СОН МОРОС  ОЙМЕНЗЭ ПУТЫЗЕ

Сцена лангсо налксема

НАЛКСИЦЯТНЕ:

Русланова    Лида — артистка, рузонь моронь морыця.

П р о с к а    — Руслановань (Лейкинань) эйкакшпингень лемезэ.

Даря — Проскань васолбабазо.

Я  ш  а—Проскань  тетянзо  ялакс.

Фронтонь артистэнь бригадань коряс Руслановань оянзо-ялганзо.

Те и терт ь,  цёрат, боец т, офицер, войнань ветеран, ловныця.

В  е  т и ц я — сценанть удалдо  вайгель.

Гайги «Валенки» морось. Шаршавось зярс апак кепеде. Эйзэнзэ понгавтозь портрет, конань лангсто ваны мизолдыця ава, оршазь рузонь раськень оршамосо, прясонзо цецяв паця. Те Лидия Андреевна Русланова.

ВЕТИЦЯСЬ (вайгелесь маряви сценанть удалдо, моронть марта ве шкасто).

Чачсъ сон  Саратовасо, тосо эрясь-кассь

Лидия Русланова, минек эрзявась.

Моронзо тердсть эрямо, вечкеме тонавтсть,

Тирань Россиянтень сынь седей лембе явсть.

Понанъ кемть! Кевердезь кемть! Пек малавикст теть.

Одс морак, Русланова! Морось — тонь ойметь.

Гайтевстэ морави моронть юткозо.

Морось прядови. Шаршавось панжови. Сценанть лангсо велень кудопотмонь пелькс. Карькс ланга сравтнезь эйдень руцят-тетькеметь. Вить ёно понгавтозь лавсь. Ушосонть ве. Кудосонть пельсчопода. Тейтерне нурси лавсь, сонсь моры лавсень моро. Эйдесь аварди. Сови Даря баба,

ДАРЯ БАБА. Нейгак тякинесь пижни! Ава тензэ эряви. А тонанень яла чинек-венек а ютко. Кудонь-кардазонь весе тевтне лавтовонзо лангсот. А тесэ оштё атясь ормалгадсь. Пичксема кудов эряви ускомс.

П Р О С К А. Мейсэ тов ардомс? Лишменекак арась.

ДАРЯ. Молянгак Яхимнень, паряк, сон лезды. А тон зярс толонть пувик-вельмевтик.

Сырькаесь туи сценанть удалов. Мельганзо — тейтерькинесь, кона сеске велявты штатол марто, кирвазтьсы. Кудопотмось валови валдосо. Эйкакшось яла пижни. Совить тейтерьканть сырькаезэ ды Яша лелязо.

ДАРЯ БАБА (Яшаненъ). Кортнек зярс сазоркат марго, а мои те шкастонть атянть пурнаса пичксема кудов. Тейтернентень ськамонзо тюк сась. Ушосонть ве, сонензэ, пайстомонтень, удома а педи. Таргадо кавоненк моронь вайгель. Паряк, эйдинеськак, моронть кунсолозь, матедеви.

Туи. Яша састыне ушоды морамо.

ВЕТИЦЯСЬ. Вечкевикс ваныцят! Тынь содатадо, Лидия Андреевна Руслановань кудораськезэ ульнесь эрзянь. Сон чачсь неень Пенза ёнксонь Лопатина буень Даниловка велесэ (лия сёрмадовксонь коряс Чернавка велесэ). Лидань тетянзо ялаксось ульнесь превей, содась эрзянь ды рузонь ламо морот. Русла­новань аванзояк, бабанзояк мазыельть вайгелест. Сонсь Лида морыль истя чевтестэ, мазыйстэ — перьканзо пуромозтне кунсоломстонзо натой аварьгадыльть. Юты шка, ды печтязенть ледстнемстэ Русланова мери: «Весе седейсэ мон марякшнынь, кодат виев ёжомарямот сыремтнесть народонь мелодиятне. Алкуксонь морось, конась васенцекс токизе седеем, — ульнесь лайшема».

Эрзянь велесэ, эрьва кудосо, аватне кодамояк тувталонь коряс ды тувталтомояк нолдылизь урнемань-лайшемань вайгелест. Вейкесь ушоды, омбоцеськак вайгелензэ таргасы мельганзо, апак мере-кармавто колмонстнэяк лажакадыть... Сынст пельде Лиданеньгак педясь моронтень вечкемась.

Яша састыне моры «Ах, вы, сени, мои сени...» моронть. Тейтерькась ваны кургозонзо.

П Р О С К А. Тонь тосо нудей?

ЯША. Аволь нудей — ойме ёжо.

П Р О С К А. Кодамо сон «ойме ёжось»? Покш нудей?

Яша раказеви ды мекев ушоды морамо.

ДАРЯ   БАБА. Покштяськак матедевсь. Жаль маряви пувтамс. Чинь-чоп майсесь-кувсесь, стомавсь. Кадык мелявксонь кандыця, ды сонгак ломань. (Арсезь.) Эрьва ломанесь масторонть лангсо эри, кода паксясо тикшесь касы.

ЯША. Сестэ пиже зорява сонзэ ускома Саратовав... (Нусмакадозь, састыне ушодсы «Степь да степь кругом, путь далёк ле­жит...» моронть.)

Проска ды сырькаезэ ладясызь вайгелест сонзэ марто. Ашолгады. Эйдесь уды. Сутями Яшаяк. Тейтернеськак эль матедеви, ялатеке прянзо удомантень а максы.

ПРОСКА. Вай, кода удомам сась, ды эряви аванень лездамс. Лисянгак ушов аламос...

ДАРЯ БАБА. Ушосонть цят якшамо. Тонгить пильгезэть кевердезь лембе кемтнень.

ПРОСКА (мусынзе кемтнень, моразеви).

Кевердезь лембе кемть,

Апак панд о, таштынеть.

ДАРЯ БАБА. Мезе виде, се виде — каладсть кевердезтне. Кода тенст а каладомс? Ловт, сынь веенст колмозонок. Покштянк ормалгадсь, истяк умок пандовлинзе.