ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Числав Журавлев. БУРНАЙ СЕРЬГА

БУРНАЙ СЕРЬГА

 

Бурнай пандонть ало эрзянь а покшке велесь эрясь сэтьме эрямосо. Пелеве ёнксонь варматне эзть вачкое олгсо вельтязь кудынетнень. Даволтнэ вешкезь ютыльть велиненть велькска пек верьга ды прыльть Кинельча леенть томбале паксятнень лангс. Бурнай пандось теке виев покштя эсензэ келей лавтовтнень ало ванстась веленть. Обед ёндо веленть пева чии Кинельча леесь. Тосо стявтозь ведьгевесь яжась чинек-венек, сон ульнесь сех вечкевикс тар­какс, косо ломантне вастневкшнесть лия велестэ сыцятнень марто. Тесэ сынь ёвтнесть кулят ды кортнесть эсест эрямодонть.

Омбоце вечкевикс таркакс ловсть тесэнь эрицятне колхозонь нешке пиренть, косо важодсь Бурнай Серьга. Сонзэ покштянзо покштясь ушодызе Пшти Пандо велесэ эрямонть. Ломантне умок лемдизь ве­ленть велькссэ сэрей пандонть Бурнай пандокс. Велентень лем макссь сонсь васенце эрицясь.

Бурнай атянь кудось, теке цянавонь пизэ, уль­несь педявтозь пандонть алдо чавиця лисьмапрянть ваксс. Ней ансяк кудо юртось ёвтни, кодамоль сон. Юртонь кевтне порксазь пря ловажакс ашолдыть коськезь умарь чувтнэнь алга.

Медень пурнамонь коряс Бурнай Серьгань нешке пиресь ульнесь васенце таркасо Самарской областень мекшень тевень ветицятнень ютксо.

Войнась, теке раужо нал, совась велень эрьва эрицянть седейс. Цёратне вейкень пес саезельть фронтов.

Нусмакадсь Пшти Пандо велесь.

     Покштяй,   цела  ков  эзинек  седя,   паряк, урневтьсынек гитаранть ды балалайканть? — пшкадсь весть Серьгатянень Вася нуцьказо.

Серьгатя укстась ды мерсь:

      Эно кандыть седямонь кедьёнкстнэнь ды ладсесынек.   Ломанде   визькс   истямо   шкасто   концерт тейнемс.

Гитарась Серьгатянь кедьсэ укстнесь, теке эчке вайгель цёра. Балалайкась човине вайгельсэ рангсь ты прок пеняцясь. Покштят-нуцькат аштесть, се­дясть мезе-бути талновтыця.

Аволь васоло, лей чирева, вансть стада Дригатя Дригине нуцьканзо марто. Сынь панизь скалонь стаданть нешке пиренть малав, кунсолость, кода седить.

      Бурнайтне, Дригине, оймест путыть седямонтень. Миньгак, левкскем, невтьсынек эсенек  вайгеленек, - мерсь Дригатя.

Скалонь сюрос тонгозь нудейтне аварьгадсь, морось кандсь седеень эждиця лембе.

Бурнайтне састь леенть чирес ды озасть сэрей берёконть лангс. Нудеень, гитарань ды балалайкань вайгельтне ливтясть леенть кувалт ды човорявсть цецясо качадыця коштонть марто.

Атятне куроксто путызь элезэст седямо кедьёнксост, ней седясть ансяк цёрынетне. Сынь мельспаросо вансть нуцькатнень лангс ды несть эсь од пораст.

Дригине сэрей коня ды келей лавтов. Вася, теке сонсь Бурнай, раужо прячерь ды кудряв. Эрьва нуцькась мольсь эсензэ покштянть ёнов.

      Вант, Дригатя, кодат алят сайсызь минек тевтнень  ды  моротнень,— ёвтызе  арсеманзо  Серьгатя.

Се кизэнть парсте цветясть пекшетне ды чиньжарамотне,  цецясо ацазель виресь ды лугась. Медесь таштавсь ламо. Райононь базав медень ускомо сыргась сонсь Бурнай Серьга. Лездамо саинзе Васянь ды  Дригинень.   Сынь   колмо   крандазсо   лиссть   велестэнть. Икельце лишменть ветясь Серьгатя, куншкасо ардсь Дригине, меельце улавсонть кавто медь партнень марто пансь лишменть Вася. Колоньгемень вайгельбетнень сынь ютызь чинь куншкат. Чугункань кинть печтямсто Серьгатя валгсь крандазстонть, саизе лишменть   панст   вельде.   Дригинеяк эскелясь икельце  крандазонть  мельга.   Вася  эзь  валго  улавонть лангсто, сон вансь сыця поездэнть лангс. Паровозось вешкезевсь. Лишметне стясть удалце пильге лангс ды снартнесть велявтомо. Васянь лишмесь одоль, секс пурдамсто натой прась. Крандазось чиремсь, партнестэ медесь валовсь. Вася прянь нолдазь аштесь партнень велькссэ ды ниреждсь.

Качамосо яхоезь, паровозось усксь брезентсэ копачазь пушкат, машинат, танкат. Дригине васенцеде несь поезд, секс эзь вано, мезе лиссь, сонзэ меленть пушкатне ды танкатне салызь.

Серьгатя те шкане ладсесь нуцьканть:

-        Иля аварде, цёрынем, аволь тон чумось. Эстень эряволь од лишмесь ветямс. Оймак,—ладсесь атясь нуцьканзо.

Дригинеяк мейле пшкадсь:

-   Иля ранго,  ванок,  Серьгатя тонь мик сурсо эзинзеть тока. Монень истямо тевень кис кшнан локшо невтевельть.

-   Покштяй, ней тонь судятадызь? Зяро медь валынь!

-   Паряк, а пачкодян истямо тевс. Паряк, чарькодьсамизь...


Продолжение

Категория: Мои статьи | Добавил: tati (23.04.2010)
Просмотров: 680 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz