Талай сёксь

Меельце лопат правты ожоковось,

Кайсевтезь чувттнэ виздить штапочидест,

Учить, зярдо оршасынзе сынст ловось,

 Ды одс кармить арсеме кизэнь псиденть.

Истямо шкане кецнемс тунь а мезнень:

Потмура ушо, рудаз, кивень менель;

Сэредить весе ловажат ды эзнеть.

Кода ойментень тардемадо менемс?

Лиссть, оям, вирев, лиссть, дугинем, паксяв!

Иля аште кудосо, диванс педязь!

 Бути чистэ тон сиземазот яксят,

Кравтсыть орматнень: рунгот илизь недя!

Масторавась кази теть паро ёжо,

Ризксэть нардасы, мельсапарот шлясы.

Кадык лопатнеяк уш аволь ожот, -

Эрямонь виеть ялатеке касы!

2006