 Винсент Ван Гог. Пара ботинок
СЁВНЫЦЯ
КОТАТ
Аволь умок Серёжа тонадсь
котань карсеме. Ней шнуркатнеяк тензэ парсте сюлмавить.
Авазо зярыяксть невтнизе тензэ, кода
эряви тень теемс. Васняяк Серёжанень марявсь: авазо шнуркатнень марто буто стяко котьми. Мейле весе
чарькодевсь. Мелезэнзэ паро. Ней сон эрьва валске
вешнилинзе котанзо ды сонсь карсилинзе. Вана
нейгак ансяк стясь, кевкстсь:
— Бабай, тон котан эзить нее?
— Кода
эно, рединь, — мазый тарелкас кашань каямсто кортась бабазо, — течи валске
каршон ульцява чийсть.
Серёжа ёжовсто варштась
бабанзо лангс ды пейдезевсь. Сон эзь
кеме бабанзо валтнэс. Секскак котатнень вешнеме кармась кудова. Сон парсте соды: котатне а маштыть ушова ськамост чийнеме. Сынст козонь каясыть, тоско аштить. Ансяк течи
котатне мекс-бути а муевить. Сестэ бодянзо
кевкстизе:
— А содат,
косот котан?
— Удыть косояк, — книгасто сельмень апак сае,
мерсь бодязо.
Серёжа арсезевсь. Удомо, нама, котатне
маштыть. Аштить сынь косояк диван ало
сэтьместэ-сэтьместэ ды удыть. Азорост овсе
арась мельсэст. Котатне седейтеметь, а марить Серёжань седейёжонзо. Апаркстомсь
цёрынесь. Эрьва кува вешнесь, косояк арасть.
Савсь кармавтомс вешнеме Дружоконь. Алкуксонь ялга сон. Ды вана нейгак
идизе оясь — муинзе котатнень ведра удалдо ды
кандынзе Серёжанень. Кенярдозевсь Серёжа. Вадяшизе Дружоконь ды кармась котатнень карсеме. Ансяк таго
тамаша: котатне велявтызь пряст
вейкест-вейкест эйстэ. Парсте а молевияк
Серёжа. Мекс-бути лепштявсть пильгесуронзо.
— Бабай,
те мезе мартост теевсь?
— Котат сёвнозевсть, — мерсь бабазо. — Несак,
вейкесь тей ваны, омбоцесь — тов.
Серёжа чарькодсь, кода
«сёвныця» котатнень мекев мирявтомс. Вить пильгстэ котанть
каизе ды карсизе кершентень, керш пильгенсенть —
витентень. Ды вана котатне таго варштасть вейкест-вейкест
лангс, прок мерят тошказевсть. | 
