить…

                        3

Иредсть кудатне-сваттнэ,

Валанят валост, парт.

Од эземть алост. Вакссост

Чатьмонить пурень парть.

Тантейть, оевть кашатне,

Кургс ваныть прякат-кшить.

Чоледить кудаватне

Ды яла цёранть шныть.

                          4

Одирьванть кисэ

Питнесь якавтозь:

Цёранть тетязо

Комавтсь балакирь — 

Ниленьгемень ды

Вете целковойть.

Ниленьгемень ды

Вете мазыйнеть — 

Сиянсетнеде,

Гайгицятнеде — 

Шожда чольдерьсэ

Столенть лангс

Чудевтсь…

Ульянанень жо

Паронть сундуксо

Куроксто усксызь — 

Дивсест ломантне,

Дивсест ломантне.

Сельмест сявадост:

Шуба, лембе кемть

Ды питней сумань — 

Паро, эждиця, — 

Понась пояркань.

Ульяна

—  Ох, ялгинень-дугинень,

Ох, ялгинень-оинень,

Монень нарядт-оршамкат

Кодаткак а эрявить — 

Стака цепень сталмост сынст

Ломань кедьсэ улемстэ,

Чеменев кшникс марявить

Ломань кедьсэ эрямсто.

Тейтерьксчим а кувать мольсь

Тетянь-авань кудосо,

А кувать васькась-кецнесь

Тетянь-авань удало.

Эзинь машт прянь ветямо,

Эзинь машт кунсоломо.

Эзинь вано авань мель.

Эзинь маря тетянь вал.

Ох, ялгинень-дугинень,

Аванк тынь кунсолодо.

Ох, ялгинень-оинень,

Тетянк эйсэ марядо.

Веть яксинь лей чирева,

Ковонть марто кутморинь,

Удынь тусто удомсо

Тундонь маней зоринень.

Тень кис лондадсь оляксчим,

Тень кис керявсь тейтерьксчим — 

Эйсэнь максыть мирде экшс,

Панить лембе пизэстэ, —  

Ильсесь-авардсь, седей чамдсь

Од тейтертнень икеле.

Лотксесь эрьванть каршо сон,

Тонавтсь эйсэст викшнеме,

Ёвтнесь, мезе теема,

Кинень мезе казема:

Панар — урьвакстыцянтень,

Сэнь улезэ сивезэ,

Викшнезь чова суресэ,

Парсеень сон улезэ.

Шароварат ярмункань,

Гашникесткак викшнемат.

Атявтонтень — коцтонь понкст,

Понкст ды панар якстере.

Ававтонтеньгак панар

Лияназонь — станушка.

Роднятненень весенень

Ашо пракстат анокстазь.

Продолжение следует