ТОНЕТЬ, АВА

Цитниця сельме, лембе седей,

Тонь мельга свал ливти мелем!

Тонеть панжия васенцеде

Васень вечкемасо оймем.

И паро седей, и пиштема

А весть савкшнось варчамс тонеть.

Авань, сазоронь покш вечкемась

Монень невтизе ванькс ойметь.

Зярдо войнась пурьгине пельсэ

Минек эйстэ копачась чинть, —

Солдатонь казямо шинельсэ

Онкстнить монь марто стака кинть.

Пултазь велесэ, янгазь ошсо

Савкшнось верь потсо прамс монень.

Тон эсеть лембе ойме коштсот

Эждить какарьгадозь кедень.

Ильтить ранязенть медсанбатов,

Якить мельган, андыть, симдить.

Зяро истя ойметь солдатонь

Тон эсь вечкемасот идить!..

Тон медсестракс ашо халатсо

Ютавтыть апак удо веть,

Ды партизанонь покш отрядсо

Савкшнось а весть тюремс тонеть.

Тон оянь пилес горниповокс

Чоледить вечкиця сазоркс,

Ды, кода Зоя, эсь вановтсот

Врагтнень седейс совавтыть соркс.

Тонь свал ульнесь седей потмакссот

Боецтнэнь туртов лембе вал,

Паряк, секскак рейхстагонть вакссо

Изнямонть чизэ истя палсь.