|
|
Эрюш Вежай. Ю Р Т А Й В А Н Ё
Ю Р Т А Й В А Н Ё
Течи Союз-сто усксть тенек, иневенченть лангс, од венч ушмант-матрост.
Сынь полавтсызь сетнень, кинь прядовсь урендямо шкаст, сетнень, кить
пурныть-теить кудов туеме.
Мон вейтень-вейтень тердтнян одс
сазьтнень кортнеме-содавтомо. Одтнэ, аламодо виздезь, ды, неяви, а пек
ёнсто иневенченть лангсо эсь прянь марязь, поровтонть-комингсэнть
трокст та-кода чувтоласто эскелязь совсить венч нупалезэм-каютазом.
Пряст наразь вейкетьстэ, нурькинестэ, мик пря киськест ашолды. Сынь
талнозь-кокнозь ёвтнить тень, косто саезельть урендямо, кодат
кудораськест-малавиксэст, кодат арсемаст-мелест од урендямо тарканть
кувалма.
Вана совась келей лавтов, валдо сельме, серей цёра. Видемтизе рунгонзо, эрязасто ёвтызе лемензэ:
- Юртаев Иван венчушманось!-
Варштынь лемконёвонзо. Урендямо саезель Армениясто. Превгам
кивчкадсь-ютась мель: « - Неяви, минек раськень, эрьзянь,
буелемезэ-фамилиязо…»
Ушманонь лем лопасонзо ловнан раське
лемензэ: « - Мордвин…». Сестэ мекс сон Армениястоль? Кода те мастор
ёнксонтень понгсь? Варштынь чамазонзо, ледстия пельс стувтозь эрьзянь
келем ды кевкстия цёранть эрьзякс:
- Тон, цёра, эрьзя, эли мокшо?-
Од ломаненть сельмензэ тетькевсть, сельме чирькензэ кармасть куземе
верев, конязонзо. Валонзо васня лоткасть кирьга парьсэнзэ, мейле,
окойники, цёрась, икнэзь ёвтавсь:
- М-мон…э-эрьзяян…-
Чарькодинь, пек абунгавтыя цёранть апак учонь кевкстемасом. Невтинь чевтьэзементь лангс:
- Сестэ озак, эно, эрьзя.-
Цёрась озась чевтьэземень чирес, неявсь, аздыль козонь путомс кедензэ. Истя а ён тензэ ульнесь.
Мон малав кеветеешка иеть, кода туинь эрьзянь Кажовелестэм,
покштянь-сырькаень куломадост мейле, те шкань перть, эрьзянь ве валгак
кургстом эзь пракшно-лисне. Ды вана теть, истямонь васолонь-васолкссо,
мастор томбале, иневедь куншкасо эртевинь алкуксонь эрьзянь ломанень
марто! Тамашат!
Од ломанесь пштисэ вансь лангозом, учось, мезе мейле? Таго кевкстия эрьзякс:
- Эрьзякс парсте кортат?-
- Парсте-е… - аламодо валонь таргазь мерьсь цёрась каршом.
Лия эрявикс кевкстематнень монень ульнесь пек стака ёвтамс эрьзянь
кельсэ. Секс седе тов карминь кевкстнемензэ рускс. Цёранть марто
кортамонок-басямонок лия венчушмантнэнь коряс лиссь седе кувака. Паро
мельсэ кунсолынь сонзэ ёвтнеманзо. Косто саевсть эрьзятне Армения
масторс? Косо сынь тосо эрить? Кодамо кельсэ кортыть? Эрьзякс?
Армянокс? Рускс? Зярдо, кодамо шкатнестэ эрьзятне тов
пачкодсть-понгсть? Теде весемеде мон марсинь эрямостом васенцеде.
Эрьзянь цёранть аравтынек боцманонь венч ушмопельксэс. Ютасть зярыя
чить. Мон эвтинь эрьвачинь тевсэм. Тень пингстэ мельстэм эзия кадно те
цёранть. Ванынь, кода моли-юты сонзэ иневенчсэ эрямонтень тонадомазо,
кодамо мельсэ сон кунды тензэ максозь тевтнес. Алясь печтясь иневенч
лангонь урендемань васенце стакачитнень шождасто, тусь прявт боцманонть
ды од ялганзо мельс.
