ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Стихи

Дмитрий Морской. Ульяна Сосновская. Эрзянь кельс ютавтызе Александр Арапов. Продолжение 2

СМ.нАЧАЛО

Ульяна СОСНОВСКАЯ

 Поэма

Васенце пелькс


5

Ульянань ялганзо апак лотксе

Чинек-венек приданоенть стыть.

Цюлансо цёратнень марто тошксить,

Эрзянь морот нусманят морыть. 

 

Тейтертнень морост

 

— Сиянь лавськесь-лавськинесь

Нурсесь зорянть-тейтерненть.

Чись лембензэ венстизе,

Нармушкиненть эждизе,

Чевте сёлмсо вельтизе

Ды вармадо кекшизе.

 

Сэтьме килейбулосо

Валдо-валдо морыне

Морась цёков-цёковне,

Тердсь вишкине нармушканть

Васов-васов ливтямо — 

Иневеденть томбалев.

 

Кассь-кепететсь нармушкась,

Менель танстенть маризе,

Цёковонть кунсолызе

Ды мартонзо тусь.

 

 Ульяна

—  Тейтерть, ялгинень-оинень,

Уштодоя баня пси,

Килей тенстьсэ монь рунгиненть

Тапинк — курок свадьбань чи.

 

Рунгом шождасто лексезэ — 

Тенстенть парсте яксевтинк.

Трокс ды кувалт сэрем весе

Чапамо ловсосо шлинк...

 

Банясь уштозь. Анокт тенсттне.

Тештьсэ налкси кельме весь.

Виздезь-талнозь, моронь менстязь,

Штапо одирьвась кайсесь.

Ульянань чамазо палы.

Прячерензэ — равжо сод.

Лекси, ашолды сынст ало

Сонзэ рунгось — виде, од.

 

Кенкшесь чикордозевсь, совась,

Совась, теке мацей ведьс.

Курок рунгозо вастови,

Курок понги цёрань кедьс.

 

         6

Ардсть — гайгить баягинетне!

Састь — дон-динь-дон, динь-динь!..

Кудатне ёзыть пилетнень,

Валгсть, пижнить:

                              — Сынек минь!

Сынек одирьвань вешнеме,

Кудазор, содак честь!

Нолдынк цёратнень эжнеме,

Усксть казнекс эрьва мезть!

 

Урьвалятне

 

—  Цёр-рат, илядо яжа кенкшть!

Совавлить? Сестэ пандт!

Венстеде тенек ярмашкеть,

Панжсынек, секень вант!

 

Кудавась

 

— Панжинка келей ортатнень,

А шождаль минек кись.

Минек вастомо, кортамо,

Кудазорава, листь!

 

Моронок умок сединек,

Потсонок кельме тарькс.

Сорныть пильгенек-кеденек,

Пракстанок педясть карьс.

 

Кудазорава, вастомизь,

Каршонок сэрьсэть стяк.

Кудазорава, андомизь

Ды лембе вал ёвтак.

 

Саемизь кедте… ветямак,

Одирьвань кудо невтть.

Арасть ютксонок пелькстамот,

Арасть потсонок кевть.

 

Истямо мельсэ мон аштян — 

Кияксот валозь кивесэ.

Кудозот ськамон а варштан — 

Эземеть валозь сиясо.

 

Инжетне иляст сельмедевть,

Пазаванть саик, кирдть, — 

Ванстовост одтнэ кельмеде,

Кист улест аволь чирть.


Продолжение 3

Категория: Стихи | Добавил: tati (14.07.2010)
Просмотров: 271 | Рейтинг: 5.0/1 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. З... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
[01.02.2010][Мои статьи]
Александр Маркович Д... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz