ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Стихи

Дмитрий Морской. Ульяна Сосновская. Эрзянь кельс ютавтызе Александр Арапов

Ульяна СОСНОВСКАЯ

 Поэма

Васенце пелькс

 

1

Оймем талакадсь,

Лазовсь седеем:

Вензэ куншкава,

Валдо пелеветь,

Састь, вачкодсть кенкшес,

Лембе кудозон,

Вачкодсть кудатне,

Састь монь чиямо.


Ашо мацейне,

Чова рунгине,

Мон соракадынь,

Мон таймазкадынь.

Пазаватне вансть

Верде лангозон.

Аштинь алост мон,

Аштинь-чатьмонинь.

 

Пекшень пряхасо

Парсейне кодынь,

Кодынь-анокстынь

Эстень приданой.

Вай, эрямонь парь

Монень пештема,

Мазый сюпавчи

Монень таштама.

—  Кудазор, марят,  

Шказо токась-сась

Кудосто ливтемс

Мазый тейтереть!

Минь — рамицянзо!

Тон — миицязо!

Минь, тонь купецеть,

Сынек варштамо,

Сынек ваномо,

Питнень путомо.

Анокт канстонок,

Сырнень панстонок,

Вана арсинек

Саемс тейтереть.

 

—  Кунсолан, кудат!

Эно ютадо!

Ёвтадо эно,

Ки саицязо!

 

—  Цёрась шумбра, од!

Тумо — сэрезэ!

Лавтовскак келей,

Виевде виев!

Седеезэяк

Аволь калгодо.

Чамаскак мазый.

Эрьва ёндо ён!

 

Превень коряскак

Цёрась удалась.

Сюпав семиянь

Цёра вечкевикс — 

Васень кенярксост,

Сехте покш цёраст.

Мольть ярмункав-ков,

 

Вешнек ды кочксек — 

А муят седе

Паро содамо!

 

—  Эно ютадо,

Инжекс уледе,

Инжекс уледе

Ды малавиксэкс.

Садо, озадо

Тумонь столенть экшс

Валонь сюлмамо,

Мелень ёвтамо.

 

Сорны-типельди

Ожо штатолнэсь.

Ютасть инжетне,

Озасть кортамо,

Ашо галакс сеск

Шуба потстонзо

Покш кудась винанть

Кецнезь таргизе,

Келей столенть лангс

Цоксо путызе.

Кайсесть цяркава

Сэрей цетьвертьстэнть,

Цярканть симизе

Тетям-тетинем…

Кудатнень келест

Винась юксинзе — 

Нолдызь вайгелест

Тундонь цёковокс,

Эрьвась, кода маштсь,

Кепедсь-шнась цёранть:

Кудозо, келя, — 

Пизэ цянавонь.

Кардазонзо покшт — 

Кудот кудошкат.

Айгоронзо парт — 

Колмо мазый вийть.

Сбруяст ванькстэ ванькст — 

Ваднезь дёготьсэ.

Вете скалонзо — 

Эрьванть вазонь ваз.

Сядот ревензэ — 

Весе левкс мартот.

Сюрось утомсо — 

Чувардо ламо.

Зняро мекшензэ — 

Пачкаст а неят.

Цёрась сюпав сон,

Эри вадрясто,

Парсте сондензэ

Кортыть велесэ.

Винась цетьвертьстэнть

Кадовсь потмакссо…

 

Тесэ тетинем

Кедь макссь инжентень,

Покш кудань кеденть

Псистэ лепштизе,

Покш кудантень сон

Истят валт певердсь:

 

—  Кадык сы цёрась!

Ды кадык монень

Сови тетязо,

Варшты авазо!

Кадык сы цёрась!

Вансынек сонзэ,

Вансынек сонзэ,

Питне путтано.

Питне путтано,

 

Питне макстано,

Питне макстано

Ды карматано

Покш чис пурнамо

Ды анокстамо — 

Роднятнень туртов

Сатост казнетне.


Продолжение следует


Категория: Стихи | Добавил: tati (22.06.2010)
Просмотров: 622 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. З... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
[01.02.2010][Мои статьи]
Александр Маркович Д... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz