УРЬВАКСТОМАНЬ ЯКАВТНЕМАТ

Роман Акимыч Кукушкин кадовсь эрий ялгавтомо. Мелят Анфиса низэ кулось алецявиця ормадо. Лариса тейтерезэ геологиянь институтто мейле тусь васоло Якутияв сырнень вешнеме. Сырне мусь-эзь, а вана сюпав мирде цопадсь эстензэ: приискень директоронть семиясто явовтызе. Кудов Лариса а велявты —   керязь пал, мерть. Тейтерьавась пек вечксь мазыйстэ наряжамо, питней машинасо ардтнеме.

Роман Акимычень лиясто мештень истямо потиця ризкс стардтнилизе — куш верьгизэкс урнок! «Эряви урьвакстомс», — шекшата ладсо карась пряудементь секе бажамось. Карамс карась, ды Роман Акимыч од нинь вешнеме эзь тонадо. Анфиса марто инжекс эзть яксе, сынськак киньгак эзть тердтне. Сыльть статуправлениясто, косо коське цифрат пурнакшность, пештилизь пекест — ды телевизоронь ваномо. Весе пингест истя ютась.

Покш квартираванть мекев-васов яксемстэ Кукушкин, теке картасо, сеть мирдевтеме аватнень чевелясь, конат кедензэ ало пенсияв туемазонзо важодсть. Конаськак мелезэнзэ эзь тукшно. А стяко, нать, кортави: мезесь седейс а педякшны, сень эйстэ налкставкшнат. Сонзэ мартояк лиссь текесь. Ды тесэ пилезэнзэ прок тошказевсть: «Санаториянсетнень стувтыть!» Роман Аки­мыч теке стака ондо явовсь. Кепедизе диванонть, алонзо кирдевсть ташто кемть-котат, тов Анфиса зярдояк эзь варштне, — таргизе дратвасо сюлмсезь конёвонь тапарксонть. Калавтызе — икелензэ пельсядошка сёрмат чукадевсть. Косто ансяк сынь эзть сакшно, неть сёлмов пачтямкатне — масторонь картастонть зяро ошт а муят. Талайс Роман Акимыч чатьмонезь аштесь сынст велькссэ, арсесь-ледстнесь. Сёрматнень сонзэ лемс кучныльть почтав, нидензэ салава эйсэст сайниль. Истя жо салава ловнылинзе ды кекшилинзе секе тапарксонтень. Зярдо, чарькодеви, кудос ськамонзо кадновиль.

Сёрматнень кучность вечкевикс аванзо. Санаторияв сон яксиль эрьва иестэ ды свал ськамонзо. Гастритэсь эйсэнзэ а истя пек майсевтсь, кудосояк лецявлизе, ды икелень профсоюзтнэ кеместэ ванстасть ломантнень шумбрачист. Питневтеме путёвкат весенень макснесть, ансяк мелеть улезэ ардомс. А уш санаториясо оймсиця аватне, прок карвотне медьс, сынсь кайсевильть кирьгазот. Ды мейс Роман Акимычень мельга а пансемс?! Сестэ сон ульнесь сэрей ды кудряв, те ней прязо теке валаня оска ды рунгскак сон алкиньгадсь. Теке басом, икеле сон маштыль аватнень мельга яксеме, а стяко сельме удалга тензэ Донжуан мерильть. Ды, кода а кода, статуправлениянь прявт ульнесь...

Кукушкин панжизе кедь алов понгозь васень сёрманть, кармась ловномонзо.

«Сюк теть, Рома-Ромочка! Мои таго теть пачтян секеденть: мартот вастовоматнень вельде течис шожда онт некшнян. Оякс-чинек ульнесь ванькстэ ванькс. Се берянесь — вармадо бойкасто ливтясть вирьга яксемань недлянок.

Вейсэнь фотографиянок лиссь пек парсте, казнеть — чувтонь шкатулканть — сельмень икеле кирдян. Ледстнек мондень, вечкевиксэм, чистэ ледстнек!

Зярдо тошнакадат, сёрмадт. Тонь   Тома-Томочкат».

«Эзить маняво, ояксчинть эзинек кольстя. А вана ладятано-арась удома таркасонть? Вечкемась тештетнень ванкшномасто ушодовкшны ды вельтявкс ало прялеви, — верьга вайгельть пейдезевсь Кукушкин. — Тон, Омск ошонь тонавтыця, никс а маштоват—пек уш прят эйсэ ванстыть. Эряткак васоло — пенсиям лангс Сибиресь тень а сасави!»

Омбоце сёрманть панжизе.

«Шумбрат-парт, Роман, Пазонь казевть ломанем! Тонь марто палсематне турван лангсо нейгак палыть. Сюк сень кисэ — те светэнть лангс чачить! Кеман, зярдояк мекев се кадозь кудынентень соватано, косо мартот ульнинек! Тонеть стихтъ сёрмадынь, ловныть, инеськеть! Вана сынь, сех           малавикс ломанем:

Вечкемасъ — кутморямонь   шка,

Сон  седейть валдомтни  чиньстямокс.

Кувака пингезэ, нурька —

Тень невтъсы ськамонзо эрямось...

Стихть Кукушкин а вечки, нетне, текень пес, кувакадо кувакат. Ловнызе ансяк сёрманть пензэ, конась тусь сонзэ мельс:

«Рома, понав мештезэть палатан! Чинек-венек карман сёрмат эйсэ учомо. Айгоронь од вийть теть ды кенярксов читъ! Ангелина».

