ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Стихи

МАСТОРАВА.Кевейкееце ёвтамо. КИЛЯВА. Песня Килявы
МАСТОРАВА.Кевейкееце ёвтамо. КИЛЯВА.
Песня Килявы

Суранть чиресэ, покш пиче вирьсэ,

Пензай велесэ эрясь Килява —

Мазыйде мазый тейтерь тякине,

Вадрядо вадря бояравине:

Лисиця чинесь сонзэ чамазо,

Пешксине ковнесь  ашо рунгозо,

Лемонь цецятне валдо сельмензэ,

Цянавонь селмтне сельме чирькензэ.

Кудос сови сон — кудонть валдомтсы,

Ушов лиси сон — ушонть валдомтсы.

Маштыль Килява тевень тееме,

Вечкиль тейтересь смустень муеме.

Кодыль коцтке сон ловдояк ашо,

Кошткень пувавксто седе шождыне;

Пивсылъ розень пултт сексень авнясо —

Весть-кавксть вачкодезь колмо пондт пивсыль,

Колмоксть вачкодезь сисем пондт пивсыль.

Тень вельде пароль тейтерь тякинесь,

Тень коряс еноль бояравинесь.

Ансяк ве пельде ульнесь урознэ,

Ансяк ве ендо уцяскавтомоль:

Кулокшнось сонзэ тиринь тетязо,

Тетянзо мельга — шкинень авазо.

Ськамонзо эрясь-аштесь Килява,

Чаво кудосо пингензэ печтясь.

Кувать а кувать истяня эрясь —

Курок комсь иеть сонензэ топодсть.

Эзь сода те шкас сон покордамот,

Вестькак эзь маря кежей сюдомат.

Весе велесэнть сонзэ вечкилизь,

Мелензэ ламо церат ванылизь.

Бути кинь лангс сон лембестэ варштыль,

Сень оймесэнзэ цековне морыль;

Бути кинь лангс сон стувтыль варштамо,

Сень седейсэнзэ кукине кувсиль.

Ансяк Килява те шкас эзь арсе

Мирде кочкамо, урьвакс лисеме.

Секс весе ульнесть сонензэ ялгакс.

Тейтерь оянзо эзизь мурнекшне,

Эзизь ливсекшне апаро валсо.

Вейсэ мартонзо кужова якасть,

Кужонь морынеть веньберть морсекшнесть.

Килявань морось вана кодамоль.

«Аволинь чачо мон тейтерекс,

Аволинь касо азоравакс.

Мон бу чачовлинь мекшавакс,

Мон бу касовлинь канавакс.

Ков монь мелем, тов ливтявлинь,

Ков монь превем, тов молевлинь.

Козонь, козонь мон ливтявлинь?

Козонь, козонь мон молевлинь?

Мон покш паксинес ливтявлинь,

Мон покш паксинес молевлинь.

Козонь, козонь мон валговлинь?

Козонь, козонь мон оймавлинь?

Паксянь васень мон тикше лангс,

Паксянь васень мон цеця пряс.

Тосо бу мон кунсоловлинь,

Коданя жойнить сюротне,

Вай, тосо бу мон вановлинь,

Кода кенерить сюротне!

Бути сесэ пек амазый,

Бути сесэ пек апаро,—

Мон ливтяволинь, туевлинь,

Мон ливтяволинь, молевлинь —

Чопода вирев ливтявлинь,

Тусто вирь куншкав молевлинь.

Козо, козо мон ливтявлинь?

Козо, козо мон валговлинь?

Мон вирень васень чувто пряс,

Мон вирень чувтонь тарад лангс.

Мон вановлинь бу, неевлинь,

Коданя нармунть чоледить;

Мон кунсоловлинь, марявлинь,

Коданя кукот кукордыть.

Бути тесэ тень а лади,

Бути тесэ тень апаро,—

Мон ливтявлинь бу, туевлинь,

Мон ливтявлинь бу, молевлинь.

Козо, козо мон ливтявлинь?

Козо, козо мон молевлинь?

Велень окольцяс ливтявлинь,

Окольця палманьс оймавлинь,

Тосо вановлинь-неевлинь,

Коданя народось яки,

Ков сон моли, ков сон капши.

Бути сесэ а пек мазы,

Бути сесэ а пек паро —

Мон ливтяволинь, туевлинь,

Мон ливтяволинь, молевлинь.

Козо, козо мон ливтявлинь?

Козо, козо мон молевлинь?

Печказонь кардайс молевлинь,

Душманонь кардайс ливтявлинь.

Мон бу вановлинь, неевлинь,

Мезде неть печказтнэ ярсыть,

Мезде неть душмантнэ симить.

Сынь ярсыть лишмень сывельде,

Сынь симить лишмень ловсодо.

Сынь вием монь истя ярсыть,

Сынь нардем монь истя симить.

Либор теевлинь — ливтявлинь,

Печказонь коняс озавлинь,

Коняс сардом пезнавтовлинь,

Сынст седейс сардом нолдавлинь,

Печказтнэнь мон пест маштовлинь...»


МАСТОРАВА.Кевейкееце ёвтамо. КИЛЯВА. Песня Килявы. Перевод Т.Ротановой (Вирявы)

Категория: Стихи | Добавил: tati (22.11.2010)
Просмотров: 735 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. З... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
[01.02.2010][Мои статьи]
Александр Маркович Д... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz