МАСТОРАВА. Кезэрень пинге. Колмоце евтамо. Од коень-илань касома. СУРАЛЯ. Продолжение 2 в начало
Озась Сураля Тумоатякш лангс.
Тумоатякшось менельс кепететсь.
Истяня верьга тусь сон ливтямо —
Вант, чиськак прязост карми токшеме.
Кевкстни Суралянь Тумоатякшось:
— Неят мезеяк?
— Неян ансяк ведь.
Сон сиякс цитни, сокоргадсть сельмем.
Неть валтнэнь марязь, Тумоатякшось
Рунгонзо лангсто алов ертызе
Стака канстонзо, виев Суралянь.
Прамсто Сураля тандадсь куломас,
Мик седеезэ токномсто лоткась.
Зярс алов ливтясь, сон а содасы.
Ежовтомо сон ульнесь
се шкасто,
Зярдо ведентень
тензэ совамаль.
Сестэ Атякшось
сонзэ кундызе.
Мекев кепететстъ
сынь менелентень.
Истя верьга ней
кармастъ ливтямо —
Пельтнеяк ало тунь
а неявить.
Тумоатякшось кевкстни
Суралянь:
— Пек тандадокшныть?
— Пек тандадокшнынь!
Арсинь, пе сась
тень, нежедсь куломам.
— Монгак
истяня, цера, тандадынь,
Зярдо седейзэнь сметязь нал неинь,
Зярдо кедезэть саик налчирькеть
Ды монь лангс сонзэ,
аля, кепедик,—
Мерсь Суралянень
Тумоатякшось
Ды тусь ливтямо
седеяк верьга,
Пельтнень юткова,
менель емамга.
Ваны Сураля
Мастораванть лангс.
Ней пшти кевень
пандт ало неявить.
Таго атякшось сонзэ
кевкстизе:
— Неят мезеяк?
— Неян кевень пандт.
Пандтнэнь юткова отьмат рауждыть.
Тумоатякшось таго сорновтовсь.
Таго Сураля пултокс пры алов,
Ливти кевтнень лангс, домка отьматнес,
«Ней, лисни, кулан!» — арси Сураля.
Ансяк нейгак сон эрике кадовкшнось.
Таго Атякшось сонзэ кундызе
Ды тусь ливтямо
седеяк верьга.
Сонсь эждиця чись
кадовсь сынст ало.
Таго Атякшось
кевкстни Суралянь:
— Пек тандадыть тон, паро Сураля?
— Зярдояк истя эзинь тандале.
Ежомгак маштнесь, седеем лотксесь.
— Вана истяня монгак тандалинь,
Ежом ды превем, од цера, маштнесть,
Зярдо тон налонть седейзэнь сметик,
Зярдо лангозон чирькенть кепедик,—
Мерсь Суралянень Тумоатякшось
Ды тусь ливтямо сон,
кода давол.
Вана кирвитол ало
неяви.
Таго Атякшось
Суралянь кевкстни:
— Неят
мезеяк?
— Неян кирвитол.
Весе масторонть келес сравтовсь сон,
Мик менелентень токить кельбрянзо.
Тумоатякшось таго сорновтовсь,
Церанть ертызе селмонзо лангсто.
Сураля алов менеленть пачк пры,
Тештнеде верде ливти толонть потс.
«Колмоцеде пран, ней, нама, еман!»—
Арси тардезь сон, учи кулома.
Ансяк нейгак сон эрикс кадовкшнось.
Колмоцедеяк Тумоатякшось
Покш толонть потсто сонзэ кундызе
Ды кепедизе мекев менелев.
Таго валдо чись ало кадовкшнось.
Тумоатякшось кевкстни Суралянь:
—
Пек тандалить ней, ежов Сураля?
—
Зярдояк истя эзинь тандале.
Лоткась
седеем, прясо превем маштсть.
«Колмоцеде пран, ней, нама, еман!»
—
Арсезевинь мон тол потс совамсто.
—
Вана истяня монгак тандалинь,
Ежом ды
превем, Сураля, маштнесть,
Зярдо
налчирькеть колмоцеде тон
Кепедик-сметик
витьстэ седейзэнь. Продолжение следует
| 
