Продолжение - см.начало

ВЕТИЦЯСЬ. Лиданень ульнесть кемнилее иеть, зярдо ушодовсь Мода-масторонь васенце войнась. Сон важодсь санитарной поездсэ, якась ранязтнень мельга. 1917-це иень революциядонть мейле кармась тонавтнеме Саратовань консерваториясо М.Е. Мед­ведев профессоронть кедьсэ. Кавто иень ютазь Лида чарькодсь: оперань искусствась аволь сонзэ коряс, ды тонавтнеманзо кадызе. «Монсь чарькодинь, — ледстнесь мейле Лидия Андреевна, — ака­демической певица эйстэнь а лиси. Вием ульнесь сеть моротнесэ, конат народонь ойместэ чукадевсть. Сынст мон седей потстон таргсилинь. Истямокс, нать, ломантнень туртов эрявиньгак...»

Кода профессиональной морыця морамонь ёрокчинзэ Руслано­ва васенцеде невтизе 1926-це иестэ Ростов-на-Дону ошсо. Кой-зярдо сцена лангс лиснесь зрзянь оршамосо.

Сценась валдомгады. Художествань самодеятельностень артисттнэнь марто вейсэ Русланова моры «За горою у колодца», «Из-под дуба, из-под вяза» моротнень. Туить.

ВЕТИЦЯСЬ. Андреень Лида косо ансяк эзь мора: школасо, паксясо, заводсо, Покш театрань ды Союзонь Кудонь колонной залтнэсэ, содавикс ломанень инекужотнесэ... Лиясто чокшнень перть сонензэ савкшнось морамс кемгавтово концертсэ — весе бажасть Руслановань кунсоломо-нееме. Сехте пек весенень вечкевсть «Валенканзо».

Гайги «Валенкатнень» музыкась. Лиси аволь пек сыре цёра (музы-канть коряс ловны).

ловныцясь.

Я вновь воскрешаю забытое,

Собираю пластинки старательно.

Россия росла под Русланову,

Под песни с хрипинкой, с царапинкой.

Они многим с детства знакомы —

Забыть эти песни нельзя.

Я сам в те далекие годы

Русланову слушал, нося

Неподшиты, стареньки...

Виевстэ гайги «Валенки» моростонть вейке куплетэсь. Ловныцянть ёвтнеманзо ды ветицянть кортамонзо шкасто сценанть лангс путыть декора­ция, кона, лангс ванозь, моли землянка ёнов.

ВЕТИЦЯСЬ. Зярдо ушодовсь Ине Отечественной войнась, эрзянь авась эсензэ ярмакто лездась пурнамс миномётонь батарея. Аволь весть ульнесь фронтсо. Морась вирь кужосо, паксясо, землянкасо, госпитальсэ. Лидия Андреевна сетнень эйстэ вейкесь, кие васенцекс морызе ней весенень содавикс «Катюша» моронть.

Морави М. Блангерэнь музыканзо ды М. Исаковскоень валтнэнь лангс «Катюша» морось. Морыть залсотнеяк. Сцена лангс кадови художествань самодеятельностень морыцятнестэ вейкесь — Руслановань ялгазо.

Я Л Г А С Ь. Русланова вечксь морамо простой ломантнень марто, хорсо. Паро ёжосо, валдо мельсэ морась Якстере Армиянь боецтнэнь икеле ды мартост вейсэ. Солдаттнэ свал седейшкава вастнесть сонзэ виев цяпамосо, мельспаросо ёвтнесть тензэ лембе валт ды сюкпря. Вана нейгак сельмень икеле аштить: землянкась, боецтнэ, Русланова ды гармошкасо седицясь.

Б О Е Ц Э С Ь (пшкади Русланованень). Неят, кодат минь рудазовтано фашистхнэнь каршо тюремадо мейле. Эсеть моросо шлимизь-ваньскавтымизь истя, кода авась шлякшносынзе эсензэ эйдензэ. Покштояк покш сюкпря теть ёвтан. Инеськеть, мерть кунсоломодот седе товгак!

Русланова моры «Вот мчится тройка почтовая» моронть. Маряви бомбань сезевема. Боецтнэ туить чиезь. Кадовить ансяк ранявозтне. Вейкесь марявиксстэ кувсезеви.

Б О Е Ц Э СЬ. Авай! Авай!

Русланова моли малазонзо, озы ваксозонзо, сайсы кедензэ эсензэ коморос ды састо карми морамо лавсень морыне.

Я Л Г А С Ь. Аволь моры — аварди, теке эсь цёрынензэ пря песэ лайши. А ранязесь яла кувси, майси, тарка-эзем эстензэ а муи... Курок пайстомонть сайсызь ялгатне. Се шкастонть саезь Лида мезеяк эзь сода те цёранть уцяскадонзо.

Сась сёксь. Фронтонь лия тарка. Тагояк концерт. Русланова моросонзо седейть солавты. Апак учо сонзэ ёнов ёртовсь боец, конанть мештьсэ Советской Союзонь Героень Сырнень Теште орден.

Б О Е Ц Э С Ь. Авай! Авай! Мон тонь вайгелень коряс содытинь, нейгак мельсэнь се, кода тон морыть тень лавсень морыне, зярдо мои куломань ки ланга якинь!

Я Л Г А С Ь. Лида вастовкшнось боецэнть марто теде мейлеяк. Те ульнесь Сухиничи ошонть маласо. Цёрась таго ранязель.

Б О Е Ц Э С Ь. Авай, мон ней содан — кадык таго ранязян, ялатеке пачкодян изнямонтень, а кулан. Тон идят эйсэнь!

Я Л Г А С Ь. Концертт! Ламо концертт! Сядот! Тёжат! Ды вана войнась прядовсь!

Продолжение