Сёксень ёвкс

А неявикс гривасонзо яходсь

Кежей вармась сэтьме виренть лангс,

Мейле латконь куракштнэнень васодсь,

Тостояк мик ноцковтсь сиянь панкс.

Теке азарсь айгор чарась-велясь

Кужотнева ды покш вирев ардсь,

Косо тумонь эйдесь – сырнень сэрясь,

Тарад песэ нурякстнемстэ тардсь.

Эзь правтово даволонтень сэрясь –

Чувтось парсте пакшинензэ кирдсь.

Ушось кежиявтнесь – велесь эрясь,

Паро азор алашине кильдсь.

Ды стамбарнэ сыргась сэря мельга,

Улавсонзо ленгелутконь парь.

Сёксень чачо: нармунть ливтить верьга,

Моданть элес певери янтарь,

Утомс сюрот пешти минек ёнксось,

Ташты сэрят, кази пангт ды пештть…

Паряк, тесэ чачсь сех мазый ёвксось,

Косо кортыть: «Мезе мелеть вешть…»