НУРЬКА  МОРЫНЕТЬ

Минь од ломанть - тонавтницят,

Вандынь чив бажатано.

Тыненк, ялгат-кунсолыцят,

Морынеть моратано.

Минь нузякстнэнь, прянь шныцятнень

Пшти валсо ледстясынек.

Сынст наксадо обуцятнень

Чивалдос ливтнесынек.

Мезень лашт куринкань келес

Сэтьменть пестэ пес нарды?

Те минек Вирясов Коля

Кудов «кавтосо» арды!

Витя - кол, сон тунь а сорны:

«Эк, тандавтымизь - диктант!»

Ильведевкстнэ пейдить - корныть,

Шешкить тетраденть, прок танкт.

Света якси, теке пава,

Пилесэнзэ - сырнень повт.

Мекс журналсо теке шкава

Панжовсть «кавтот» -горниповт?

Кенжтне артозь, чертне пондакшт –

Те Лариса - мазычи.

Сон васень уроксто саезь

Меельценть нувсезь учи.

Петра - сэрей, келей лавтов,

Эрьва мокшнась - пондонь кев.

Моли - коштонть яви кавтов,

Тонавтнемстэ - тумо прев.

Эдик - цёрась «пек культурной»,

Нулгоди меремс авай.

Сон монголонь ханонть лемсэ

Аванстэнь мери: Мамай.

Минь морынек, минь пейдинек

Тунь аволь згилямонь кис.

Апаронтъ эйсэ айгинек

Паронть изнявксонзо кис!