Начало

Пачкодсь вирь паксянтень. Тосо Промза вирь таго керси, уманзо келейгавты. Серьгедсь Овтось: «Тон манимик, эрзя! Тонь верькстнэ ярсамс а маштовить! Ней ковгак а туят эйстэм. Сэвтян». Оймавтызе цёрась. Келя, тонсь саить эстеть «верькстнэнь». Эрьга ней тонеть «алкстнэнь» макссынь. Овтось таго каршо эзь моле.

Сокизь паксянть, ды ёжов Промза видсь тозонь товзюро. Кизэсь пароль, лембель ды пиземевель. Курок сюротне пиже эрькекс сравтовсть. Ношка прев Овто кенярды: «Кодат човинеть верькстнэ. Мезень лезэ эйстэст эрзя ломанентень? Улема, алкстнэ седе покшт. Ней а маняван». Сонсь вансты паксянть идем тувотнеде, нармунтнеде.

Сась нуемалангось. Промза нуизе товзюронть ды ускизе велев. Олгтнэньгак эзинзе стувто. Ушодсь Овтось мода потсо сокарямо — сатотсть тензэ ансяк човине ундокстнэ, мезекскак а маштовить. Кандтнинзе Овтось эсь пизэзэнзэ ды мадсь.

Промза телень перть мельспаросо кши пансь, пачалкседе ярсась. Овтонть пизэсэнзэ ундокстнэ наксадсть ды куштасть. Тунда сон лиссь седеяк вачо ды кежей. Кармась ёжов эрзянть эйсэ учомо. Содась, сон ялатеке сы, паксянзо апак виде а кадсы.

Учовсь.  Сась Промза паксянть варштамо.  Каявсь лангозонзо Овтось:

—     Кавксть манимик, эрзя. Ней а кеман валозот, сэвтян.

—Паро. Чуман икелеть. Ансяк кудозом алашась кадовсь. Сэвсамак, сон стяко ёми. Седе паро ули, тонеть максса. Нолдамак валскес кудов.  Валске марто алашасо теть сан.

—Паро. Азе. Ансяк а сындерят валске марто, монсь велев сырган. Эйстэм а оргодят.

Нуваргадозь моли цёрась кудов, эль пильгензэ уски мельганзо. Арси, кода менемс апародонть. Каршонзо лиссь тюжа кенгелькай — Ривезь.

—Мекс истямат нусманят, эрзянь цёра?

—Кода а нусмакадат — валске марто Овтось сэвсамам, — укстась Промза ды весементь ёвтнизе Ривезентень.

—Иля мелявто. Валске мар­то сак алашасо, мартот сайть сехте нардев пикс. Мон идетян.  Сень кисэ  максат тень атякшке. Пек вечксынь.

Валске марто Промза кильдсь алаша ды сыргась вирев. Мартонзо сайсь эчке кеме пикс ды атякшке. Пачкодсь. Овтось умок тосоль. Мельспаросо низелгавтынзе уропеензэ: «Сыть, манчигай. Нейке сэвтян». Ды каявиксэль лангозонзо. Те шкасто куракш потсто Ривезесь а эсь эчке казямо вайгельсэ рангстась:

—     Эрзя!  Тон мекс те чентязь мукоренть крандаз лангс кепедят? Нейке монсь лисян  ды яжаса!

Тандадсь  Овтось,   тошки салава:

—     Кепедемак седе куроксто крандаз лангс.

Промза  кепедиксэлизе -кодаяк а кепедеви. Овтось сонсь кузсь. Ривезесь таго ранги:

—     Эрзя!  Тон мекс те чентязь мукоренть крандазонтен а сюлмасак?

Овтось тошки:

—     Ёртык лангозом пиксэнть, невтик, прок сюлмимик.

Цёрась кеместэ сюлмизе крандазонтень. Ривезесь таго ранги:

—     Эрзя! Тон мекс те чентязь мукоренть узерьсэ а керсят?

Овтось тошки:

—     Вачкодемак састыне ношка песэ.

Промза мезе вийть вачкодизе Овтонть пря ланга. Тона венемсь тарказонзо. Ривезесь лиссь куракш потсто:

—     Косо алтазь атякшось?
Тененьгак сатотсь узерьсэ. Илязо эцне а эсь тевезэнзэ.

сэ, свал эряма видечинь коряс, киньгак апак манче ды апак тандавтне. А стяко эрзятне кортыть: ломань пильгалов ведь валат — тонсь ваят.