ЭРЗИАНА эрзянский литературный сайт

ПРЯКСЛОПА
Категории раздела
Мои статьи [335]
Стихи [571]
КАВТО ВАЛСО
Статистика
Главная » Статьи » Мои статьи

Эрюш Вежай. К А Р Г О. Продолжение Ю Р Т А Й В А Н Ё
Продолжение Ю Р Т А Й   В А Н Ё

К А Р Г О


Од венч ушмантнэнь-матростнэнь иневенченть лангс самодост мейле ютасть колмошка таргот. Аламонь-аламонь, ушманонь тевс тонавтнемстэ, сынь кармасть теевеме алкуксонь венчушманокс. Пильгест чиде чис яла седе кеместэ чалгсесть лымбиця венч кияксонтень-палубантень.
Юртай Ванёяк мельсэ нежедезь тонавтнесь эрьва мезень тееме. Невтизе эсь ёрокчинзэ, чарьтьчинзэ, содамос бажамонзо. Аравтозель вишка боцманокс. Ней сон чинь-чоп эвтьсь-пивтьсь иневенченть нерьсэнзэ, секе тев чопавтнесь карьксэнь-артомапелень ванстома мацт кургос ды кувать котьмась эрьва мень пиксэнь-цёконь ды артомапелень марто. Истямоль иневенчсэнть боцманонь тевесь. Кодамот, урядамот-коцкерямот, артомат чинь перть. Цёрась курок тонавтнинзэ иневенчень пикс сюлмотнень, пильгалонь-венчкияксонь кумбинень кодамонть, пиксстэ кустиминень кодамонть.
Сельмень валдосонзо кериця, тундонь чипаесь курок тюжалгавтызе Ванёнь чамакиськенть, олавтынзе сельме понанзо ды сельмечирькензэ. Цёранть судо прязояк чинть ало пись, кармась невелеме. Ней лия венч ушмантнэнь ютксто сонзэ а сеск редясакак.
Ванёнь, неявсь тень, ёжозо ульнесь а берянь. Сон шождасто печтясь иневенчень «орманть», конаньсэ ламот «сэредильть» виев вармань-толкунонь шкане. Цёрась паро мельсэ топавтсь тензэ путозь тевензэ. Тонавтнесь иневедь венчсэ эрямо-урендямо койтнень.
Сеть тундонь читнестэ сонгак аволь весть ванкшнось вельксканок Пелеве ёнов ливтиця нармунтнень мельга. Мезе теят, кодамо кеме ойме илязо уле ломанесь, яла теке тесэ, иневедь куншкасо, эрьвантень пек сеедьстэ ледстневи авань-тетянь тиринь кудось ды чачом масторось. Мерть, эрьва чистэ…
Весть, пушкасо-леднемапельсэ леднемадо мейле прявт венчесь капшавтымизь седее курок туеме сэтьме аштема таркав. Пачтясь тенек, келя, минек ёнов айги виев вармав давол. Пиже тундонь шкане сынь неть таркатнесэ сеедень инжеть, ссеке тев вачкодькшныть. Пачкодинек аштема-кекшема тарказонок суньдерьгадома малав. Кармакшноль чопотеме.
Эзинек кенере иневенч кечказонть-якоренть каямонзо, сеск эшксь увны-сезни варма. Вешкезевсь сон торсейтнесэ-антеннатнесэ, сювордынзе-сезинзе капшиця толкунтнэнь ашо прятнень, сейсь лангстост ашола-сувов чов панкст… Вешкезь-юргозь вармась човоргавтызе иневедь лангонь келенть, велякавтынзе алов валгозь чопода пельтнень. Вана сон, кежей, виев даволось….
Мон ульнинь иневенчка дежурицякс. Эрязасто кепедевинь венч сэдявксонть (ходовой мостик) лангс. Совинь ветям потмарс венчпрявтонтень пачтямо марто, кода моли даволонтень анокстамось. Тосто, венч вальматнень пачк парсте неявиль, кода боцманонь ушмокурось-командась венч нерьсэнть ёроксто кемекстасть вить кечказ рисьменть кирдемкатнень. Анокстасть ней керш кечказонть эряза нолдамос, ва мезе апаро тееви витенть марто…
Лия венч ушмантнэнь ютксо, неия, эвтсь-пивтсь Ванёяк. Ванькс, ожо тюссо, идема куртказо ссеке тев неявкшнось венч рисьменть вакссо. Прявам ютась мель: - « Эзинь маняво, кол эрьзянь цёрась!»-
Даволс иневенченть анокстамось прядома лангсоль, кода упак учо венч кияксонть лангс та-косто менельстэнть празь прась сеск а содавиця, покш, чопода толга нармунь! Сон виевстэ чавсь сёлмосо-пильгсэ, варма эшкевстнэсэ терявтсь ков-а ков кекшемс. Венч ушмантнэнь ютксто вейкесь неизе, абунгадозь рангстась:
- Ванодо! Ванодо! Карго!!...
Вармась васня ёртызе ды педявтызе нармуненть венч нерень пушканть юрс. Валаня венч кияксканть нармуненть чова пильгензэ нолаштсть. Вармась кандсь каргонть венч чиренть ёнов, косо киштезь киштсть азаргадозь толкунтнэ. Нармунесь терявтсь недямс мезескак кувака кувосонзо, баксорясь пильгсэнзэ, ансяк виев вармась пондакшкавтсь толганзо, келемтсь сёлмонзо, усксь эйсэнзэ чопода човов чави ведентень…
Лиятнеде седе маласо нармуненть эйстэ улевсь те шкастонть Ванё. Ёртовсь каргонть ёнов. Кавто покш кирнявкст! Тонась, мерть, кедьсэнзэ… Эно!... Нармунесь тандадсь. Ахолдась келейстэ сёлмосонзо, ливтязевсь… Варма эшкевксэсь кепедизе нармуненть коштс. Сон нолаштсь Ванёнь кедензэ юткова ды сеск ёмась сэрей толкунтнэнь юткс…
- Вай! … - Ваясь! - Ваясь!... – пижакадсть венч ушмантнэ.
Ды те мезе?! Мейсэ ульнесь, Ванё сеск, апак арсе, чопавтсь чавозь чавиця ведентень! Гайгезевсть ушмовенчсэнть зыянонь яволявтыця баягатне. Вайгель баягатнень пачк ветямо седявксстонть яволявтсть:
- «Ломань – ведьсэнть! – Ломань – ведьсэнть! – Таркава аштемс! - Ломаненть идемс!» -
Иневедьга укшныцятне парсте содыть, мезть тейнемс истямо зыян тевень шкане. Сеск толкунтнэнь юткс ливтязь ливтясть идемань ашкот-кирькст, идемань пикст-кустимат. Иневенчень койтнень коряс, а мереви комсемс-новолькшнемс идема пирявкстнэнь трокс. Ней, те а мереманть стувтозь, кить ульнесть вере, пуромсть ушмовенченть чирес. Кшнинь уськень пирявкстнэнь трокс новолезь, ёртнесть идемапельтнень ведь пандтнэнь ютксо секе тев прянек-мезнек ведьс чопавтниця ломаненть ёнов. Нармунденть ней кияк эзь мелявтояк. Весень мелест вейкель – идемс ведьстэнть ломаненть…
Ванё эзь талакадо. Неявсь, укшномо маштыль вадрясто. Сеск кундавсь идема ашконть эйс. Кармасть таргамонзо верев. Вана таргизь! Весе шождосто таргинек ойменек. Ломанесь идевсь!
Кодамо абунгадомас прынек, зярдо Ванёнь кавалалдо неинек начко толга нармуненть! Кундызе ды таргизе мартонзо цёрась ваиця каргонть!
Валскес даволось энгамсь, оймась. Састыне оймась толкунтнэде иневедь лангось.
 
