— Медесь, цёрынем, эряви ранязь солдатнэнень. Нейке эряви, аволь ванды. Пелемс а эряви.— Менчезь кияванть улавтнэ чикордозь совасть райононь базантень. Серьгатя састыне эскельдясь конторань поровтонть трокс. Цёрынетне кувать учость ды эсь ютковаст кортнесть:

— Кода   арсят,   покштянь   нолдасызь   кудов? — мерсь Вася.

— Минекак   аволимизь   кадо   сонзэ   марто.   Кие минек лишметнень кудов сестэ ветясынзе? — ризнэсь Дригине.

Окойники конторань кенкшесь панжовсь ды кавтов мендязь конёв марто лиссь Серьгатя. Чамазо ульнесь конёвонть кондямо, ашо.

—      Покштяй, мезе?

Серьгатя чатьмонсь. Сон вансь Дригинень сельмс ды тошкась:

—      Мекс  эзитинь  кунсоло?  Ней  следовательнень тердимизь.

Вася нардтнесь начко сельмензэ.

Нурькине шкань ютазь сась Пшти пандо велев следователь.

Те ломанесь искувась ды кевкстнесь Серьгатянь шабратнень:

- Кодамо ломанесь Бурнаев пчеловодось?

Оря баба варштась искувицянть лангс ды мерсь:

— Бурнаев   алкуксонь   азор   ды   тевензэ   содасы, теке паз.

— Тонь марто а раксить, бабай, ёвтак, мезть тонь кевкстнить! — рангстась следователесь.

Оря баба тунь эзь пеле те од ломанденть ды секс згилязь мерсь:

—      Тон, цёрыне, иля рангстне. Мон тондеть икеле чачинь ды истятнэнь, кодамат тон, удалксост шлякшнынь. Ней мон тонь кевксттян: мекс тон а тюрят немецтнень каршо? Кие кучинзеть атятнень ды пакшатнень мельга ардтнеме, шайтян?!

Оря бабань икельде следователесь ношкстась, теке апак тонавто наракш вашо, ды сась председателентень.

—      Мон   Бурнаевень   «тевенть»   кувалт,— поровт лангсто серьгедсь сыцясь.

Колхозонь прявтось кевкстсь:

—      Мекс тынь, следователь ялгай, а кемтядо Бурнаевнень   ды   эйкакштнэнень?   Сынь   а   кенгелить.

— Тыньгак  сынст  каршо  вейс  прыде!  Ней войнань шка! — онгозевсь од ломанесь.

— Тынь монень илядо ёвтне, кодамо ней шкась. Мон войнань качамосо лексинь ды ялатеке энялдан, уледе   ломанькс,   лоткавтынк   те   стяконь   чумондоманть. Атясь тунь а чумо. Сон сядо парть медь пурны.   Илинк   судя   ломаненть.    Инеськеть,   тердинк атянть тей ды монь пингстэ таго кевкстнинк!

— Сонзэ а мезть кевкстнемс. Те ломанесь ёмавтсь государствань  ули-паро.   Кадык  лият  несызь,   мезе эрси азортомочинть кисэ.

Ковонь ютазь Серьгатянь пекстызь тюрьмас. Нусмакадсь Вася, тонавтнеме кармась беряньстэ. Школасо згилясть, лемдизь «Медень овтынекс».

Вася лоткась школав сакшномо. Дригине эрьва чистэ чииль оянстэнь, ёвтнесь, мезе сынь ютасть.

— Вася, иля ацирьгале чавола пакшатнень лангс, кадык лабордыть. Тон содат, лиятнеяк содыть — покштят   а   чумо.   Учительницась   кортась   мартонок Серьга покштянь стяко чумондомадонть,— оймавтсь оянзо Дригине.

— Ёвтак  Ольга  Петровнанень,   ванды  сан  школав,— укстась Вася.

-        Нейке   ёвтан,— серьгедсь  Дригине  ды   ношкстась сыре учительницантень, кона меельце шкасто свал сэредсь ды ялатеке тонавтсь.

Серьгатянь пекстамодо мейле нешке пиресь кадовсь азортомо. Омбо велестэ кучнесть ломань, кона беряньстэ вансь мекштнень мельга. Телесь якшамоль, беряньстэ пурназь ды андозь мекштне эзть цидярдо. Ламо мекшень семиятне кулость вачочиденть.

«Бурнай Серьга эряви нельгемс тюрьмасто. Лома­несь тунь а чумо»,— арсесь колхозонь прявтось. Истямо мель-арсема марто Степан Егорович пурнась Самара ошов, косо, кода марясь, ней эрясь Калинин ялгась.

Туемстэ бухгалтерэнтень кармавтсь:

-        Кие кевкстянзат, мерть: «Базаров тусь».
Колмо чинь ютазь Степан Егорович велявтсь ошсто. Сон паро мельсэ вастовсъ колхозниктнень марто ды витькстась:

—      Якинь ошов, Серьгатянь идеме. Калинин ялгантень хоть эзимизь нолда, ансяк кунсолымизь ды алтасть лездамо.

Кизэнь куншкат велявтсь Серьгатя чачома велезэнзэ. Теке мекшень семия, пурнавсть сонзэ кудонть перька шабратне. Сыре ломантне каштмольсть, пакшатне пижнесть: «Серьга покштясь сась! Ней таго медте каванясамизь!»

Аватне рангозь шумбракстнесть Серьгатя марто. Бабинетне крёстнесть мештест ды сюконякшность атянть икеле. Атятне апак корта сювордасть Серьг­атянь пуворьксэв кеденть. Серьгатя аштесь ломантнень икеле коцтонь ашо панарсо, теке локсей, кона менсь оляс.

Степан Егорович совась Серьгатянь кардазов сестэ, зярдо весе шабратне аштесть атянть перька. Валонь апак ёвта, ломанень кирьксэсь явовсь, теевсь ки, конань народось максызе неть ломантнень туртов.

—      Сергей  Николаевич!  Пачкодить! — аволь  гайтевстэ мерсь председателесь ды кеместэ кутмордызе Серьгатянь келей лавтовтнень.

Секе чокшнестэнть сась Серьгатя нешке пирев. Цепс понгавтозь покш кискась сеск содызе азоронзо. Сон весе вийсэнзэ ноцковтызе кальдердиця цепенть, кона эзь цидярдо — сезевсь. Кискась прок ломань стясь ды путынзе икельце пильгензэ Серьгатянь лавтовс. Серьгатя озась пекшетнень ало эзементь лангс ды вансь, мезе кадовсь сонзэ нешке пирентень. Чуросто путнезь кудынетнень велькска атясь варштась Бурнай пандонть лангс. Пандонь тёкшонть перька велясь кавал. Кизэнь чокшнесь а неявикс кедьсэ кутмордызе Серьгатянь санов рунгонтъ. Атясь шождынестэ укстась ды стясь, сон марясь прянзо аванзо элесэ вишкине пакшакс.