МАСТОРАВА

Сисемеце евтамо. Масторавань эрямось-касомась.

Продолжение 3

Куляшань тиринь тетязо,

Ваныця-шкиця авазо

Ежовтомо сельведть валыть,

Кирвитолтомо ченярдыть.

— Охай, тетякай-тиринем,

Авакай, шкинем-ванынем,

Мон ашо кенденть лангс озан,

Тынь кавто пельган озадо,

Меельцеде беремнесэнк —

Кедь ежосонк монь нурсемизь.

Андса мон чаво кургинем,

Пештяса вачо пекинем.

Куляшань сисем уряжтне

Сиянь блидясо кандсть каша,

Кона ульнесь пеште товонь.

Урьватне пекшень кечине

Инзей ведте симемс путнесть.

Куляша лайши-аварди,

Кукинекс лажи-пеняци

Тиринь тетянстэнь, аванстэнь:

— Мекс тейтерь тякакс монь тримизь,

Мекс вейке тякакс явимизь —

Эри апаронь неицякс,

Эрямсто калмонь пештицякс,

Путозь од ошонь кирдицякс,

Стака ошпандонь кастыцякс?

Ялатеке тень, авакай,

А улить сюкпрянь максыцят,

Пазчангот валонь мерицят.

Седе пароль теть, авакай,

Бути тон чачи кев трявлить,

Бути мода кев кастовлить.

Кудосто сонзэ ливтевлик,

Покш ки чиринес путовлик.

Покш кинть ламо якицянзо,

Ламо сизиця пильгензэ.

Мастор кевенть лангс, авакай,

Матры сэрне, вант, озаволь,

Сизи пильгензэ оймавольть,—

«Сюкпря!» валнэ сон евтаволь,

«Пазчангот!» валнэ меревель.

Ней, авакай, мон энялдан,

Ней, авакай, мон кармавттан:

Кода пештяса мон калмонть,

Кода модась вельтясамам,

Колмо зорянь шкасто, авай,

Калмолангозон сакшнока.

Колмо човдават, тирякай,   '

Монь пря пезэнь тон стякшнока,

Монь валдо лемнем лецтика.

Илямак лецтя видечикс,

Илямак кунда кулы юткс.

Лецтямак калмонь пештицякс,

Ламо сюморксонь кирдицякс.

Корты Куляша лелянстэнь:

—  Вай, тон, лелинем, васькамнем,
Молемс арась рунго вием,
Кортамс а саты монь нардем.
Кепедимизь кандолазтнэс,
Кеденк лангсо монь кандымизь.
Чудезь чудеде — моледе.

Илинк сорновто рунгинем,

Илинк тандавто седейнем.

Гувнозь гувны ней потминем,

Рисксэс сови монь седеем.

Куляшань сисем лелянзо

Кандыть састо эсь пряст велькссэ.

Шкинень тетязо, авазо

Эскелить тякинест мельга,

Кулыцянь-емицянь янга.

Пачкодсь Куляша путонь ошс.

Нолдызь Куляшань калмонтень.

Васня Куляшань валявтызь

Кумажава сынь, сэрнева.

Мейле Куляшань валявтызь

Карксамова сынь, кирьгава.

Кармасть Куляшань кевкстнеме:

—    Кодамо те ошось ули?
Кодамо ошпандось касы?

—    Монь мазычисэ-мазысэ.
Кадык касы сон монь сэрьсэ,
Кадык ули сон монь превсэ,
Монь апароськак — ошонтень.
Якстере тол сон нолдазо,
Равжо качамокс лисезэ.

Тол саезэ Казань ошонть,

Пурьгинесь сонзэ тапазо!..

Куляшань прянзояк кекшизь,

Раужо модасо вельтизь

Ды сэрейгавтызь калмонзо.

Васень валскестэ авазо

Тантей кашине пидекшнесь,

Куляшань пря пес молекшнесь.

—    Эйдякай, чансть теть улезэ!
Вачо пекеть мон пештяса.
Нолдыкая тон вайгельнеть.

—    Ох, авакай! Ох, тиринем!
Кирьгапарьсэ монь седейнем,
Кель прясо ашти ойминем!

Омбоце валскенть авазо

Инзей ведь симемс кандокшнось.

—     Эйдякай, чансть теть улезэ!
Ченгезь ойметь тон витика,
Вайгельнеть-валнэть нолдыка!

—     Вай, авакай! Вай, тиринем!
Кель прясо ашти седейнем!..

Колмоце валске молекшнесь

Куляшанень шкинь авазо.

—    Эйдякай, чансть теть улезэ!
Кандынь нардамо пацине.
Куляша эзь нолда вайгель.
Рукштядекшнинзе авазо
Авардезь кавто кедензэ:

—    Вай, каладозо те ошось!
Лондадозо те ошпандось!
Кода монь Куляша кулось,
Истя Казанесь емазо!..

Вай, тон, Чувтонь Паз, Кандонь Паз!

Вай, тонгак, керень-чочконь Паз!

Кардайсэ Кардаз-Сяркине!

Кудосо кудо Юртава!

Сельменк, чаманк мон пурксесынь,

Кельме веднесэ начтнесынь.

Те веденть ней мон саия

Вельть иневедьстэ, покш ведьстэ.

А салазь сонзэ салыя,

А рамазь сонзэ рамия —

Ведявань кедьстэ кевкстия,

Пеель нернесэ пештия,

Ине вакансо кандыя,

Те таркантень мон туия.

Те веднесь, те ведень прякскесь

Косо пурги сон — лужавты,

Мезе начты сон — лондавты,

Мариця теи амарикс,

Ваныця теи аваныкс.

Аштицяяк сон лужавты,

Удыцяяк сон лондавты.

Кона ашти — лужадозо,

Кона уды — лондадозо.

Неицянь сельмтне селговост,

Марицянь пилеть потомост...

Истяня ошось теезель,

Истя ошпандось путозель.

Кить се ошонть эрицянзо?

Кить ошпандонть кирдицянзо?

Паро од церат, андямот,

Виев од алят, андямот.

Сеть ушмотне ошонть ванстсызь,

Сеть ушмотне сонзэ кирдьсызь.

Тюштянь церат, Тюштянь тейтерть

Се ошпандонть эрицянзо;

Тюштянь эрзят, паро ломанть

Се ошпандонть аштицянзо.

— Пазчангот, Инешкипазом,

Ошонть путоманзо кисэ!—

Мерсь Тюштя ды велявтсь кудов.