НАРДТНИНЗЕ   КЕДЕНЗЭ

Эйкакштнень школав ильтемстэ минь пштистэ вантано, кие ды мезес сынст тосо тонавты. Тень пингстэ ламот васняяк саитъ мельс, зяро «вететъ», «нилетъ», лиясто мик «кавтот» тукшнытъ дневниксэст-тетрадкасост. Вант, сэренъ коряс кенерстъ тетяст-аваст икельдямо. Ялатеке сеедьстэ васенце таркас аравтовитъ школасо получазь отметкатне. Путсь тонавтыцясь цёранк эли тейтеренк кевкстемстэ аламо «баллт» — вай-вай-вай!'!'! Паряк, сонськак теньсэ чумо, беряньстэ толковизе? Ды малавгак аволь свал арсезевтяно: мезес лияс тонавты педагогось школав якицятненъ? Мезе сынь, тонавтницятне, саить пелъдензэ уроксо «ютазденть» башка?

Кодаяк а тукшны превстэнь ошонь вейке школасо апак учонь тевесь. Мольсь химиянь урок. Монсь, виде, тосо араселинь. Ансяк пек уш парсте ёвтнезель тень, мезе тосо лиссь. Ютазенть коряс тонавтыцясь, Нина Сергеевна, кевкстизе вейке цёранть — лемдьсынек сонзэ Толякс. Лиссь се Толясь столензэ зкшстэ, ёвтнемстэ сёрмадсь доскас мезе эряви ды вестъкак эзь «пупордя», мезень кис тензэ путозель «вете», Цёрась мелъспаросо сыргась тарказонзо озамо. Ютамсто лоткась лавшине, беряньстэ оршазь цёрыненть ваксс ды апак уча нардтнинзе поров кедензэ тонань мештезэнзэ-кутъмерезэнзэ. Классось општ тейсъ. Весе неизь, кода се цёракаесь, Ваня, та-кода рипакадсь, прязояк, лавтовонзояк новольсть..,

Весе учость, мезе мери тень каршо тонавтыцясь. Текененъ, сон аваль васенце ие сынст классонь прявт...

Нина Сергеевна, буто мезеяк эзь лисе, поладызе уроконть седе тов. Ёвтнизе од материалонть, кевкстсь, улитъ-арасть кевкстемат.

Тонавтницятне весе тень чарькодизь эсест ладсо: Толянъ авазо важоди райононь администрациясо, сови комиссиянтень, кона яви квартират. Кить ансяк тензэ а пшкалить... Ваныть мелензэ... Толя цёразо весемеде сюпавсто оршазь. Нейгак лангсонзо од костюм. Сонськак цёрась мазый, сэрей. Кода эно, кеменце класс...

...Урокось прядовома лангсоль. Ды тесэ лиссь се, мезенть кияк эзь учне. Нина Сергеевнань сёрмадомсто вадневсть кедензэ порсо, сон мольсь Толя ваксс ды нардтнинзе костюмозонзо. Тень неезь, ламот таркастосткак стясть. Вейке лекстямосо меревсть:

—     Нина Сергеевна! Те вана да!

Нина Сергеевна кенерсь редямо, кода цивтёргадсть Ванянь сельмензэ, лавтовонзояк видемсть. Те шкане гайгезевсь баягинесь.

Эряви тешкстамс: а тонавтыцясь, а тонавтницятне киненьгак теде эзть ёвтне. Сынсь содасть. Мейле уш, шкань ютазь, лангс лиссь.

Нина Сергеевна зярыя иеть уш пенсиясо. Аваль умок савсь тензэ ардомс троллейбуссо. Снартнесь билет саемс, ансяк ярмаконзо венстизе кондукторонтень, троллейбусонть келес каятотсь вайгель:

—Те монь сехте вечкевикс учительницам!

—Ваня, тон? — содызе Нина Сергеевна икелень тонавтницянзо, ютась икелев.

— Мон зярдояк а стувтса сень, — мизолгадсь троллейбусонь ветицясь.

А вана Толя марта Нина Сергеевна вестъкак эзь вастневе. Улема, сонзэ мельсэяк ашти се питнейдеяк питней урокось...

Татьяна МИХАЙЛОВА