ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Стихи

МАСТОРАВА. Сисемеце евтамо. Масторавань эрямось-касомась. ОШОНЬ ПУТОМА. Продолжение 1

МАСТОРАВА

Сисемеце евтамо. Масторавань эрямось-касомась.

ОШОНЬ ПУТОМА

см.Начало

Продолжение 1


Рукштядсть сынь кавто кеднесэст,

Недясть сынь кемень сурбрясост.

— Мекс а тееви те ошось?

Мекс а стявтови ошпандось?

Мезе тейтяно-кандтано?

Мезе путомс ошонть алов?

Минь путовлинек розь прине,—

Нама, Норовавась кежди,

Модась лотки чачтомадо.

Минь путовлинек церань пря —

Церанть вельть ламо тевензэ,

Церанть вельть ламо рисксэнзэ:

Паксяс кадови сюрозо,

Лаймес кадови тикшезэ.

Арседе, покштят, арседе!

Эрьга путтано минь тейтерь,

Сайтяно минь тейтерь эйде.

Тейтеренть арась рисксэзэ,

Тейтеренть арась кажозо.

Се ансяк ули рисксэзэ,

Се ансяк ули кажозо:

Колмошка керьме* мушкозо,

Колмошка эскелькс паезэ.

Лаймесэ мезе тевезэ?

Паксясо мезе паезэ?

Ве пшти тарвазнэ турозо,

Ве келей икелькс тевезэ.

Кардайсэ мезе тевезэ?

Кардайсэ мезе паезэ?

Ве ашо ярка паезэ,

Ве синдезь пильге сараске.

Секе тейтеренть паезэ,

Секе тейтеренть лезэзэ.

 

Керьме —пусмо (руз.— пучок).

 

 

— Мезень кис минь ломань ойменть,

Мезень туртов тейтерь тяканть

Путсынек те ошонть алов? —

Тюштя кевкстинзе покштятнень.—

Инешкинть кежиявтсынек,

Анге минек сюдосамизь.

А эряви кезэрь койсэ

Те од ошонть, покштят, теемс.

    Ломань кельсэ ошось кортась,
Ломань пря ошпандось веши,—
Ансяк тейтерень пря аны,—
Евтасть Тюштянень покштятне,
Мереть сонензэ шержей прятне.
Вачкодсть сынь кавто кеднесэст,
Пувордызь сынь кемень сурост:

    Косто сайтяно минь тейтерь,
Косто муйтяно минь мазый?
Велестэ велес якакшность,
Куросто курос сакшнокшность.
Кеменынка веле ютакшность,
Сядошка куро ваннокшность —
Эрявикс тейтерь эзь муевть.
Велень промкс сестэ теекшнесть,
Сыре атинеть тердекшнесть.
Весе атинетне сакшность,

Весе шержейтне пуромкшность.

    Ки сюпав вейке тейтерьсэ?
Ки козяв мазый тейтерьсэ?—
Сыре атинетнень кевкстизь,
Шержей принетнень киведизь.
Мусть сюпав вейке тейтерьсэ,
Мусть козяв мазый тейтерьсэ.
Сонзэ мельганзо кучокшность,
Сонзэ кисэнзэ молекшнесть.

    Адякая, покштяй, промксов,
Адякая тон веле юткс.

 

Атясь промксонтень молекшнесь,

Покштинесь веле юткс сакшнось.

    Максыка, атя, тейтереть,
Максыка вейке тякинеть.
Касы ошось веши сонзэ,
Ошпандось аны Куляшань.

    Мон а максса тенк тейтерем!
Мон а максса тенк Куляшань!
Сон сисем алянь ве сазор,

Сон сисем урьвань парыя.

Сон тетькастояк вейкине,

Шкинь авкастояк ськамнензэ.

Монь сисем цера тякинем,

Монь сисем саень урьвинем –

Сех паро цера саеде,

Сех вадря урьва анадо.

— Вай, а эряви тонь церат,

Вай, а эряви тонь урьват:

Эряви мазый Куляша,

Эряви Куляша эйдеть...

 

Васня симдизь сыре атянть

Ошонь путытне пуреде —

Ливтизь сонзэ валдо превстэ.

Мейле симдизь сыре атянть

Ошонь путытне пиядо —

Ежосто сонзэ сынь ливтизь.

Сестэ Куляшань алтызе

Ошонть алов сыре атясь,

Сестэ Куляшань евтызе

Ошпандонтень чавола прясь.

 

Куляша мазый тейтересь!

Куляша паро тейтересь!

Сисем алянь сон ве сазор,

Сисем урьвань сон парыя.

Тетькастояк сон вейкине,

Шкинь авастояк ськамнензэ.

 

Косо Куляша тев теи?

Косо Куляша васькавты?

Косо сон, Куляша, штерди?

Вере, вере сон утомсо,

Вере утомонь цюлансо,

Цюланонь тюжа эземсэ,

Цюланонь валдо вальмало.

Ашо кендине алонзо,

Сиянь мукорь пильгалонзо.

Котовасо сон палясо*,

Кавксовасо сон руцясо.

Карксазь стамедной кушаксо,

Мештезэ пешксе эрьгеде,

Прязо пешксе пря суреде,

Пилеванзо пух пилекскеть,

Пулонзо чавозь пижесэ,

Пуло песэ — парсей ведьметь.

Ашо коцткине кедьсэнзэ.

Сэнь парсейсэ сон сэнежди,

Якстересэ сон якстерди,

Мишарасо сон кемельди.

Васов марявкшнось парозо,

Васов неявкшнось мазызэ —

Мик сисем паксянь томбалев,

Мик сисем вирень товолов.

Кудынеть якить мельганзо,

Андынеть правтыть кисэнзэ...

 

*Котовасо палясо — кото рядсо викшнень палясо.

Продолжение 2


Категория: Стихи | Добавил: tati (03.10.2010)
Просмотров: 477 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz