СОЛДАТ ДЫ АВА

Евтнема

Ошонь покш, шалныця вокзалсо вастовсть кавто ломанть — солдат ды ава. Солдатонть кутьмерьсэ покш мешок, сон пештязь килангонь ули-паросо. Брезентэнь келей карксонтень поводезь лапужа котелок, кирзовой кем голенища экшс эцезь алюминиевой пенч. Сонзэ тюжолт мериця сельмензэ ванность аванть сэрьга ды шкань-шкань сялгоневсть мелявкссо нусмалгавтозь од чамазонзо. Якстердиця сельмекертнень чирева сельмепонатне авантень неявсть коське кузонь ожо салмукскекс. Аванть кедьпесэ ульнесь апокшке канстке. Оршазь сон шождынестэ. Ашо пацянть алдо конянть лангс лиссть пулос апак кода чопода черензэ.

Сынь кортазевсть ды ёвтызь вейкест-вейкест туртов, кие ков арды. Солдатось течи лиссь госпитальстэ, молема тензэ запасной полков. Авась жо капши кудов. Ошов сакшнось войнав братонзо ильтеме. Кудосо эйсэнзэ учить кавто эйкакшкензэ...

Сыненст сави пси ды шалныця вокзалсонть аштемс веньперть, поездэсь карми улеме валске.

— Мезе,  бути снартомс товарнойсэ?  — пшкадсь солдатось.
Авась кевкстезь ладсо варштась кортыцянть лангс ды мерсь:

— Веть ардомаськак кода-бути...

Эсь потмова сон, секень вант, согласяволь. Мекс бу, алкукскак, а озамс товарной поезде, ламот ойсить. Сонензэ ардомась­как кавто станциянь ютко — час эли, паряк, омбоце пельчас. Тесэ жо сави валскес аштемс пильге лангсо. Озамо таркатне весе пешксеть ломанде. Ламот аштить киякска.

Солдатось варштавкска чарькодсь, мезде арси вакссонзо авась ды оймавтомганзо мерсь:

—     Мезе, веть пелят, каня? Мон, паряк, аволь кискан, а сускан эйзэть... Мутано чаво вагон ды ардтано графокс...

Сон таргась папироска, кирвазтизе, ноцковтомо кенерсь ансяк весть, варштавксозо кода-бути апак фатя прась пильгензэ маласо киякссо удыця эйкакштнэнь лангс. Васня сеске жо мадстиксэлизе папиросанть, мейле лиссь ушов. Авась кадовсь аштеме таркасонзо, стенантень нежедезь. Солдатось кувать эзь сова ушосто. Аванть мик сизесть пильгензэ ве таркасо аштемадонть. Сон пельсь туеме те таркастонть: пельсь, а мусы мейле солдатось. Эсь пачканзо ней сон мик мурнесь прянзо, мекс эзизе ёвта потмо мелензэ. Солдатось, паряк, кенерсь те шкас озамо товарной по­езде ды туеме. Секс, нать, араськак истя кувать.

Авась стяко тандавтнесь прянзо. Солдатось сась ды сеске жо яволявтсь:

—     Ашти товарной  поезд,  паровозоськак анок,  курок сырги,
кевкстния кондукторонть.

Авась эзь кенере панжомо кургонзо, сон уш чарькодсь: анок туеме мартонзо. Чарькодсь сень коряс, кода валдомсь аванть чама варштавксозо, кода весе рунгосонзо айгевсь каршонзо, зярдо неизе самодо...

Сынь лиссть ушов, тусть перронганть. Зярдо перронось прядовсь, валгсть китненень. Китнева молемстэ чоподасонть секе тев пупорькшнесть рельсатнень трокс. Ютнесть вагон алга. Окойники сынь пачкодсть кувака состав ваксс, конань песэ тыжнэсь паровоз. Вагон петнева тормозонь площадкатне пешксеть сынст кондят жо билеттэме ардыцядо. Сынь мусть чаво вагон. Солдатось кузсь тозонь, валдомтсь спичка ды варштызе потмонзо. Кияксось а пек пулев, стенатне жо овсеяк ванькст.

—     Венстик   кедеть,   лездан   куземс, — мерсь   сон   вагононть
вакссо аштиця авантень.

Зярдо авась кузсь ваксозонзо, солдатось сёлгизе вагон кенкшенть. Истя седе паро, а то юты кондуктор, несынзе ды, секень вант, паньсынзе. Пертьпельксэсь уш ульнесь копачазь вень чоподасо, чаво вагонсонть седеяк чоподаль. Кенкшенть кавто ёнга панжадо люктне ашолдыльть. Станциянть келес палмань прява электрической фонартне палсть ансяк тия-тува, китнень чирева жо якстере ды пиже толтнэстэ валдось мольсь пек аламо. Вагон­сонть качадсь коське пулень ды пиче лазонь чине. Тесэ эзь маряво венть экше лексемазо. Лембе. Сэтьме. Паровозоськак тыжны, мерят, косо-бути васоло.

Поездэнть сыргамс солдатось кенерсь таргамо кавто папиросат. Составонть кувалт, сёвнозь ды сеерезь, якасть ковдукторт, пансесть тормозонь площадкатнень лангсто пассажиртнэнь.

—     Озамс   бу  козоньгак,   хоть  масторов,   а   то  рунгом  весе сивсь, — пшкадсь авась, зярдо вагононть ало паро ладсо зэрнезевсть кшнинь чаротне, ды кадовсть вень чоподантень, теке раужо паця ланга сравтозь эрьгеть, станциянь толтнэ.

Солдатось каизе кутьмерьстэнзэ мешоконть, путызе стенанть ёжос, вельтизе шинельсэнзэ ды мерсь авантень озамодо.

—     А лепштяви мезеяк? — пшкадсь авась ды мельспаросо, седеень оймазь, новольсь чевте озамонть лангс. Витизе рунгонзо, нежедсь стенантень. Сонензэ сеске теевсь кода-бути а ёвтавомашка шождыне — рунгонтеньгак,    ойментеньгак.    Рунгось    шождалгадсь озамодонть, оймесь — те а содавикс ломаненть важдамодо. Истямо ладсо цёрась мелявты ансяк нинзэ кисэ. Сон конинзе сельмензэ ды сэтьместэ арсезевсь. Кода бу паро улевель, бути те солдатонть таркасо аштевель мирдезэ, ды саволь сон ошов аволь братонзо ильтеме, но мирдензэ вастомо. Ней сынь вейсэ ардыть кудов... Арсематнень пачк авантень марявсь: те солдатось пек моли мирдензэ ёнов. Ис­тямо жо алкине ды аламодо эчкине, седе ламо чатьмони, весементь теи апак капша, папиросантькак кирвазти, мерят, ушты каштомо. А уш седеезэ, неяви, лавшодояк лавшо...

Те лавшо седеесь жо аштесь сорныця стенантень нежедезь, вансь чаво вагононь чоподантень ды апак лотксе таргась папироса мельга папироса. Васень шкастонть, зярдо неизе те аванть вокзалсо ломантнень ютксто, сонзэ пряс вельмекшнесь ансяк вейке бажамо: пароль бу мартонзо ютавтомс косояк весь. Сон велень ломань, ды авастонтькак сеске содызе велень эрицянть. Кавто иеть кода тусь кудосто, кавто иеть эзь вастневе нинзэ марто. Колоньгемень иесэ цёрантень те шкась, нама, а нурькине. Войнасо а ютко ды а косо вастневемс ава марто, ней жо, зярдо понгсь васов тылэв ды ранявомадо мейле вадрясто оймсевсь госпитальсэ, мекс бу а кецявтомс тошнаязь ойменть. Эдь уш бути кортамс видьстэ, товарной поездсэ ардомантькак теизе ансяк текень кисэ. Сонензэ ардомскак а те пелев. Запасной полкось, козонь кучизь госпитальстэ, ашти омбо ёно. Вагононтень озамсто арсизе истя: авантень ардомс а васов, ильтясы ды велявты валскентень мекев, туи эсензэ киява. Вокзалсо сон бажась вейкес: седе курок кадовомс те аванть марто кавоненст. Вана сынь кавоненст, чаво вагонсо. Мезе жо учи, эдь сынь ардыть уш зярсыя, паряк, ютасть пелеки, бути а седе ламо...

Солдатось арсесь. Арсесь эсензэ кудодонть, ниденть, эйкакштнэде, конат кадовсть Курск  ошонть томбалев, косо ней азаргалить немецть. Арсесь ломаньс кемиця те авадонть, кона апак пеле озась мартонзо чаво вагонс. Сонзэ мирдезэ истямо жо солдат, кодамо сон. Паряк, те аванть мирдезэ ды сонзэ нись эйкакштнэнь марто уш умок пултавсть войнань толсонть... Арази сы седееть теемс сень, мезес бажась, зярдо вастовсь те аванть марто. Ды сон чарькодсь: а теи мезеяк. Новольстизе рунгонзо стенанть ёжова ды озась мастеров. Ней кадовсь ансяк пачкодемс аванть марто сонзэ станцияс, валгомс мельганзо прянь апак невте ды каршо ютыця поездсэ седе курок велявтомс мекев...

Ламо чинь сиземадонть авась эзь фатяяк, кода матедевсь. Сон удось ризксэнь апак сода, теке эйкакшке. Удоманть пачк аламонь-аламонь сяворсь солдатонть пелев, зярс стакалгадозь прязо эзь путово сонзэ лавтовонтень. Солдатось кувать аштесь апак лыка, мик пельсь лексемадо, кабу а стявтомс удыцянть. Теке мар­то, весе ёжозо ульнесь а эсензэ. Аванть лембесь, кона мольсь сонзэ ёжос ды конанень бажась неть кавто иетнень перть, сыр-гавтызе весе ойме потмонзо. Сонензэ марявсь, кода аванть турванзо удомань пачк секе тев ледстнить сонзэ лементь. Сон эзь маняво, те лемесь сонзэ — Стяпан. Эзь кирдеве солдатось, каизе кедензэ аванть лавтовга ды сорныця турванзо токавтынзе уды­цянть турвас. Сонензэ марявсь те шкастонть — авась сыргозь, весе рунгозо айгевсь эйзэнзэ. Турванзо тандадозь ды теке марто энялдозь нолдасть вайгель:

— Стёпа, седейнем, ужо... иля... иля...

Ды сеске жо теевсь, мерят, а сонськак. Баксордызе мештензэ, мик сезевсь ковтазо. Вийсэ ды кежень сазь тулкадизе эсензэ эйстэ солдатонть, стясь ды чийсь кекшентень, панжизе келес. Вень экше вармась теке кельме ведьсэ валызе прясто пильгс. Сон аламос чатьмонезь вансь вакска уиця чопода паксятнень лангс ды ацирьгадозь ладсесь, мезе цють эзь тееве. Улевельгак валдо, неяволь бу, кода кирьга видьс якстерестэ палы чамазо. Чоподастонть марявсь, кода стакасто лекси. Зярдо превтне ды оймесь арасть ладозост, сон кармась ваномо, кува ардыть, ламо ли кадовсь сонзэ станциянтень. Мекс-бути таркась тензэ кодаяк а содави, эзь ютаво ли станциязо. Сон удось, зярс — а соды...