Масторава. Кезэрень пинге. Колмоце евтамо. Од коень-илань касома. СУРАЛЯ
 

Сураля эри Равлей велесэ

Сура лей чирень тусто виртнесэ.

Паро шкась ютась, берянь шка нежедсь.

Эрьва пельде сы, эци зыянось.

Колмо ковт арась сэтьме пиземе.

Коське вармадо, пултыця чиде

Мастораванть мик чамазо лазновсь.

Тикшетне ченгить, чувтнэ ожолгадсть.

Идем ракшатне вирьстэ орголесть.

Сурань калтнэ тусть Рав леень ведев.

Истямо стака шкасто Сураля

Сыргась якамо вирьга-укшторга:

Ливти нармунень пурнась кундамо,

Сярдонь, нумолонь сэрнясь вешнеме.

Моли вейке чи сон нусманясто,

Моли кавто чить нучкань седейсэ,

Моли колмо чить сон прянзо нолдазь

Нармунть-мезть арасть, вирь потмось чаво.

Нилеце чистэ сон чувто прясто

Несь Тумоатякш покш, кода ракша.

Алов селмонзо нармуненть нолдазь,

Сельмензэ конязь, пулозо пурназь.

Капшазь налчирькенть церась саизе,

Нармуненть седейс кармась сметямо.

Тумоатякшось вейке сельмензэ

Сестэ панжизе, варштазевсь алов.

Сэредезь-ризнэзь сон энялдозевсь

Ды Суралянень истяня кортась:

—  Илямак леде монь, паро ломань!

Илямак чаво монь, вадря аля!

Маштован тонеть, парот а стувтса.

Эрямо пингень перть тон, Сураля,

Тень кисэ кармат мейле васькамо.

Сураля арси: «Бути а ледьса,

Нейке туи сон менель ежонтень,

Ансяк пулонзо, нать, монень невтьсы».

Таго налонзо сон кепедизе,

Смети ледеме Тумоатякшонть.

Тумоатякшось пелезь соракадсь,

Кортазевсь таго од Суралянень:

—    Илямак чаво, нолдык налчирькеть.

Пингень перть, цера, парот  а стувтса!

А соды, кода улемс, Сураля.

Налчирькенть яла кедьсэнзэ кирди,

Смети нармуненть седейс ледеме.

Секс седеяк пек атякш сорнозевсь:

—    Илямак леде тон, паро ломань!

Илямак чаво монь, вадря аля!

Мезе теть ансяк эряви, евтак —

Весе бажамот велькска топавтсынь.

Ней од Сураля допрок талакадсь.

А лововитькак, зяро мелявкстнэ

Ды асатыкстнэ паро од церанть.

—    Вай, а евтави, зяро арасьчим!

Вай, а ловови, зяро мелявксон!

Эряволь бу тень сэтьме пиземе,

Сюронь чачома, тикшень касома,

Ракшань раштамо, калонь кундамо,

Нармунь вайгельсэ валскень вастома,

Мазый моросо чокшнень ильтема...

—    Весе мелявксот тонь, паро ломань,

Весе арасьчить тонь, вадря аля,

Вием монь саты парсте топавтомс,—

Тумоатякшось мерсь Суралянень,—

Ансяк те шкане арась шумбрачим.

Мон а ливтяван, орма стардымим.

Андомак, ломань, вийс совавтомак,

Кулы ормадо васня идемак.

Мейле ливтяван, козонь эряви,

Мейле муйтяно тонеть парочи.

Сураля ульнесь седеймариця.

Кенгелямонь койть сон эзь содакшно.

Тумоатякшонь валтнэнь кеминзе.

Лавтовонзо лангс ине нармуненть

Озавтызе ды кудов кандызе.

Кармась сывельде сонзэ андомо.

Кото ковт вирьга сон якась-пакась.

Кото ковс кото сярдт сон кудов кандсь.

Мейле кевкстизе Тумоатякшонть:

— Паряк  андовить, виеть саты ней?

Эрьга ливтяка менель ежонтень.

Тумоатякшось менельс кепететсь,

Ливтнесь аламос пельтнень малава

Ды капшазь алов кармась валгомо.

Теяк шкась тензэ кувакакс марявсь.

— А саты вием васов ливтямо.

Яла лавшан мон, селмон стакинеть.

Эрьга андомак таго кото ковт.

Таго кото ковт кото сярдодо

Савсь Суралянень андомс нармуненть.

Кемгавтово сярдт сэвсь сон иень перть.

Эрьга ней ливтяк вере менелев.

Паряк, алкуксонь вийс тон совавить.

Таго менелев нармунь кузекшнесь.

Весть-кавксть чаравтсь сон чинзэ малава

Ды мекев велявтсь, кода икеле.

—  Вием аламо нейгак, Сураля.

Васов ливтямо мон а цидярдан.

Таго Сураля иень перть анды

Тумоатякшонть сярдонь сывельде.

Сура лей лангонь тусто виртнесэ

Уш сярдонь канось кармась емамо.

Теевсь нусманя церанть ежозо.

Сизесть пильгензэ, сакшность кежензэ,

Емась мелезэ вирьга якамо.

Ансяк се шкане Тумоатякшось

Суралянень пшкадсь кеме вайгельсэ:

—  Эрьга пурнака, цера, сэрняка

Васолонь таркав лангсон ливтямо.

Ней вием ламо, ней вием саты

Эрьва кодамо сталмонь кандомо.

Озак лангозон, кеместэ кундак.

Минь ливтятано парочи мельга.