Ёвкссо ёвтневи, мороскак совась
Ледстнить сеедьстэ шержев атятне,
Ёвкссо ёвтнекшнить сыре бабатне.
Пачкодсь ёвксось те масторонь пева,
Мацейкс ливтясь сон ламо таркава.
Кона масторсо ёвксось ушодовсь?
Мезде ёвтамось истя поладовсь?
Мокшэрзянь ёнкссо, умонь масторсо,
Чевте варминекс ливтякшнось тосто.
Эрзянь масторсо, Тунгалей песэ
Умаринакс кассь Олёна тесэ.
Валскень зоринекс пейдиль кургозо,
Виде килейнекс таргавсь рунгозо,
Кумажас токасть-валгсть черьбулонзо,
Менельс сэняждыть валдо сельмензэ.
Сисем келесэ коцтонь палязо,
Таргазь кавксова ашо руцязо.
Прясо пацясонть – лугань цецятне,
Пандянь чахрат прок карксонь цёкотне.
Сисем ленгестэ кодазь карензэ,
Вейксэ рисьмесэ понань карьксэнзэ…
Мазый локсеекс уиль ульцява,
– Куринкань ломанть ваныльть вальмава.
Зорянь кувтёлкстнэ сонзэ кутморясть,
Вирьсэ чувтотне тензэ сюконясть.
Леесь казекшнесь сиянь байгензэ.
Алтыль цёковось гайги моронзо.
Ламо од цёрань палыльть седеест,
Ламот алтакшнызь тензэ вечкемаст.
Эрьвась мельганзо кайсиль сельмензэ,
Эрьванть ульнекшнесь ваномс мелезэ…
Мазычинзэ кис сонзэ вечкилизь,
Паронь теицякс сонзэ ловилизь.
Бути сюлми пулт – теке одирьват,
Вачкиль скирдат сон – теке церьковат.
Тикшень ледемстэ икелев арыль,
Пелюмань кувалмс икельксэнть паниль.
Бути кодыль коцт – неят пачканзо,
Сырнень парсейсэ викшнесь руцянзо.
Мазый чачозо, мазый тевензэ,
Сисем веленень сатыльть превензэ…
Ульцяс бабатне промильть сеедьстэ,
Сундерьгадомас кортыльть эйстэнзэ.
Сыре атятне кенярдозь арсесть:
«Кодат эрзятнень улить тейтерест!»
* * *
Свал пельсвачодо эрзясть эрзятне,
Мартост велувсо рузтнэ, мокшотне.
Нарьгасть ломантнень киска-бояртнэ.
Керясть локшосо душман-мурзатне.
Вирьстэ эзть максне карень кодамс ленгть.
Уштнесть кизяксо: арасельть сынст пенгть.
Ламонь кардазсо арасельть лишметь,
Чаво сусекка азгондсть чеертне.
Пильгалов лепштязь ульнесь ломанесь,
Сэпейде сэпей ульнесь эрямось.
Кода ракшатнень, сынсткак микшнекшнесть,
Борзой киска лангс эйсэст полавтнесть.
Недлянь кото чить бояр лангс важодсть,
Сисемце чистэ эсь умаст пурнасть.
Рошксень сускомо ды поза кече,
– Вай, эрьва чистэ, праздникстэ секе.
Стакадо стакаль весень эрямось,
Керясь весемень нужась-чапамось.
Ведьгев ало прок ульнесть ломантне.
Ламо иеть кирдсть стака нарьгамонть,
Ламо иеть кандсть сэпей эрямонть.
Равонть чирева кузьган ливтякшнось,
Ламо перьканзо алят промокшность.
Кува ютась сон – яжась сюпавтнень,
Пурнась перьканзо нарьгазь ломантнень.
Мода ланга мольсь, Равонть ланга уйсь
– Суранть кувалма эрзятненень кузсь.
Васов марявиль сонзэ лемезэ,
Масторонть пестэ мольсть ломанть тензэ.
Сонзэ лемдензэ боярт тандалесть,
Сонзэ тевдензэ сынь уракалесть.
Вай, те кузьганось Стенька Разин ульсь.
Ведьга-модава минек ёнов мольсь.
Мазы Олёна марясь сондензэ
Ды гайгевтизе гай вайгелензэ:
«Сыргадо весе, эрзя-мокшотне,
Вейсэ мартонок, оянок – рузтнэ!
Весе мольтяно олянь нельгеме,
Бояртнэнь марто, ялгат, тюреме.
Эрзянь масторганть капши каршонок
Олянь явшиця минек оянок.
Стенька Разин те, олянь максыцясь,
Бояртнэнь марто ине тюрицясь.