Омбоце чистэнть чарыкаень-вертолётонь кужованть каштансто, прянь верев кепсезь якась мазый карго нармунь. Ссеке тев витнесь кувосонзо толганзо, кавшакавтсь эйсэст, тыжнэзь венстнесь ёлганя кувака кирьганзо, кежейстэ кальцкаесь пшти калгодо кувосонзо, зярдо кияк снартнесь молемс малазонзо.
 
Юртай Ванёнень, нама, сестэ пек понгсь венч прявтонть пельде. Прявт боцманонтеньгак сатотсь, мекс эзизе кирде венч ушманонть ведьс чопавтемеде. Теде ёвтнемскак а мезть. Венчсэ урендямо коесь теньсэ колазель. Чумотненень путозель…
Ванёнь ялганзо пейдсть ней лангаванзо, келя, чопавтсь цёрась сырнень кал мельга, тарказонзо кундась карго! Ансяк неть пейдемкатне ульнесть паро мелень, аволь згилямкакс. Весе неизь, эрьзянь цёрась – кеме, а пелиця!
Ванё се келме ведьсэ экшелямодонть мейле эзь ормалгадояк, Истяк, кода мерить, кавксть-колмксть кешнясь, ды весе. Каргонть мельга кармась якамо-ваномо сонсь. Путсь тензэ лем – Яшка.
Истя каргось совавтозель венч ушмонть юткс, курок тонадсь венч лувонтень, ярсамопелентень. Пек вечксь ярсамо калдо. Ярсась парсте. Секс курок совась вийс, кармась апак Пеле якамо вере кияксканть, чарыкаень кужованть, вечксь аштеме пушка прясо. Коронь коряс ульнесь пек каштан, а токшевиця. Пек а вечкилизе вечень кискиненть, конань лемезэ ульнесь Боцман. Пинентень сеедьстэ понгонесь каргонь кувосонть коня ланга, зярдо тона терявтнесь каргонть икельде мезеяк саламо, эли пек маласто нармунень лангс онгомо.
Ломантнеде каргось пек эзь пеле. Вечкевикс аштема таркакс кочкизе венч нерьсэ аштиця пушкань прянть. Кувать аштиль тосо ве пильгень кирьмицязь, апак капша витниль цитниця валаня толгинензэ. Таргонь ютазь, кармась ливтнеме венченть перька-велькска, чистэ чис яла седе васов ды васов…
 
Категория: Мои статьи | Добавил: tati (10.01.2010)
Просмотров: 673 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. В... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[01.02.2010][Мои статьи]
Александр Маркович Д... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2018
    Сделать бесплатный сайт с uCoz