Продолжение - см. начало

Русланова моры нурька морынеть.

ОФИЦЕРЭСЬ. Авай! Монгак цидярдынь! Минь изнинек! (Седеяк виевстэ.) Минь изнинек! Изнясь рузонь мороськак!..

РУСЛАНОВА. Те тон, дугай, изнить! Натой эрямонть ды куломанть ютксо улемстэ тон кемить минек Изнямонтень! Те тевсэнть ули мезе-бути ёвксонь кондямо. А минек тонь марто колмоксть вастовомась?! Седеяк пек течинь чистэ! Войнань прядовомань чистэ! Каня те аволь кенярксчи?! Кенярксчи, нама, кенярксчи! Вана кодамо тон мазый цёрась! Тон — герой! Жив, шумбра, мештеть орден потсо!

ОФИЦЕРЭСЬ (сюкони Русланованень). Те тонь моротне монь идимизь! Покштояк покш сюкпря ёвтан теть тень кисэ.

Я Л Г А С Ь. Мелезэнь ледсь истямо тев. Фронтонть маласо гос­питаль. Боецтнэ патефонсо чаравтыть «Липа вековая...» моронть.

Сцена лангсо секе землянкась. Гайги моронь фонограмма. Совить артисттнэ. Русланова велень оршамосо: телогрейкасо, цецяв пацясо, лембе кемсэ.

РУСЛАНОВА. Оймсетядо?

1-ц е  Б О Е Ц Э С Ь. Арась. Минь пост лангсо аштицят-ванстыцят.

РУСЛАНОВА. Мень тынь ванстыцят, пластинкат чаравттадо?!

2-ц е   Б О Е Ц Э С Ь. Те а тонь тевесь. Кить ули — ютак.

РУСЛАНОВА (пеедькшнезь). Инеськеть, ёвтынк, кие те морыцясь, кинь истя мельспаросо кунсолотадо?

3-ц е Б О Е Ц Э С Ь. Кодамат тон чаула пря. Каня а содасак? Те Русланова содавикс морыцясь! Нать, эзить марсе сондензэ?!

РУСЛАНОВА. Кода эзинь марсе, зярдо мон монсь Русла­нова.

Боецтнэ ракить.

РУСЛАНОВА. А кемтядо? Сестэ невтьсынь тенк конёвон.

1-ц е   Б О Е Ц Э С Ь. Тонь конёвтне, паряк, аволь алкуксонь. РУСЛАНОВА. Сестэ эно,  паряк,  вайгелем алкуксонь. Невтемс?!

Боецтнэ а кемезь ваныть лангозонзо.

РУСЛАНОВА. Мекс эно чатьмонтядо? Эряви поладомс апак прядо моронть? Седе паро ули... (Пшкади седицянтень.) Паряк, серьгедемс эсенектнень, саратовансетнень? Эрьга, дугай, келемтика гармошканть!

Моравить Л.А. Руслановань репертуарсто саезь нурька морынетне. Бо­ецтнэ ёвтыть морыцянтень сюкпря, энялдыть нолдамс чумост, морамс.

РУСЛАНОВА. Ансяк тынк марто вейсэ! Содасынк «Степь широкая» моронть?

БОЕЦТНЭ (вейсэ}. Нама!

РУСЛАНОВА. Эрьга, сестэ весе вейсэ морасынек!

Морави «Степь широкая» морось. Маряви бомбань сезевема.

1-ц е Б О Е Ц Э С Ь. Нейке кирьгапарест потомдасынек моросонок, эсенексэ, рузонсесэ!

Туи сцена удалов, мекев велявты кодамо-бути оборудования марто.

2-ц е Б О Е Ц Э С Ь. Вана госпиталень прявтось макссь тенек походонь радиостанция. Сон — Руслановань умоконь вечкицязо, шкинеманзо шныцязо.

Я Л Г А С Ь. Руслановань вайгелезэ гайгезевсь сеть таркатнева, косо мольсть виев тюремат. Немецтнеяк мик кунсолозевильть ды лоткильть леднемеде... Лидия Андреевнань казизь Якстере Тештень орденсэ.

Сехте содавиксэкс Лидия Андреевна Руслановань репертуарсо ульнесь «Валенки» морось. Сон гайгсь мик правтозь Рейхстагонть кузтема лангсо. Тосоль сонсь артисткась. Лидия Андреевна кадызе мик кедьтешксэнзэ Рейхстагонь стенанть лангс. Истя эрзявань «ревень понасто кевердезь лембе кемтне», весементь цидярдозь, пачкодсть Берлинэв ды гайгсть сонзэ велькссэ.

Сценанть лангсо ды залсонть тееви валдо. Лисить театрализованной концертэнь артисттнэ. Куншкасост, Русланова вакссо, войнань шкань солдатокс оршазь цёра.

ВЕТЕРАНОСЬ.

Не выдадим песню свою,

Как мы отстояли навеки

В Отечественную войну

Отечественные реки.

Когда мы с «Ура!» хоровым

И с песнями в глотках рисковых

Рванули вперед на Берлин

Из страшных снегов

Подмосковных

В валенках, в валенках,

В неподшитых, стареньких...

Гайги «Валенки» морось (фонограмма). Киштемань коллективесь киштьсы «Валенки» композициянть. Теде мейле весе, кить сцена ланг-со, вейсэ морасызь меельце куплетэнть.

ВЕТЕРАНОСЬ.

Песня русская лилась...

С ней мы воевали, —

В рукопашную не раз

Немцам  поддавали

В валенках, валенках,

Неподшитых,  стареньких...

Наши валенки прошли

Через все преграды,

До Берлина в них дошли,

Получив  награды.

В валенках, валенках,

Неподшитых...

ВЕТИЦЯСЬ. Лидия Андреевна эзь лотксе морамо эрямонзо прядовомс. Сонзэ меельце концертэзэ ульнесь 1973-це иень умарьковсто Ростов-на-Дону ошсо, тосо, косо сон ведьгемень иеде теде икеле ушодокшнызе морыцянь кинзэ. (Морави «Я на горку шла») морось.

ВЕСЕ  МОРЫТЬ:

Валенки, валенки,

Не подшиты, стареньки!..

Валдонь налтнэ аравтозь Л.А. Руслановань портретэнзэ лангс, конастонть содавикс артисткась мизолдозь ваны залонтень.

ВЕТИЦЯСЬ. Весе седейсэнзэ Лидия Андреевна Русланова сюлмазель тиринь моротнень марто ды сынст эйстэ амолясь эстензэ пингень печтямс нарде. Неть моротнень сон саинзе чачома велестэнзэ, тиринь раськензэ ойместэ. Морамосонзо седеяк верев кепедизе Россиянть лемензэ, тиринь народонть талантонзо. Пазонь чантьсэ казезь эрзява, Россиянь ине морыця. Истямокс сон свал кадови минек туртов.

Шаршавось  новоли

Анокстызе Н. Родионова