ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Стихи

МАСТОРАВА. Сисемеце евтамо. Масторавань эрямось-касомась. ОШОНЬ ПУТОМА. Продолжение 2

МАСТОРАВА

Сисемеце евтамо. Масторавань эрямось-касомась.

ОШОНЬ ПУТОМА

см.Начало

см.Продолжение 1

Продолжение 2

Ушов Куляша лисекшнесь,

Ялгинензэ юткс молекшнесь.

Ялганзо тензэ евтакщность,

Оянзо тензэ кортакшность;

— Тонь тиринь тетят, Куляша,

Од ошонть алов алтынзеть;

Тонь шкинесь-раськесь, Куляша,

Ошпандонть алов евтынзеть.

 

Эзь кеме сыненст Куляша,

Сон эзинзе сынст кунсоло.

Ваны Куляша — атят сыть,

Ней Куляша — сыть покштят.

Токасть атят сынст вальмалов,

Чакадсть покштят сынст вальмантень.

Кавто кедензэ Куляша

Сестэ верев кепединзе;

Кемень суронзо Куляша

Сестэ прязонзо нединзе.

 

Зярдо Куляшань тетязо

Сыргакшнось кудов молеме,

Вармавтомо сон сяворькшнесь,

Сильдейтеме сон пупорькшнесь.

Вейке Куляша тяказо

Фатякшнось тиринь тетянстэнь.

 

Тетянзо каршо лисекшнесь,

Кундакшнось кавалалонзо,

Кармакшнось сонзэ кевкстнеме:

    Тон мекс, тетякай, авардят?
Тон мекс, тирякай, ченярдат?
Тон вармавтомо сяворькшнят,
Тон сильдейтеме пупорькшнят.

    Мои секс авардян, тякинем,
Мои секс ченярдан, тейтерем:
Ошонть алов тонь алтытинь,
Ошпандонть алов евтытинь.
Ошонть алов тонь сайтядызь,
Ошпандонть алов путтадызь
Эрямсто калмонь пештицякс,
Стака ошпандонь кирдицякс.

    Иля, тетякай, аварде,
Иля, тирякай, сюморде.

 

Нать, монь чачомстон-улемстэнь,

Чипазонь валдос нолдамстон,

Пазось тозонь монь путымим,

Эсень уцяскась алтымим

Апак сэреде куломас,

Покш ормавтомо емамос.

Мон сисем лелянь сазоран,

Мон сисем урянь парыян.

Велень ломанень тюнгольдезь,

Тон калмик виде сэринем.

Тонь, тетякай, монь тиринем,

Улить сисем паро церат.

Сисем велева сынст кучить,

Максст сыненст сисем меремат.

Покш церантень тон мертяя —

Эрек кандолазт рамазо;

Омбоцентень тон мертяя —

Кортыця палмань рамазо;

Колмоцентень тон мертяя —

Парсей одрынеть рамазо;

Нилецентень тон мертяя —

Пижень котынеть саезэ;

Ветецентень тон мертяя —

Парсеень фата рамазо;

Котоцентень тон мертяя —

Кедем коряс кетькст саезэ.

Вишка лелянстэнь Куляша

Сонсь мереманзо меризе:

— Ох, лелинем! Ох, васькамнем!

Рамакая сиянь суркске,

Конатань эйсэ монь лемем.

Мештезэнь рамак сюлгамо,

Конатань эйсэ мазычим.

 

Сисем велетнева тукшность

Куляшань сисем лелянзо.

Рамакшнызь сисем велесэ

Калмонь пешти парочинзэ.

— Ней, тетякай, ней, тиринем,

Эрьга анокстак тон свадьба.

Улить сисем саень урьват —

Теевтея покш парь поза,

Рамакая лагун пуре.

Тонсь, мелем-ваным, печкика

Сисем иень перть трязь букат.

Сисем каштомт тон прякат панть.

Пурныть тон чачи раськетнень.

Вай, тон, авакай-тиринем,

Сыре уряжонь кучика

Псистэ баниненть уштомо.

Омботькс урьванть кармавтыка

Тантей ярсамкань пидеме.

Колмотькс урьванть кармавтыка

Монь ашо сэрем парямо.

Нилетькс урьванть кармавтыка

Рунгинем шлямо-нардамо.

Ветеце урьванть кармавтык

Черем-пулом тень кодамо.

Котоце урьванть кармавтык

Монь рунгом-сэрнем пурнамо.

Сисемеценть тон кармавтык

Монь эри сэрнем лажамо.

 

Куляша тукшнось пси баняв —

Сисем уряжтне мартонзо.

Ашо штынекс сонзэ шлякшнызь,

Мазый цецякс наряжакшнызь.

Кода весе лиссть банясто —

Кедь лангсо кандыть парыяст,

 

Лажить рунгонзо-сэрензэ.

Килейнекс кольгить-авардить,

Лисьмапрякс чудить-мелявтыть.

Пуромсть Куляшань ялганзо,

Састь велень весе оянзо.

Куляша лажи эсь прянзо,

Корты вечкевикс ялганстэнь:

— Эсь прям лангсо, вечкевиксэнь,

Стака ошонть мон ней кирдьса.

Сэрем лангсо ней, оинень,

Стака ошпандонть мон кастса.

Мондень мейле тынь, ялгинем,

Кувака морокс лацемизь,

Моро вайгелькс гайгевтемизь.

 

Вана Куляша кузекшнесь

Тиринь кудонь кустема лангс,

Кенкшенть удало лоткакшнось.

— Панжика, урякай, кенкшенть,

Сован тетянь кудо потс мон.

Карман пурнамо туеме,

Ули-парочим казнеме.

Совавтыкая, энялдан,

Колмо парть матрань монь паром.

Тынк вийнесэ мон васькакшнынь,

Неть парочитнень теекшнинь.

Явшинкая, казнинкая

Апак севно, апак шално.

Мельспаросо явшинкая,

Седейшкава казинкая.

Иень покш читнень озномсто,

Инечитнень ютавтомсто

Руцям-палям оршинкая,

Еми сэрем лецтинкая!


Продолжение 3


Категория: Стихи | Добавил: tati (03.10.2010)
Просмотров: 425 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz