Отзыв на статью Т.М.Ковалёвой "Тынь кортатадо эрзякс?"

Тиринь кельде мельть-арсемат

Ковдо теде икеле сынь Финляндиясто, ков якинь церам туртов инжекс. Сон тов кучозь важодеме. Мелят, васенцеде молемстэнь, пек талнынь масторонть келенть-лувонть а содамонзо кувалма. Туеме анокстамстон ловнынь масторонть историядонзо, культурадонзо, неень шкань тевдензэ. Раминь «разговорник» косто снартнинь тонавтнемс койсэнь сехте эрявикс зярыя валрисьметь.

Ней, омбоцеде сыргамстон, истя уш эзинь тално. Содынь, сехте покш тевекс тень карми нуцькинень ваномась. Энялдомань, лезксэнь вешемань валрисьметнень (кенкшень кирдемадро, крандазкень кепедемадо, рамамсто эрявиксэнть кевкстемадо, эседень кой-мезень евтамодо) тевс нолдтнемс а савить – тосо весемесь арсевтезь-ладязь ломантнень туртов педе-пев. Васов, покш тевс ськамон а нолдасамизь – кисэнь весементь толковасызь церам, важодиця ялганзо, урьвам. Секс эзинь сае мартон валкс, эзинь одкстомто финнэнь келень «содамочинь».

Ды понгинь…

Ливтьса нуцькинем ушов, сон эйкакшонь кельсэнзэ лапаксы, уски кискань ветниця азортнэнь юткс, сырги налксиця эйкакштнень ваксс. Ломантне снартнить мартонзо налксемс, калярдовольть. Минь, сырькайть-нуцькат каршост каштмольтяно. Сон – кортамо эште а маштоманзо, мон – асодамочинь коряс. Марявсь, мик жалязь лангозонок ушодыть ваномо. Монськак кунсоломстост а чарькодян – каня шныть, каня севныть. Куш ушовгак иля лисне.

Тесэ тердимизь инжекс. Монь, ськамон. Теде мейле весемесь полавтовсь. Идимим тиринь эрзянь келем. Сонзэ содамонть коряс таго мария пряс лезэвекс, эрявиксэкс ды… превеекс. Толковаса, мейсэ тевесь. Ули Библиянть масторлангонь весе кельтнесь ютавтомань Всемирной институт. Финно-угрань кельтнес ютавтомань институтонь пельксэсь Финляндиясо. Тосто ламо иень перть сакшныть ломанть Мордовиявгак. Ламот содыть, эрзякс нолдазь «Новый Заветэсь» (Од Вейсэнь лувось), ней анокстави Ташто Вейсэнь лувось. Ютазь иестэ теевинек содавиксэкс енонок сакшныця Риитта Пуукко марто. Хельсинкисэ улемстэнь гайневтинь тензэ, вастовинек. Риитта ломанесь чевте обуця, мелень ваныця, теизе весементь монень прям енсто марямонть туртов. Ялатеке ламоксть савсь эсь потмован кирдемс визькс ды апаро. Секс, мекс минь, эрзятне а ловтано питнеекс ды а вансттано покштянок-бабанок таштавкс ды тенек казезь сюпавчитнень – культуранок, коенек, келенек.

Рииттань квартирань икельце нупальсэнть пель стенань келес аштиця шкафось пештязь эрзянь книгасо – художественной произведеният, валкст, альбомт. Теке стенасонть, сехте неявикс таркасо понгавтозь карть, лавця лангсо чувтосто керсевкст, ленгестэ кодавкст, карьстэ ставкст. Сон тень весе пек вансты, тонавтни, нолдтни тевс, пря шны корязост тензэ сакшныцятнень икеле. Эськан тешкстыя:  визьксчамас а понгомга, Рииттань Мордовияв самонтень эрзянь книган монгак таргасынь сехте неявома лавцятнень лангс, «модной» таташкатнень таркас ладсесынь-понгавтсынь керсевкстнэнь-кодавкстнэнь. Аванзо умокто умонь кодавкс кружованть (кшнинь койка крайга икеле понгавтневиця подзортнэнь кондямосонть) мазылгавты паникудонь вальманзо. Аванзо  викшневксэсь саезь кундос ды понгавтозь стенас. Неень шкань диванонть-креслатнень песэ ашти артовкссо одкстомтозь покш горобия. Сонзэ, кода сельмс а каявиця стултнэнь, паникудосо диванонть теекшнинзе тетязо. Витькстатано, минь кодамо тарка явинек весе тенень?!

Институтонь офиссэ вастымизь азоравась Анита Лааксо. Рузокс ванькс кортамонзо кенярдозь ды дивазь кунсоломстонзо вановтом пезнавтовсь кенкшенть каршо стенансонть понгавтозь артовксонтень. Эйсэнзэ невтевиця кши-сал марто вастыця кавто тейтерь-аватнень эрзянь оршамопелест содынь сеске. Ансяк мезе-бути  пек малавикс кундынь чамастосткак.

