* * *
П.К. Любаевнень чачома чистэнзэ
Вай, а стяко тон Пикшнясо Чачить…
Тесэ ули смусть:
Эрясь Пушкин — АС — шабрасо.
Ёвтнить — сакшнось веть ды тусь.
Тусь, ансяк кортнесь покш мельсэ
Пазонть марто тет-а-тет:
Келя, Пикшнясто «Шинельсэ»
Саранскоев сы поэт.
Пал Кириллыч! Чевте седей!
Покш пасиба: тосто сыть,
Венстнить одтнэнень эсь кедеть,
Эйсэст даволдо ванстыть.
Тонсь а содат, зяро лирикть,
Публицистт, прозаикть псить,
Эрьва кодат — одт ды сыреть —
Вытрезвительстэ таргсить.
Паряк, секс — неить пек ламо —
Ловить эсенсекс ойметь:
Сакшныть ярмаконь займамо
Ансяк тонеть пелеветь.
Лембень кандыця, идиця,
Шумбрачи теть, ольной свет!
Вадря, зярдо сёрмадыцясь
Теке марто и Поэт!
| 
