ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Стихи

МАСТОРАВА.Кевейкееце ёвтамо. КИЛЯВА. Месть Килявы.
МАСТОРАВА.Кевейкееце ёвтамо. КИЛЯВА. Месть Килявы.

Печказонь ушмось оймсеме озась,

Кармась тееме ине сабантуй,

Симить печказтнэ, морыть татартнэ,

Ярсыть ногайтне, киштить душмантнэ.

Кемень вайгельбес вайгелест гайгить,

Кемень вайгельбес морост марявить.

Те морамодонть тикшесь нуваргадсь,

Вельтявсь раужо пельсэ менелесь.

Пелевес ярсасть ды симсть печказтнэ,

Се шкас иредезь киштнесть ды морсесть,

Зярс лавшо пильгест лангсто эзть сявордть.

Окойники ва душмантнэ оймасть,

Шалтось лепиясь, ушмось матедевсь.

Прок тувонь стада печказтнэ удыть,

Корныть автень кургт, мазый онт неить.

Эзь удо ансяк те шкастонть ханось.

Талнозь учось сон, зярдо шатрантень

Сови эрзявась, сонзэ од полась.

Вейке арсема ансяк кежейстэ

Ризнэвтсь седеенть, карась прок сардо:

Бути тейтересь пек каштангады,

А карми полань мелень витеме,

Седей кенярксось сестэ лепами,

Покорксось мацтьсы вечкемань толонть.

Ансяк зярдо кучсь Килявань мельга,

Мерсь шатрас ветямс сонзэ удомо,

Мельспаросо сась тона сонензэ,

Мерят тунь ульнесь каштанчивтеме.

Натой кода тештть цитнесть сельмензэ,

Вень чоподасонть наянсто налксесть.

«Уцясканзо лангс, нать, а пеняци,

Каштан тейтерекс а снартни улемс.

Куш однэ, аволь превтеме ломань:

Чарькоди, кинь кедьс савсь тензэ понгомс»,-

Арсезевсь ханось ды идем овтокс

Тейсь стака эскелькс Килявань каршо.

Сонзэ удало колмо енганзо

Аштесть од церат — колмо ванстыцят.

Пейдезевсь сон ды мизолкс марто мерсь

Сэтьме вайгельсэ эсь од урентень:

    Течи полакс тень кармат улеме,
Мартон вейсэ вень печтямо мадят.

    Мадян, ине хан, а стян мелеть трокс.
Ансяк энялдан: панить уретнень,
Кадык кавонек минь кадовтано.
Тарка а муян мон васень виськстэнть.

 

Яходсь кедьсэнзэ ханось, уретне,

Кода арасельть, емасть шатрастонть.

Килява апак капша, састыне,

Прок мезде-бути домкасто арсесь,

Викшнезь панартнэнь кармась кайсеме,

Ушодсь пурнамо вень ютавтомо.

Ханось чатьмони, учи эйсэнзэ:

Ва-ва мартонзо мади мазычись —

Инешкиавань эйдесь — эрзявась

Ды кутмордасы чевте кедьсэнзэ,

Паласы чова турва песэнзэ.

Курок Килява кайсесь, ертынзе

Кияксов сюпав оршамопельтнень.

Стясь кумажа лангс, мадсь ханонть ежос

Мазыйде мазый — прок сонсь Ведявась.

Чатьмонезь ятонть сон кутмордызе,

Лепштизе сонзэ чова кедьсэнзэ

Истя виевстэ — тона лепиясь.

Ноцковтовсь душман мирдесь ды кулось,

Валгак эзь пшкаде, оймась нарьгицясь.

Эзь кенерть ранкстамс сон уретненень,

Шказо арасель кепедемс ушмонть.

Ашти Килява шатрасонть, учи,

Зярдоя мадить ханонь уретне.

Ушмонть ве пеле идем паксясо

Вачодо верьгизт ды ривезть урныть.

Тантей ярсамкань чине сынь марить.

Менельсэнть тештень сятктнень юткова

Ожо ковось уйсь Суранть томбальде.

Эрзянь масторсто, нама, ливтясь сон

Уроз Килявань рискстэ ванстомо.

Нолдась сон сулейть ятонь ушмонть лангс,

Кармавтсь кулозекс сонзэ удомо.

Ва окойники уретнеяк мадсть.

Килява сестэ оршась ды карясь.

Саизе ханонь кичкере торонть.

Ушов шатрасто лиссь, перька варштась:

Иредезь ушмось сэтьместэ удось,

Ансяк пек корнось, курготнень автезь.

— Урьвакстомасон, печказт, симиде,

Уцяскам кисэ, душмант, морсиде,

Урексчим кисэ моразь киштиде,

Иредиде монь якстере верде,

Ней рисксэм кисэ весе кулодо!

Эсенк раужо верьсэнк емадо!

 

Килява ханонь торонть таргизе,

Ушодсь эйсэнзэ ятнэнь керямо,

Кармась прок тинге лангсо пивсэме

Розень, товзюронь ды пинемень пултт.

Весть аволды сон — колмо прят яжи,

Кавксть аволды сон — сисем прят луты.

Ашолгадомас апак оймавто

Истя сон важодсь, виензэ емавтсь.

Пельзэ печказонь ушмонть тапизе.

Эрязасто тейсь тевензэ эйсэ,

Бажась валскентень сонзэ прядомо.

Ансяк мелезэ эзь топавтово.

Покш тевесь салы пек ламо виеть.

Курок сизесь сон, кедензэ лавшомсть,

Ношкалгадсь ханонь кичкере торось.

Весть аволды сон — ве печказ чави,

Кавксть аволды сон — кавто ятт машты.

Весь жо ва юты: курок менелев

Лиси чись, ногай ушмось сыргози.

Месть Килявы. МАСТОРАВА. Эрзянский эпос. Перевод с эрзянского Вирявы (Т.Ротановой)


Категория: Стихи | Добавил: tati (19.12.2010)
Просмотров: 649 | Рейтинг: 5.0/1 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz