Зяро иест?
Кавксо иензэ Петянь,
Кото иензэ Ванянь,
Ниле топодсть Олянень,
Кавто иеть Колянень.
Эйкакшт, ней ёвтасы кие,
Зяро вейс путозь сынст иест?
Чувтонь лишмесэ
Озась цёркась лишме лангс.
– Ков ардат, Алёша?
– Пангс.
Мейле молян бабанень,
Ардтнян васолпокштянень.
… Ардтнезь, лишменть сизевтизе,
Валгсь ды… столь алов стявтызе.
Бабань мелезэ
Бабань умарензэ ламо.
Сась сеельнесь сынст саламо:
Сеске салмукскензэ лангс
Ниле умарнеть понгавтсь.
Тусь киринекс, кевери.
Бабам тензэ сеери:
– Саламось а вадря пек.
Вешть: мон стяко максан теть.
Котань "ванстыця”
Мерсь Петянень авазо:
– Котат, цёрынем, косот?
– Исяк якинь вирев пангс,
Котан кадынь мукорь лангс.
Пелинь, якамсто калавтсынь,
Тикше потс, пелинь, ёмавтсынь.
Полкан
Тетям кандсь тень кискине
– Сёрмав, пондакш, вишкине.
Сонзэ марто мон кортан:
– Эрьга, онгозевть, Полкан!
Сеске вайгелезэ чачсь:
– Гав, гав, гав! Монь пекем вачсь!
Кудыкелев ливтия,
Сывель ямдо андыя.
Ярсась – кедем нолштызе,
Лапинензэ венстизе.
Коткудавт
Покштянь марто кавонек
Лыман вирьга молинек.
Шказо ульнесь мазый тундо.
Виресь пешксель жольтев увтто.
Ванан мон: апокшке яннэ,
Мольсь эзганзо коткудавне.
Усксь унжине сон, пиштякась,
Кеменьксть сондензэ покш, стака.
Курок лият чийсть сонензэ,
Кармасть прядомо тевензэ:
Саизь канстонть эрязасто
– Тевест тусь седе бойкасто.
Чиить тов– чиить мекев:
– Нать, покштяй, чинь-чоп сынст тевть?
– Сынь, нуцькам, пек важодицят,
Тевень тееме вечкицят.
Нузякс Миша
Стака рана тензэ стямс,
Валске марто чаманть шлямс,
Стака тензэ тонавтнемс,
Лавкав кшинь кисэ молемс.
Стака кияксонть тенсемс,
Стака бабанстэнь молемс.
Мерсь авазо: – Эх, пиштяка,
Нузякснэнь весемесь стака.
| 
