1

Се тевесь, эйкакшт, седе икельксэнь,

Макшодо ташто, токамскак а ен.

Вай, эрсильть-аштильть седе икеле

Эрзянь атятне, монсень ялгатне.

Сынь эрильть-аштильть вирень куншкасо,—

Виресь сявориль, комиль лангозост.

Сынь эрильть, эрзят, Сурань кувалма.

А Сурась чудиль витьстэ ютковаст,

А мурдыль Сура ковгак ве енов,

Ковгак ве енов — лия масторов.

А содыль Сура, косто сон чачиль,

А содыль Сура, козонь сон маштыль.

Ансяк сон содыль эрзянь масторонть,

Ды сюро чачиль эрзянь масторсо...

Вай, чачиль, чачиль, модась мендявиль,

Модась мендявиль сюронь сталмодонть.

Вай, а евтави ды а невтеви,

Ды тыненк, эйкакшт, превс а саеви!

Сынст лишмест ульнесть андозь — цить мерильть,

Андозь — цить мерильть, ардыльть — ендолдыльть.

Сынь сеильть-ракильть виев пургинекс:

Сынст сеямодо, сынст рокамодо

Виресь сорк-мериль, ведесь жой мериль.

Менельсь тандадыль, тештне певерильть.

Сынст тувост ульнесть — модань пачк неильть,

Нерьсэст сокардыльть — тумо сявориль,

Тумось сявориль, сэрясь кевериль

А галат-мацейть, а яксяргт-саразт,—

Сетнень ки ловныль?!

А эрзянь цёрат, эриця бодят,

Сынь виевть ульнесть ды шумбрат ульнесть,

Сынь овто лепштильть ды верьгиз повильть.

Туильть чийнеме — сасыльть нумоло.

А эрзянь тейтерть, мазый чинь цецят,

Якильть чоледезь, ваныльть -пеедезь,

Цера юткова уильть яксяргокс.

Вай, а евтави ды а невтеви,

Ды тыненк, эйкакшт, превс а саеви!

2

Сиядыльть сельмест мокшонь цератнень.

Конатне эрильть

Мокшанть кувалма.

Сынь эрильть, мокшот,

Эрзятнень марто

Апак севнокшно:

Эрильть ве превсэ,

Пиильть ве толсо, лакильть ве верьсэ.

Конатат сырксильть сынст лангс тюрькшнеме,

Сыргильть виевстэ — туильть веревстэ.

А седе мейле, кода сыргакшность

Эрзя масторов эрзя-мокшо лангс

Рузонь кавто князть,

Конатат ульнесть тямакакс теезь.

Вай, седе мейле кияк а сыргиль.

Пелильть мокшодо, сорныльть эрзядо.

Кода пой лопась кельме вармадо.

Мезень кис истя? — тынсь чарькодтядо!

3

Вай, яксильть мокшот эрзянь масторов!

Сынь ойсильть, мокшот,

Суранть чирева,

Ды морыльть, мокшот, мокшонь моросо.

Ды сакшныльть яла мокшонь тейтертне

Сурань чиресэ чамань шлякшномо,

Чамань шлякшномо, цецянь кочксеме.

Ульнекшнесь вейке тейтертнень ютксо

Сон мазый, мазый... авардемс мазый!

Се валтнэнь каршо та-ки серьгедевсь,

Та-ки ёртототсь тейтертнень ютксто.

Атянть икелев лисевсь ве тейтерь,

Лисевсь ве тейтерь, арась ве ёнов.

Мери атянтень:

-   Монденьгак мазый?

-   Тондетькак мазый!
Иляст са кежеть.

Сонзэ рунгозо килейде видель:

Сэрензэ кувалт виде килейтне

Ваныльть сиядозь.—

Ансяк прядынзе атясь неть валтнэнь,

Тейтертнень ютксто лисевсь омбоце,

Лисевсь омбоце, седеяк мазый.

Мери атянтень: «Монденьгак мазый?» 

-   Тондетькак мазый! Иляст са кежеть.
Сонзэ молевтте кись виделгадыль.
Чалгамодонзо тикшесь кепетиль.
Козонь сон чалгиль — таташка лисиль.
Ансяк прядынзе атясь неть валтнэнь,
Тейтертнень ютксто лисевсь колмоце,
Лисевсь колмоце, седеяк мазый.
Мери атянтень: «Монденьгак мазый?»

-   Чидентькак мазый! Весе комадо!
Вай, се тейтеренть, некак, Чипазось
Ванстыль эстензэ!