ЭРЗИАНА эрзянский литературный сайт

ПРЯКСЛОПА
Категории раздела
Мои статьи [336]
Стихи [571]
КАВТО ВАЛСО
Статистика
Главная » Статьи » Стихи

МАСТОРАВА. Кезэрень пинге. Колмоце евтамо. Од коень-илань касома. СУРАЛЯ. Продолжение6
МАСТОРАВА. Кезэрень пинге. Колмоце евтамо. Од коень-илань касома. СУРАЛЯ. Продолжение 6

начало

Пиже тарадсо килеесь рестедсь,

Либор лопасо сон пек шалнозевсь,

Мерят моразевсть ламо нармушкат,

Кепединзе, натъ, морось сынст мелест.

— Пазчангот, килей! Совак паргонтень!-

Серьгедсь Сураля ды ушодсь моро

Умарь чувтонень, умаринанень.

 

— Чувтось паро умарина!

Чувтось вадря умарь чувтось!

Козонь чачнесь умарина?

Козонь каснесь умарь чувтось?

Вай, покш вирень вирь куншкинес.

Масторонь перть ундоксонзо,

Менель келес тарадонзо.

Кедь келешкат лопинензэ,

Керьксазь-керьксазь цецинензэ.

Лов покольнеть панжовкскензэ,

Покш мокшнашкат умарензэ.

Кона енов чизэ валги —

Ашолт молить умарензэ.

Кона пельде чизэ лиси —

Якстерть молить умарензэ.

Чинть кекшизе тарадсонзо,

Сиянь ковонть — лопасонзо.

Лопанзо ланга шта валовсь,

Лопанзо пева медь кольги.

Ки неизе умаринанть?

Ки редизе умарь чувтонть?

Вай, сырнень толга мекшава,

Вай, палы паця мекшава.

Сон кузи чувтонть кувалма,

Сон чары чувтонть перькава,

Сон яки чувтонть потмова.

Арси сон пизэнь пурнамо,

Веши сон кансткень кандомо.

Вай, либор мерькшнесь — ливтякшнось!

Вай, либор мерькшнесь — туекшнесь!

Козонь, козонь сон ливтякшнось?

Козонь, козонь сон пачколесь?

Инешкинь вальмас сон ливтясь,

Пазонть вальмасо кортазевсь:

— Инешкипазом, вечкевикс!

Инешкипазом, тиринем!

Мерть монень канстонь саеме,

Мерть монень канстонь кандомо.

Мон арсинь канстонь саеме,

Мои бажинь канстонь кандомо,

Мон вешан левксэнь нолдамо...

 

Теяк чувтонтень морось пек вечкевсь.

Якстерьгадсть умарть лопанзо потсо,

Варштасть мазыистэ сынь Суралянь сельмс,

Казизь сонзэ сынь тантей чинесэ,

Певерсть паргонтень башка пизынес.

Суралянь мелесь кармась касомо.

Церась ней содась, кода эряви

Менстязь парочинть мекев велявтомс.

Лекстясь шождасто, покш мельспаросо

Ды серьгедсь моро пиже лаймеде.

 

— Вай, лайме, лайме, пижине лайме!

Вай, лайме, лайме, мазыйне лайме!

Касы те лаймесь пси чинь валдосо,

Цвети те лаймесь пси чинь лембесэ.

Лайменть куншкава чуди ведь чуди,

Чуди ведь чуди, чады ведь чады.

Вай, лайме, лайме, пижине лайме!

Вай, лайме, лайме, мазыйне лайме!

Мезе те лайменть пижелгавтызе?

Мезе те лайменть мазылгавтызе?

Керяз тикшине пижелгавтызе,

Цеця-баляга мазылгавтызе.

Мик кумажава пурей тикшезэ,

Мик карксамова чова нудейзэ.

Вай, лайме, лайме, пижине лайме!

Вай, лайме, лайме, мазыйне лайме!

Кона пингева лаймесь пек пиже?

Кона пингева лаймесь пек мазый?

Лембе читнестэ, тундо юткова,

Панжиця ковсто цеця пингева...

 

Цецят-балягат паргос совакшность,

Башка пизыне таго пештякшность.

Сураля кармась нармунть пурнамо,

Тундонь нармунде моро сон серьгедсь.

 

— Тундонь, тундонь, тундонь чи!

Тундонь чинесь кува сы?

Сы латкова-луткова,

Кавто пандо юткова,

Пиже мазый лаймева,

Цецянь-балягань прява...

Кода тундось содави?

Кода тундось редяви?

Тунда нармунтне ливтить,

Тунда морот сынь морыть.

Весе нармунть ливтякшность,

Весе нармунть ютакшность.

Кона нармунь эзь ливтя?

Кона нармунь эзь сакшно?

Кода арсесь ливтямо,

Кода кармась сыргамо

Иненармунь, покш нармунь,

Кепединзе селмонзо,

Вачкодинзе пильгензэ,

Почаксынзе толганзо.

Козонь, козонь ливтякшнось?

Козонь, козонь валгокшнось?

Рав леень паксяс, покш паксяс.

Паксянть куншкасо лашмине,

Лашмонть куншкасо сильдейне.

Сильдейненть пряс ашко тейсь.

Колмо алнэть алыясь,

Колмо левкскеть мейле ливтсь:

Вейкенть лемнесь цековне,

Омбоциненть куковне,

Колмоциненть сюзярне*.

Цеков ливтясь покш калев,

Куко ливтясь покш вирев,

Сюзяр ливтясь покш велев,

Велень ломанть стявтнеме,

Сынст удомсто пувтнеме.

Чокшнень зорят цекорды —

Сыре ломанть лужавты.

Валскень зорят цекорды —

Од ломантнень сыргавты...


*сюзяр — велень нармунь.


Продолжение следует

Категория: Стихи | Добавил: tati (17.01.2010)
Просмотров: 881 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[19.01.2010][Стихи]
Александр Арапов. С... (1)
[21.10.2010][Стихи]
Исланкин Юрий Иванов... (0)
[24.01.2010][Мои статьи]
Регина БУДАРИНА. Пут... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2024
    Сделать бесплатный сайт с uCoz