Минь сонзэ марто вейсэндятано,
Киска-бояртнэнь каршо стятано.
Мода марто сынст човорясынек,
Оляв эрямонть кедьстэст нельгсынек!»
Чадыведекс тусть – сыргасть эрзятне,
Мартост вейсэндясть мокшонь алятне.
Сисем тёжашка велув промокшность,
Равонть ёнов сынь вейсэ сыргакшность,
Сянгсо, цётмарсо тапасть бояртнэнь,
Левшень ождясо повсесть мурзатнень.
Азарсь душмантнэ весе соракадсть,
Кежей мурзатне допрок лажакадсть.
Сестэ арсезевсть киска-бояртнэ,
Пек ризакалесть сестэ сюпавтне:
Кода Олёнань изнямс виензэ,
Кода кундамс бу прявтонть эсензэ?
Снартнесть сырнеде прянзо рамамо,
Яла вешнесть сынь ломань истямо.
Ансяк эзть муевть оймень саиця,
Мазый Олёнань сыненст мииця.
Сестэ сыргавтызь бояртнэ войскаст,
Каршонзо стявтызь ружияст-пушкаст.
Толонь пиземе кармась пултамо,
Кевень цярахмант масторс керямо.
Эрьва ёндо промсть тезэнь кежей ятт,
Весемень кедьсэ цитнить ружият.
Ятонь полктнесэ весе тонавтозь,
Парсте оршазь, парсте анокстазь.
Олёнансетне оршнезь нуласо.
Сянгсо, цётмарсо каршост тюрекшнесть,
Ламо сядо ятт сянго лангс кепсесть,
Ды в изняви пушкась мокшнасо.
Изнизь Олёнань паро алятнень,
Повсизь палманга полонс саезтнень.
Мейле Олёнань кундызь-сюлмодизь,
Кежей кискатне прявтонтень ускизь.
Сынь кундызь-ветизь ашо ошонтень,
Ашо кудонтень, Ибряй царентень.
Совасть слуганзо, пульзясть комадо,
Зярдо стявтынзе – кармасть кортамо:
«Ине ведунонть вана кундынек,
Вана икелеть сонзэ минь ветинек.
Нулав кренчензэ допрок чавинек,
Кадовикстнэнь минь полонс саинек».
Ибряй кежейстэ сонзэ лангс варштась,
Гуень варштавксось аванть пачк ютась.
Чикоргавтынзе тюжа пеензэ,
Кевкстнесь, ков сатотсть ношка превензэ:
«Костонь тон улят? Кодамо велесь?
Войскасот зяро солдатот ульнесть?
Ки кучинзеть тон мартон тюреме?
Тыщат кепедить, нолгов цёрыне…»
Валгак эзь ёвта Олёна тензэ,
Эзинзе коня валдо сельмензэ.
Ятонть сювордавсть стака мокшнанзо,
Гуекс вешкезевсь Мурзань локшозо.
Локшось правтызе аванть шапканзо,
Шапканть алдо прасть кавто пулонзо,
Полгарькавтынзе Ибряй сельмензэ,
Мерят, кундатотсь сонзэ келезэ:
Ятось чаракадсь, – велить превензэ.
Цюдавсь куломакс авась сонензэ.
Овтокс рокатемсь кежень пандомо,
Олянь вешницянь прявтонть маштомо:
«Пичень кудо, – мерсь, – нейке чаподо,
Коське поень пенгть тозонь вачкадо…»
* * *
Эрзянь Олёнань ветясть ульцява:
Прязо кепедезь, прок азорава.
Весе народонть панизь ваномо,
Несызь куломанть – кармить сорномо.
Се шканть васолга Разин ливтякшнось,
Вейсэндямодо сонгак арсекшнесь.
Неть мельтнень марто тов Олёна сась,
Косо учокшнось сонзэ куломась.
Мерсь ломантненень: «Нардынк сельведенк.
Виев тюреманть минь ушодынек.
Течи изнимизь – одов стятано,
Оляс лисстяно, минь изнятано.
Ятонть каршо тынь вейс пурнаводо,
Тумонь тусто вирькс стядо каршонзо,
Рунгом пултасызь – тевем кадови,
Оляс бажамось тенст а пултави».
Вай, тол нолштызе мазый чаманзо,
Кирвазсть Олёнань лангсо палянзо.
Вай, пидси-пулты виде рунгонзо
– Пексты-потомды маконь кургонзо.
Пултызь рунгонзо – саизь оймензэ,
Тусь акуломас сонзэ лемезэ.
Минек масторс сон, минек пингес сась:
Ёвкссо ёвтневи, мороскак совась.
Ягодной веле, 1939 – 1940 иеть.
| 