Сёрмась токизе Роман Акимычень седеензэ. Сехте пек сон дивазевсь панжадо видькстамонтень. Санаториява Ангелина яксесь виздезь, прянзо ловсь пежетьс совазекс. А ней, несак... Конёвось весементь цидярдсы! Арсесь теде Кукушкин, ды се чопода весь тензэ ледстявсь, кода мазыйка аванть совавтнизе ошонть песэ чаво кудынентень. Ангелина сонсь повонзо юксинзе, кармась палсемензэ-кутморямонзо.

—      Чиявтомонзо   сырган! — кирнявтсь   столенть   экшстэ   Ку­кушкин.

Ангелина эрясь Рязань ош маласо, тов ардомс а кувать. Кизэнь валскестэнть сон валгсь Сасова станциянтень. Ютась пиземе, ды асфальтось пачалгокс цитнесь. Коштось ваньксэль, лек­семе ульнесь шожда. «А мезе, бути лия таркав тусь эрямо? — арсезевсь Роман Акимыч. — Комсь иеть ютасть — шкась а нурька. Эриндеряй теске, мирдезэ узере марто лангозон а каяви?.. Курортсо Ангелина кортась: мартонзо курок яви, судс уш конёв, келя, кандсь. Арази аватненень кармат кемеме, зярдо ме­лест чизэнзэ ветексть полавтнить?»

...Крильця лангс лиссь эчке, олазь халатсо ава. Кукушкин сэтьместэ пшкадсь:

— Монень бу Ангелина Васильевнань.

— Те мон...

«Вай, Инешки-Верепаз, парь пекесь самай се Ангелина-ангелнэсь, кона цеця ёнов мольсь?» — апаркстомсь Роман.

—      Рома,  эзимик сода?

Кукушкин эзь карма манчеме, видьстэ чамас ёвтась:

—  Эзитинь. Пек уш полавтовить...

— Иетне,   Рома,   эсестсенть  сайнить.   Эсетькак  веенст  сэнь сельметь кадовсть. Бути сыть, адя инжекс совак!

Квартирась кавто нупальс, апокшке. Кухнясь пар потсоль — плита лангсо лакась ведра ведь. Тоско жо, карьке ланга, понгавтнезь эйкакшонь понкскеть-панарнэть. Квартирась пси ведтеме, секень вант, кельментькак колонкасто кандтнить.

Икельце нупальсэнть, ков Роман Акимычень совавтызь, кедьсэ теевть шкап, эйкакшонь кавто таркинеть, столь ды ташто диван. Ангелина озавтызе инженть диван лангс, сень пружинатне чикоргадсть. Сонськак озась инженть ваксе.

—      Эйсэть эзинь учне, Рома... А сёрмат пельдеть, а телеграмма...— Кудазоравась вансь Кукушкинэнь чамас виздезь, теке тона чачтомсто стардызе. Ды сеске кармась эсь уцяскадонть ёвтнеме: — Мирдем вете иеть кода калмия. Симсь пек... Эрян Лида тейтерем ды Вася цёрам марто. Кавто нуцькан. Ней сынь эйдень кужосот, тейтерем тосо воспитательницакс роботы. Мирдезэ тюрьган, эйстэнзэ оргодсь. Вася апак урьваксто, Московсо...

Кукушкин кунсолось аванть мельтеме, арсесь седе, кода курортонь «одирьвазо» лиякстомсь. Черензэ невельсть, чамазо сормсевкссэ керсезь, улозо кирьгантень педясь. Эрьва чинь муськематнеде ашолгадозь суронзо ней талномадонть сорность.

— Мон мезеяк ярсамс анокстан, — Ангелина кепедизе стака рунгонзо, диванось таго лакоргадсь.

— Мон   а   вачодан.   Бути   ансяк   чайне... — стакасто   укстазевсь Кукушкин.

Ангелина пурнызе столенть, совась омбоце нупалентень. Ку­рок лиссь тосто наряжазь. Лангсонзо ашо костюм, пря касмос пурназь чуро чертнесэ цитнесь чочамка.

—      Те тонь казнесь... — невтсь прянзо лангс.

Роман Акимыч чатьмонезь таргась портфельстэнзэ вина, кон­фетка марто покш коробка.

—      Ды  нетнень а эряволь... — визделгадсь Ангелина. — Зяро иеть эйсэнь эзить каваня, ней кода-бути уш а ладияк...

Колмоце цяркадонть мейле, зярдо авась оймазевсь, Роман Акимыч ушодсь эсь эрямодонзо ёвтнеме. Мейле мерсь, мезень кувалма сась, ды путызе кедензэ Ангелинань кумажа лангс.

— Эрямо   карматано   нужачинь  апак  сода.   Пенсиям   покш, таштазь ярмаконгак улить, — прядызе  сон  «чиявтомань»   тевензэ. — Тон эдь а сырят, мелят ансяк ведьгемень теть топодсть.

—  Тевесь а теньсэ,  Роман.  Бути  санаториясо  тердевлимик,
мартот масторонь томбалев ливтявлинь. Ней кавто нуцькат кедь
лангсон.   Сынь — монь   крестом  ды   часиям,   куломазон   карман
васькавтнемест. Простямак, истямо уш уцяскам...