ЭРЗИАНА эрзянский литературный сайт

ПРЯКСЛОПА
Категории раздела
Мои статьи [336]
Стихи [571]
КАВТО ВАЛСО
Статистика
Главная » Статьи » Стихи

МАСТОРАВА. Кезэрень пинге. Колмоце евтамо. Од коень-илань касома. СУРАЛЯ. Продолжение5
МАСТОРАВА. Кезэрень пинге. Колмоце евтамо. Од коень-илань касома. СУРАЛЯ. Продолжение 5

начало

Таго ськамонзо кадовсь Сураля.

Ризнэзь седейсэ чаво паргонзо

Кирди кедьсэнзэ, арси, коданя

Седе куроксто кундамс тевентень.

Шканть пек сацтнеме сон эзь кармакшно.

Мольсь се таркантень, козонь мерсь атясь

Косо сиякс лиссь валдо лисьмапрясь,

Вакссонзо тошксесь ашо килейнесь.

Ушодсь Сураля моронь морамо.

 

— Ведявака-авакай!

Ведявака-раськинем!

Иневедьстэ тон лисят,

Масторонь келес срадат.

Эсеть таркава молят,

Эсь киява тон чудят.

Ламо паро тон теят,

Ламо сюкпрят тон неят.

Кода сия тон чудят,

Кода сырне кеверят.

А вейкетьстэ тон чудят,

А вейкетьстэ тон молят:

Таркань-таркань чольдердезь,

Таркань-таркань чатьмонезь.

Кува молят чольдердезь,

Ашо кевнеть тува шлят.

Кува молят чатьмонезь,

Челькинеть тува каят.

Боярава-Ведява,

Мишара пуло Ведява,

Удындерят — сыргозтька,

Аштиндерят — маряка!

Сынь теть сюкпрянь максомо,

Ведь принедеть саеме.

Эсь сюкпринем теть максса,

Курго валом евтаса.

Монь сюкпринем тон неик,

Курго валом тон марик.

Вить кеднесэм пеельнем,

Керш кеднесэм ваканнэм.

Пеельнесэнть амолян,

Вакашкинесэнть пештян.

Те веднесь теть улезэ

Лезэнь-паронь теицякс,

Улинь-паронь пурныцякс.

Кинь эйсэнзэ мои пурксян,

Кинь те веднесэнть валан —

Потомозо потомозь,

Сталгадозо рунгозо,

Илязо стя сэрезэ

Ды потомост пилензэ,

Ставост кавто сельмензэ,

Пекставозо кургозо,

Кундатозо келезэ,

Сюлмавост сонзэ кедтне,

Киртявост сонзэ пильгтне!

Косто сайса паронзо —

Сеск се таркась чамозо,

Монь таркась пешкедезэ.

Сонзэ кедьстэ маштозо,

Монсень кедьсэ раштазо,

Таркас-эземс сынь пекстаст,

Ундокст-тарадт сынь нолдаст...

 

Паргонтень лисьмапринесь велявтнесь,

Кадозь пизыненть мекев пештизе.

Мейле килейнень церась сюконясь,

Ашо килейнень моро сон морась.

 

— Килей, килей, ашо килей!

Косо килейнесь чачокшнось?

Косо килейнесь касокшнось?

Вай, покш вирьсэ, вирь куншкасо,

Сон чиньстямонь кужинесэ.

Чизэ вели сонзэ перька,

Ковось валги сонзэ велькска,

Тештть недязь тарадтнэнь пева.

Кона пеле чизэ вели,

Тона пеле ковось валги.

Килеенть ало лисьмапря.

Тумонь лазсо лисьмась вельтязь,

Тумонь лазсо, нардев велькссэ.

Лазонть лангсо сырнень ведьбарь.

Сиянь кече се ведьбарьсэнть.

Кеченть лангсо чись ды ковось,

Пулосонзо — зоря тештне...

Продолжение следует

Категория: Стихи | Добавил: tati (17.01.2010)
Просмотров: 785 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[19.01.2010][Стихи]
Александр Арапов. С... (1)
[21.10.2010][Стихи]
Исланкин Юрий Иванов... (0)
[24.01.2010][Мои статьи]
Регина БУДАРИНА. Пут... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2024
    Сделать бесплатный сайт с uCoz