Масторава. Кезэрень пинге. Колмоце евтамо. Од коень-илань
касома. СУРАЛЯ. Продолжение1 в начало
Кенярдозь-кецязь,
кавто кедензэ
Кепедекшнинзе верев Сураля.
Инепазонтень сюкпря
сон евтась,
Колмоксть сюконясь
Масторавантень.
— Инешкипаз, мазый
Паз!
Инешкипаз, паро
Паз!
Анан пельдеть
пазчангот,
Учан пельдеть
парочи.
Марямак, Инешкипаз.
Мон эсь валом
кортаса,
Арсезь мелем
евтаса.
Минек Инешкипазонь
Менель экшсэ, пель
экшсэ
Ули путонь кудозо.
Ули сонзэ мелезэ,
Ули паро олязо.
Покшке сонзэ мелезэ,
Виев сонзэ олязо,
Седеяк покш
валозо.
Мастор лангсо
киненьгак
А арсевить
мелензэ.
Менель ало
киненьгак
А теевить тевензэ.
Сон паро олясонзо
Мезе арси, сень
теи.
Сон курго валнэсэнзэ
Мода-Масторонть
кирди...
Зярдо арсесь
Инепаз
Мастораванть тееме,
Аволдынзе
кедензэ,
Евтынзе эсь
валонзо.
Масторавась
появась
Покш пандонек,
латконек.
Латктнева сон
ведь шольневтсь,
Ведтнень эзга
калт нолдась.
Масторось чачсь —
коесь чачсь.
Ки Масторонть кирдизэ?
Арась сонзэ
кирдизэ:
Арась коень
ветизэ,
Арась калонь
кундызэ,
Арась вирень
керизэ,—
Арась ломань
оймезэ.
Таго венстевсть
кедензэ,
Меревсть курго
валонзо.
Виев варма
кепететсь —
Ломань ойме теевтевтсь
Инепазонь
понасо,
Инепазонь чамасо.
Сон киськенек ды
вернек
А ормасо-тармосо,
Шумбрань-парочинесэ,
Аволь коське чечейсэ.
Инепаздо сон
пелиль,
Пазонь койне
топавтыль,
Ламо озкст тензэ
озныль.
Кода раштасть
ломантне,
Инешкипазонть стувтызь.
Кадызь Пазнэнь
озномаст,
Кадызь Паздо
пеленаст.
Пазоськак сынст стувтынзе,
Кедьстэ, пильгстэ каинзе.
Кармась орма мукшномост,
Коське чечей сайнемест.
Эрьва орма сынст эйсэ,
Эрьва стакась сынст лангсо.
Инешкипаз, мазый Паз!
Инешкипаз, паро Паз!
Сельминесэть неемак,
Пилинесэть марямак.
А эсь кисэнь истяня
Мазый леметь кундаса.
Ва сась тонеть Сураля
Сюконямо, озномо,
Покш шумбрачинь вешеме,
Покш парочинь кевкстеме.
Сон сюкпрянзо максызе,
Сон кансткензэ путызе.
Сюкпирянзо тон неик,
Кансткинензэ тон саик,
Шумбрачинзэ тон максык,
Парочинзэ тон кучик.
Кона ормась лангсонзо,
Кона стакась эйсэнзэ,
Тонань эйстэнзэ саик,
Тонань киськстэнзэ явик.
Шожда коштокс тон пувик,
Коське чувтс сонзэ кучик...
Продолжение следует
|
