ЭРЗИАНА эрзянский литературный сайт

ПРЯКСЛОПА
Категории раздела
Мои статьи [336]
Стихи [571]
КАВТО ВАЛСО
Статистика
Главная » Статьи » Стихи

МАСТОРАВА.Кевейкееце ёвтамо. КИЛЯВА. Смерть Килявы.
МАСТОРАВА.Кевейкееце ёвтамо. КИЛЯВА.
Смерть Килявы.


Ваны Килява пелезь перть пельга.

Ваны икелев, ваны удалов,

Ваны ве енов, ваны омбоцев,

Несы — удомсто сыргойсь се мурзась,

Кона полонов сонзэ саизе.

Панжинзе ятось бутрав сельмензэ,

Кискань варштавкссо варштась — абунгадсь.

Седеезэ мик лоткась токномсто:

Ушмось пельс маштозь, верьсэ лепии.

  Чавносамизь! — сон кармась пижнеме.—
Те од тейтересь весень маштсамизь!

Эрьга пильге лангс, печказт, стякшнодо,

Сельменк тетькеде, эсь прянк идеде!

Сыргозсть печказтнэ, явась удомаст,

Азаргадозь пшти торозост кунцесть.

  Илинк машто те ине тейтеренть,
Эряви кундамс ханонь чавицянть! —
Мурзась ранкстась тенст сорнозь вайгельсэ.—
Мезть минь тейтяно мартонзо? Евтан:
Кедензэ лавтовга керясынек

Ды идем паксяв тестэ кучсынек

Эсь куломасо тосо куломо,

Эсь емамосо тосо емамо.

Куродызь ниле ендо Килявань,

Пиризь пеляза верьгизэнь пизэкс.

Эрьва ят эци сонзэ кундамо,

Бажи набойстэ прянзо невтеме.

Килява — мерят сонсь Масторавась,

Кона идеме стясь масторонзо,

Ханонь торосо душмантнэнь кери,

Прок тикше леди пшти пелюмасо.

Тевензэ теи яла вадрясто,

Кеж панды нарьгазь эрзятнень кисэ.

Чарькодсь од мурзась: а саты виест

Кундамс Килявань, пикссэ тапарямс.

Сынст ютксо арась истямо ломань,

Кона сондензэ виев улевель.

Ва весе ушмонть тейтересь маштсы,

Весе печказтнэнь сон керсесынзе.

Савсь сонзэ каршо эстензэ лисемс.

Азаргадсь, кежей валсо тандавтни:

    Керсетян пельксэнь-пелькс, эрзянь тейтерь!
Верьгизнэнь максса мазый од рунгот,
Торонь неренть пес седееть сялгса,
Кепедьса ашо прят сялгомасон.

    А саемс теть, ят, монь прям ды рунгом!
А тонеть алтазь сынь, паксянь ломань!

    Эрьга малазон мольть! — ранкстась мурзась.—
Алкуксонь церань виенть невтьса теть!

Килява торонзо кепедизе,

Яходсь — прянь шныцянть кавтов керизе.

Зярдо тень неизь лия душмантнэ,

Истя тандадсть — тарькс мик сынст саизе.

  Ематано минь, печказт, вейкень пес,
Чавносамизь те эрзявась минек,—

Рангить сынь, пижнить, авардить-лайшить,—

Коданя прянок ней идесынек?

Кода куломанть кедьстэ ментяно?

  Эрьга налчирькеть весе саеде,
Налсо тейтеренть ланга леднеде.
Кепететсть налонь пельть, прок мекшень вийть.
Ды вешкезь ливтясть Килявань енов,
Кармасть кежейстэ сонзэ пупамо.

Ансяк нейгак ине эрзявась

Кеместэ ашти пильгензэ лангсо.

Таргасынзе сон налтнэнь рунгстонзо

Ды мекев ятнэнь пелев ертсынзе.

Ней эсест налтост эйстэ сынь кулыть.

Секс седеяк пек ушодсть талномо.

  Весе тесэ минь, нать, ематано,
Весе мадтяно идем паксянтень.
Те од тейтересь — эрзянь Пазава.

Сон валгсь менельстэ кежень пандомо.

Эрзятнень кисэ сон чавносамизь,

Чумонок кисэ сон маштнесамизь.

  Вай, идеде прянк, печказт, идеде!
Оргодеде тынь, татарт, чиеде!

Кайсйзь печказтнэ торост — оргодить,

Ков сельмест ваныть — превтеме чиить.

Варштась Килява перть пельга — чувтомсь:

Паксясь тунь пештязь душманонь верьсэ,

Менель енксонть видьс уловсо ацазь.

Сюро ней лотки тесэ чачомсто,

А кармить цецят тунда панжомо.

Ансяк гуйпалакст сайсызь те моданть,

Чемень тюс валсы сонзэ пестэ пес.

Килява торонть кавтов синдизе

Ды кулозь ханонть малас путызе.

  Тонь урьвакстомась, ине хан, налксевсь,
Кумызэсь симевсь, сывелесь сэвевсь...
Паро верьгизэнь уцяска вешнить,

Берянь ломанень кулома муить! —

Аразь ханонтень мерсь сон ды сыргась

Чинть мельга Эрзянь чачи мастеров.

Куваня моли, тува пупорькшни,

Кува эскели, тува сяворькшни.

Васоло эрзянь раськенть енксозо —

Сисем кувака паксянь товоло,

Колмо чопода вирень томбале.

 

Колмо чить, колмо чокшнеть Килява

Мольсь Пензай велев, чачома кудов.

Кува мольсь, тува чудесь верезэ.

Кадызе сонзэ ине виезэ.

Сувакадсть чиде валдо сельмензэ,

Прязо чаракадсь, кармась велямо.

Сяворсь сон Сура леенть чиресэ,

Тундонь цецинекс новольсь моданть лангс.

Истяк эзь пачкодть Пензай велентень.

Омбо чинь валске, ашолгадомсто,

Кулозь Килявань муизь эрзятне.

Весе веленек лайшизь сынь сонзэ,

Кармасть кортамо Пензань эрзятне:

Покш рискссэ урнизь ды модас калмизь.

Смерть Килявы. Перевод с эрзянского Вирявы (Т.Ротанова)
Категория: Стихи | Добавил: tati (19.12.2010)
Просмотров: 1124 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[19.01.2010][Стихи]
Александр Арапов. С... (1)
[21.10.2010][Стихи]
Исланкин Юрий Иванов... (0)
[24.01.2010][Мои статьи]
Регина БУДАРИНА. Пут... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2024
    Сделать бесплатный сайт с uCoz