ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Стихи

МАСТОРАВА. Сисемеце евтамо. Масторавань эрямось-касомась. ОШОНЬ ПУТОМА. Начало

МАСТОРАВА

Сисемеце евтамо. Масторавань эрямось-касомась.

ОШОНЬ ПУТОМА

Пурнынзе Тюштя покштятнень,

Потсо валонзо евтынзе:

Пек мазый Эрзянь масторось,
Эри-ашти шумбрачисэ.

Вейке ила, покштят, арась,

Вейке кой, прявткеть, а саты.

Арась Рав лангсо нардев ош,

Арась кепедезь ошпандо.

Эряви путомс нардев ош,

Кепедемс кеме ошпандо.

Козонь ошонть минь путсынек?

Козонь ошпандонть тейсынек?

    Адядо тозонь путсынек,
Адядо тозонь тейсынек,
Косо сисем лисьмапрятне
Мастораванть потсто лисить
Ды ине Равонтень чудить.

    Азедо, пурнынк ломантнень,
Тердинк ероковтнень-колтнэнь,
Саинк виевтнень, досужтнэнь,
Кить маштыть кудонь путомо
Ды ошпандонь кепедеме.

 

Вана ероковтне пурнавсть,

Пуромсть колтнэ ды киевтне.

Сакшность кудонь путыцятне –

 

Тердевсть ошонь теицятне.

Тюштя васолонь кив сыргась,

Тусь нардев ошонь путомо.

Моли сон чопода вирьга,

Арды лугава, паксява,

Уи венчсэ лейтнень трокска,

Юты келей эрьктнень перька.

 

Арды Тюштя — мастор сорны,

Менельсэ пурьгине зэрни,

Коволсто ендолт кивчкаить.

Инязор арды икеле,

Шержей покштятне — мельганзо.

Лишметнень пильгалдо пургить

Толонь сяткт, судостост лиси

Тусто раужо качамо,

Кургосост кирвитол палы.

Колмо чинь ютазь пачколесть

Сынь тона мазый таркантень,

Косо сисем лисьмапрятне

Мастораванть потсто лисить

Ды ине Равонтень чудить.

    Козонь путсынек минь ошонть?
Козонь тейсынек ошпандонть?

    Тезэнь тейсынек минь ошонть,
Тезэнь путсынек ошпандонть.

    Сонсь Инешкипазось, покштят,
Кармавтсь тезэнь сонзэ теемс:
Неть сисем лисьматнень вакссо,
Неть колмо китнень улосо,

Ине Рав леенть чиресэ,—

Евтась покштятненень Тюштя,

Ды мерсь сон тевенть ушодомс.

 

Путыть ош сынь коень коряс,

Теить тевенть лувонь содазь.

Тейсызь сонзэ калонь пря лангс,

Калонь пря лангс сынь кепедьсызь

Прок уиця кал сон ули,

Прок салыця кал сон ули.

Теить, теить — сон калады,

Кепсить, кепсить — сон лондады.

 

Тейсызь сонзэ скалонь пря лангс,

Кепедьсызь сынь скалонь пря лангс

Прок скал, стака ош сон ули,

Прок скал, нузякс ош сон ули.

Теить, теить — сон калады,

Кепсить, кепсить — сон лондады.

 

Тейсызь сонзэ кискань пря лангс,

Кепедьсызь сынь кискань пря лангс

Прок киска, сэви ош ули,

Прок киска, благой ош ули.

Теить, теить — сон калады,

Кепсить, кепсить — сон лондады.

 

— Козонь тееви те ошось?

Кода путови ошпандось?

 

Тейсызь сонзэ тувонь пря лангс,

Кепедьсызь сынь тувонь пря лангс

Прок туво, уды ош ули,

Прок туво, ярсы ош ули.

Теить, теить — сон калады,

Кепсить, кепсить — сон лондады.

 

Тейсызь сонзэ гуень пря лангс,

Кепедьсызь сынь гуень пря лангс

Прок гуй, пупи ош сон ули,

Прок гуй, сэви ош сон ули.

Теить, теить — сон калады,

Кепсить, кепсить — сон лондады.

 

— Мекс а тееви те ошось?

Мекс а стявтови ошпандось?

Кодамо казне сон веши —

Кодамо ойме сон учи?—

Пижнить ошонь теицятне,

Кевкстнить сонзэ путыцятне.

Тумай атя вал евтакшнось,

Тумай покштя кортазевкшнесь:

 

— Секс а тееви те ошось,

Секс а стявтови ошпандось:

Якстере атякш сон веши,

Якстере атякш эряви.

 

Велева-сядга туекшнесть —

Якстере атякш рамакшность.

Ошонть алов сынь ускокшнызь,

Ошпандонть алов путокшнызь.

Ниле пелев сынь керякшнызь,

Ниле ужова путокшнызь.

Кармасть ошонь сынь тееме,

Сыргасть ошпандонть стявтомо.

Сынь теить, теить — калады,

Кепедить-валкстыть — лондады.

 

     Мекс а тееви те ошось?
Мекс а стявтови ошпандось?
Мезень казне ней сон веши —
Кодамо ойме ней учи? —
Пижнить ошонь теицятне,
Кевкстнить сонзэ путыцятне.
Вежай атя вал евтакшнось,
Вежай покштя кортазевкшнесь:

     Секс а тееви те ошось,
Секс а стявтови ошпандось:
Парсеень кесак сон веши,
Парсеень кесак эряви.

 

Велева-сядга якакшность —

Парсеень кесак муекшнесть.

Кесак ош алов ускокшность,

Ошпандонть алов каякшность.

Ниле пелев сынь керякшнызь,

Ниле ужова путокшнызь.

Кармасть сынь ошонь тееме,

Сыргасть ошпандонь стявтомо.

Сынь теить, теить — калады,

Кепедить-валкстыть — лондады.

Чочкояк путыть — а туи,

Кавтояк путыть — а туить.

 

Продолжение 1

 



Категория: Стихи | Добавил: tati (03.10.2010)
Просмотров: 1131 | Рейтинг: 4.0/1 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. З... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
[01.02.2010][Мои статьи]
Александр Маркович Д... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz