***

Сравтсынь черем, сёксень лопань тюссот,

Сельмечирькем раужосо вадьсынь,

Якстерьгавтсынь турвам – чевгель пусмот.

Мельсапаром кенкш удалов кадсынь.

Сехте мазый покаем оршаса

Ды ютан икельгат – чинязава.

Мон варштавкссо седееть оймавтса.

Ванта, зяро мель тонеть мон яван!

Кельме валсо, ведьсэ прок, а валтан,

Кутмордатан, майсемат а кандан.

Оймень лембем течи тонеть алтан –

Кие соды, мезе ули ванды?!

Вейке чокшнэс, кадык вейке чокшнэс

Мон мелявксот панжомас пекстасынь

Ды, ойместэм чевте валонь кочксезь,

Тонь седееть ризкстнэде ванстаса!..