ЭРЗИАНА эрзянский литературный сайт

ПРЯКСЛОПА
Категории раздела
Мои статьи [336]
Стихи [571]
КАВТО ВАЛСО
Статистика
Главная » Статьи » Стихи

Серафима Люлякина. КОКОРКИНЕ
 
КОКОРКИНЕ

Эрясь бабинесь ськамнензэ.

Сакшныльть инжекс нуцькинензэ.

Нейгак вана Од иестэ

Састь нуцьканзо инжекс тензэ.

Бабась кокорка* тенст пансь –

А ёвтавомашка тансть.

Тейсь судыне, сельмть, кургине.

Токик – кевери киринекс.

Вана нуцькинензэ састь,

Кенярдозь кудос совасть.

Ваныть, куз те шкас арась.

Сеске весе нусмакадсть.

Нуцькатне столь экшс эзть оза.

Мери бабанстэнь Серёжа:

«Бабай, вирев минь мольтяно,

Вирятянь кузнэ вештяно.

Кузнэвтеме мень Од ие?

Кокоркадот пишти кие?»

«Вирев мон а нолдатадызь:

Вачо верьгиз тынк сэвтядызь

Эли вирьсэ ёматадо.

Эрь, весе столь экшс озадо».

Кармасть нуцькатне рангомо,

Сельведь марто энялдомо…

Те шканть нардамось штавтовсь,

Кокоркась капшазь ёртовсь,

Панжизе кенкшенть келейстэ

Мерсь: «Кандан тенк кузнэ нейке».

Пачкодсь Кокоркась вирь чирес.

Каштмоли  кузонь покш виресь.

Ва, лиссь вирьстэ Нумолнэ,

Ашо нурька пулыне.

«Тон, Кокорка, ков кеверят?

Ривездеяк, нать, а пелят?»

«Вай, мей сельме, тевс чиян,

Лездый ялгине вешнян…

Тевесь, Нумол, вана мейсэ:

Рангить пакшат пси сельведьсэ.

Од иесь кенкш чирес сась,

Сынст те шкас кузнэст арась.

Алтынь мон сыненст муемс.

Ансяк кода ней улемс?»

«Тень коряс а мезть ризнэмс:

Арсян монсь тонеть лездамс.

Миша лелянень мольтяно,

Кедьстэнзэ кузнэ вештяно.

Адя, озак кутьмерезэнь,

Кундак парстине пилезэнь».

Кокоркась сеске озась,

Вармакс Нумолось ношкстась.

Пачкодсть курок сынь Овтонтень.

Мери Овтось Нумолонтень:

«Таго, оям, инжекс сыть?

Кинь истя лангсот ускить?»

«Миша леляй, лездак тензэ:

Кузнэ эряви сонензэ».

«Вирятянтень сон ардозо,

Мон жо ансяк завхозозо».

Сеске сынь тусть Вирятянтень,

Сехте покш вирень прявтонтень.

«Вана, покштяй, сынек вейсэ

Вешемс кузнэ пси седейсэ».

«Истят инжеть мон вечкан:

Вешицятненень максан.

Од иестэ зыянт тейнить:

Янгить кузтнэнь, синтрить-керить,

Апак кевксте виренть тапить,

Тарадонь кис чувто правтыть.

Тыненк максан налкшке марто:

Тёкшкесэнзэ тештть мик кавто.

Виряванть вана нурдозо,

Тозонь путозь цётмарозо.

Нурдтнэ сынсь кудов усктадызь.

Ойседе, мон ильтятадызь.

Кокорка, озак икелев,

Невть тон янонть эсеть велев.

Тон, Нумол, саик цётмаронть,

Ветяк улавонть стамбаро.

Миша, озак кузнэнть марто,

Вант, тештетнень илить правто».

Ойсесть ялгатне, кенярдыть,

Нурдось лишмевтеме арды.

Ва, Ривезь каршозост понгсь.

Лоткась, пшкадсь ёжовось сонсь:

«Ялгат, ков истя ардтадо?

Саимизь, илямизь кадо.

Арасть оям, ськамон тесэ,

Тошначи сэви монь эйсэ».

Мерсь Овтось: «Эно озак.

Зярдо кадсак обуцят?

Берянь тевть яла тейнят,

Секс ней тон арасть ялгат».

Озась ёжов улавонтень,

Пелевес пачкодсть велентень.

Кудов бабантень совасть –

Од иеськак мартост сась,

Кузнэнть стявтызь налкшке марто:

Киштить нуцькат, Нумол, Овто.

Кузнэнть перька киштсь бабась,

Сонзэ марто – Кокоркась.

Зярдо валске чизэ лиссь,

Инжетнень вирев ильтизь.

Кокорканть мартост саизь,

Ламо ёвксос совавтызь.

Монгак течи пси седейсэ

Ёвтнинь ёвкс Кокорканть эйстэ.


________

*Кокоркине – колобок.


http://media.meta.ua/imgview.php?fid=290668
Категория: Стихи | Добавил: tati (27.05.2010)
Просмотров: 1479 | Комментарии: 1 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[19.01.2010][Стихи]
Александр Арапов. С... (1)
[21.10.2010][Стихи]
Исланкин Юрий Иванов... (0)
[24.01.2010][Мои статьи]
Регина БУДАРИНА. Пут... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2024
    Сделать бесплатный сайт с uCoz