Зярыяксть таго нурькинестэ кортнинь
мартонзо. Сон ёвлесь тень, чачома велезэ сравтовсь Севан содавикс покш
эрькенть мазый чирева, покш пандалга. Велесэнть эрить сеть эрьзятне,
конат кавто-колмо пингешкадо теде икеле, эсь пазнэнь кемеманть кис ды
аурексчинть кис туреме кепсемевадонть мейле, панезельть Эрьзянь
Масторсто, эсь велестэст-сядостост, ды кармавтозельть туеме мик Кавказ
панднэнь томбалев. Армянтнэ, конат сынсь а весть печтякшность эрямо
кист перть аволь вейке лепштямо-тапамо ды пансема, паро мельсэ вастызь
зярс тест а содавикс «эрза» раськень ломантнень. Явсть эрьзятненень
кудонь-кардазонь путома ды сокамо-видема модат, лездасть од
эрицятненень а куломс вачодо ды стямс пильге лангс те од эрямо
таркасонть. Од эрийтне кармасть калонь кундамояк.
Эрьзятне,
конатнень эсь масторсост ламот те шкаскак ловить «чопода», эрямостонть
удалов кадовозь раськекс, тесэ курок тонадсть армянонь кельскак. Теке
марто, эсь од Шоржа велесэнть, эсь юткова нейгак кортыть ванькс эрьзянь
кельсэ, седе ламо ансяк эрьзякс.
Мон кунсолынь цёранть ды
абунгалинь, кода ваньксстэ, тунь покштянь ладсо-лувсо, корты эрьзякс те
од эрьзянь цёрась. Сестэ, сеть кортамотнестэ, теевсь тень та-кода
аламодо виськс икелензэ. Сон корты мартом эрьзякс, мон каршонзо –
рускс,.. Сон – эрьзякс, мон яла рускс… Лисни, эзинь маряяк-редяяк, кода
тунь стувтыя тиринь эрьзянь келем… Кода истя истямос пачкодинь? Кода
ёмавтыя те пикскенть, кона сюлми эйсэм покштям-сырькаем марто, эрьзя
раськем марто?... Вай-вай… Мезес пачкодинь, мик эсь мелем-арсемам ды
ёжомарямом тиринь эрьзянь кельсэм монень а ёвтавить? Валомгак эрьзякс
кортамсто превсэм а сатныть? Келемгак кургсом эрьзякс а велявтневи?...
Мон арсян теде, зярдо цёрась икелем апак капша, стамбаро, сэтьме эчкела
вайгелсэ шождасто певерди валонь вал, шкань-шкань пштистэ варштни
сельмезэм, чарькодян-арась эйсэнзэ? Чарькодемс мон чарькодинь, ансяк
шождасто кортамо эрьзякс тунь эзинь машто…
Зяро кувака ды
нурькине иеть ютасть те шкас пря велькскам теде мейле… Ансяк нейгак,
зярдо ледстяса те васолонь васодеманть, виськс тень тейневи.
Эрьзямасонь Олёнадояк, те ине эрзянь авадонть, кона путызе эсь эрямонзо
эрьзя раськень аурескчинзэ кис, васенцеде карминь содамо те од
ломаненть, Юртай Ванёнь пельде. Истя тензэ мерильть тиринь эрьзянь
велесэнзэ. Сонензэ Олёнадо эсь ёнкссонзо васол сырькаезэ.
Кие
соды, улема, неть Армениянь эрьзятнень покштяст Олёнань ушмонзо ютксо?
Кие ней теде соды? Маряви, кияк… Течимс минек эрьзя раськенть эрямо
кинзэ кияк парсте эзизе тенек панжо. Паряк, истят ломанть ютксонок эзть
шачо…
Продолжение следует Эрюш Вежай. К А Р Г О.
|
| Категория: Мои статьи | Добавил: tati (07.01.2010)
|
| Просмотров: 1168
| Рейтинг: 0.0/0 |
|
|
|
