Теяк морынесь тевенть теизе.

Либор мерсь нармунь, ливтясь паргонтень.

Сураля таго од моро серьгедсь.

Нарвицькадо сон ушодсь кортамо.
 

— Чот! — мерекшнесь нарвицька.

Колмо алнэть алыясь,

Колмо таргот сон нарвась,

Колмо левкскеть сон ливтевтсь.

Косо, косо алыясь?

Косо, косо сон нарвась?

Пиже мазый лаймесэ,

Пиже мазый таркасо.

Тукшнось виев пиземе,

Пувась виев вармине —

Арась сонзэ пурнызэ,

Арась сонзэ ванызэ...

Нарвицькантеньгак те морось вечкевсь.

Сонгак паргосонть паро тарка мусь.

Гигирень паргось малав тыц пешкедсь.

Кода икеле, стака сон теевсь.

Мекшаванень ней Сураля морась,

Мекшаванень сон седей валт евтась.

— Кува содави тундонь чись?

Мезьга редяви мазычись?

Тундонь мазый чинь самсто,

Ашо ловонь соламсто,

Пиже тикшень лисемстэ,

Лайме цецянь панжомсто,

Тиринь паксянь сокамсто,

Чачи сюронь видемстэ

Сырежди толга мекшавась,

Кирвази толга канавась —

Мекшавась пани кананзо,

Канавась пани вийнензэ.

Сон ливтизе, панизе,

Менель ежос кустизе.

Менель ежова чаравтнесь,

Покш пель юткова велявтнесь.

Козонь мекшава валгокшнось?

Раужо вирнес валгокшнось.

Виренть куншкасо кужине.

Кужинесэять покш пармо*:

Лангинезэ нупонев,

Потминезэ ундовнев.

Сезэнь мекшава пизэ тейсь,

Сезэнь канава ашко тейсь.

Сон колмо иеть эрякшнось,

Колмо вийнеть сон нолдакшнось.

Тия юты од цера,

Тия юты од аля.

Тюжа од кемть пильгсэнзэ,

Сборов суманть лангсонзо,

Якстере каркс перьканзо.

Налчирьке сонзэ кедьсэ,

Келей узерь каркс ало.

Арси пармонь правтомо.

Сырежди толга мекшавась,

Кирвази толга канавась

Пизэстэнзэ лисекшнесь,

 Ломань кельсэ пшкадекшнесь,

Ломань валсо кортакшнось:

— Раужонь-паро од цера,

Топодань чиняз од  аля,

Иляк кола пизынем,

Иляк кола ашкинем.

Колмо иеть эрякшнынь,

Колмо пувозт нолдакшнынь.

Раужонь-паро од церась,

Топодань чиняз од  алясь

Мекшаванть вакска ютызе.

Мерсь ливтямо од таркас

Вадря пизэнь тееме,

Ен эрямонь вешнеме.

Мекшава пек кецязевсь.

Кепединзе селмонзо,

Вачкодинзе лопанзо.

Чопода вирьс ливтякшнось,

Килейне лангс валгокшнось.

Тосонь таркась эзь ладя.

Лем паксява ливтякшнось,

Покш пекше лангс валгокшнось.

Мелезэнзэ туекшнесь,

Седеезэ эжекшнесь.

Сонзэ нардызь ройницяс,

Сонзэ нолдызь нешкинес.

Сон кармакшнось налксеме.

Кармась медень пурнамо,

Кармась канстонь кандомо

Те сырнень толга мекшавась,

Те палы ожна мекшавась...

Мекшавась совась сырнень пизэнтень,

Ливтясь гигирень ашо паргонтень.

Вейке кургине автезь кадовкшнось,

Вейке пизыне аштесь чавосто.

Ваны Сураля: пильгензэ ало

Панго ашолды, мазыйстэ касы.

Се Пазонь максовт пангинентеньгак

Ушодсь моро сон, евтась седей валт.

— Вай, мон чачинь-удалынь,

Вай, мон касынь-удалынь

Килей ало пангинекс.

Вай, монь арась неицям,

Вай, монь арась сезицям.

Ва од цера неимим.

Куз кептересь кедьсэнзэ,

Сиянь шляпась прясонзо,

Сиянь сурксось кедьсэнзэ.

Сон неимим — сезимим,

Кептерьзэнзэ каймим,

Кептерьсэнзэ кандымим.

Ташто парьс монь путымим,

Кельме веднесэ шлимим.

Кельме веднесэ шлимим,

Ашо салсо вельтимим,

Стака кевсэ матрымим...

Вишка пизэнтень эцесь пангинесь.

Ней паргось пешкедсь, ней паргось селговсь.

Мазыйне ендол менельга верьгедсь,

Пурьгинепазось кежейстэ серьгедсь.

Сэтьме пиземе новольсь менельстэ.

Моданть симдизе арво веднесэ.

Сураля сыргась таго киява:

Вирьга, паксява, пиже лаймева.

Весе парочись ульнесь мартонзо.

Кудов-чив пачтявсь покш уцясказо.