– Ульнинек  Дубенкасо, тостонь фотографиятнестэ  теинек артовксонть, – толковизе Анита. Ваксозонок сась лия важодиця, омбоце, колмоце – весе пек парсте кортасть рузокс. Кевкстнесть, евтнесть, невтнесть. Мейле Риитта (тейтерь-авась парсте соды ламо кельть, ютксост минексеськак) марто кортавтымизь эрзякс – покш мельсэ кунсолость, кенярдозь тешкстасть финнэнь келентень малавикс валтнэнь. Сынь ламо содыть минек культурадонть, койтнеде, покш бажамост содамс седеяк ламо малавикс раськеденть. Вастовоманок таргавсь чокшнес, поладовсь омбоце, колмоце чистэяк. Эзть сода, кода тень савтомс, перькан велямсто весе тевест кадызь. Ды те весе ансяк секс, мекс мон – эрзянь раськестэ, истямо тенст малавикс, эрявикс, питнейдеяк питнеекс ды мазыйдеяк мазыекс лововикс – эрзянь  кельсэ кортыцян. Чарькодеви, монь прямгак веляськадсь покштояк покш каштанчиденть, мельспародонть весе эрзянсенть коряс.

Ансяк бу а манявтомс учомаст…

Финляндиясто самодон мейле кавто недлянь ютазь тердимизь тиринь Таразбуень школань ламо иеде икеле прядыцятнень вастовомантень. Шумбракстнемат, вейке-вейкень содамот, течинь тонавтницятнень вийсэ теевсть мазый концертэнь ванома… Мейле ветицясь те иестэ школанть прядыцясь пшкадсь покштнэнень энялдома марто евтнемс эрямонь кидест, путомс сынсткак превс уцяскань покш ки лангс эскельдямстост. Васенцекс вал максозель монень, кода сазетнестэ школанть сехте умок прядыцятнестэ вейкентень. Весе те евтазель рузокс.

– Тамашань тевть! – ушодынь мон. – Аламо, эрян Саранскойсэ, косо свал кортан эрзякс, аволь умок велявтынь Финляндиясто, косо ковонь перть кортынь тиринь кельсэнь финнтнэнь марто. Ней, чачомань лавсьсэнь, таразбуесэнь, кармавтадо кортамо рузокс?!

Залось раказевсь, цяпазевсь ды евтнематне ушодовсть эрзякс. Виде, кортыцятне ламо валтнэнь полавтсть рузонсетнесэ, кода уш тенст тонадовсь.

«Эрзянь правдань» январень 14-це номерсэнть печатазь Т.М.Ковалевань «Тынь кортатадо эрзякс?» покш статьязо. А карман одс евтнеме эйсэнзэ сермадозденть. Аволь секс, мекс эйстэнзэ газетань лопа. Сехте пек секс, мекс покш мелем –  кадык весе одс кепедьсызь те номерэнть ды педе пев ловносызь сермадовксонть. Ютавтсызь эрзянь келень а содыцятнененьгак. Эдь авторось ушодсь ине кортамо ламонь талновтыцядонть, ансяк толковамс малав а кепсевицядонть, а таргсевицядонть.

Монсь бу путовлия кедем эрьва мереманть алов. Васень строчкатнестэ саезь  «салымим»  авторонть мазый, ванькстэяк ванькс эрзянь кельсэ сермадомань лувось. Седе тов эрьва евтавксонть карминь онкстамо эсень лангсо. Видеяк, моньгак а весть покоримизь эрзякс марямга кортамом кисэ, зярдо эйстэнек а васоло ульнесть ава лемсэ верьга вайгельть севнцят. Ней жо эйзэнь а пецить – нать, марить истят «культурнойтне» вием сатыть сынст лоткавтомс. Пек талновтыть эйсэнь вейке келень теемадо снартнематнеяк – седе паро улевель ванстомс эрзянь ды мокшонь кельтнень башка-башка чарькодицятнень. Жаль марявить школасо, вузсо келень тонавтницятне сермадомань секе тев полавтневиця лувдонть майсемаст коряс. Седеяк пек, рузонь школатнесэ келенть снартнить тонавтневтемс ансяк факультатив вельде. Лия раськень эйкакштнень «весе мордовскойденть» седеест саемадонть башка те мезеяк а максы. «Программань частнэнь» а сатнеманть пингстэ келенть а токшема. Седе паро ули вишкинетнень теевтемс содавиксэкс культуранок, историянок марто. Оценкасо мелест апак кольстя.

Ламодо мезде кортамаль, ансяк кадык весементь арсевтьсызь тень туртов ладязь ломантне. Нама, эрзянь ды мокшонь кельтнесэ кортыцятнень, раськедест седеест ризнэвтыцятнень мелест кунсолозь.

Т.Рябова,

журналист, Мордовиянь культурань

заслуженной роботник.