***

Кеман мон Пазнэнь. Ансяк аволь сенень,

Кона конёвсто  сурсонзо тандавтни.

Кеман мон Пазнэнь. Ансяк аволь сенень,

Конанень озномс сэрей кудот стявтнить.

А сенень, киде баягасо чавить,

Кинь «веренть»озныцятне умок корштнить.

Ознома валтнэ мелем монь а явить.

А вечкан,  зярдо раужосо оршнить.

Монь Пазом эрзянь. Сюк сеть покштятненень,

Конат Чипазонть кистюремат стявтнесть,

Ютавтнесть озкст – пурнавкшность репештятнес,

Ды теньсэ, содазь, рузонь кежтнень савтнесть.

Монь туртов Пазось - аволь тандавтниця.

Сон превей  ялга ды свал мартом яки,

Сон аволь Азор, а кежень пандыця;

Мон аволь уре,мон сонензэ – тяка.

Сон пачк монь потсо, кецян эли ризнан.

Сон три монь оймем, касты седей вием.

Неи, кода эсь асатыкстнэнь изнян,

Салавань толсо кода палан-пиян.

Монь Пазонь кудом – тон, Эрзянь Мастором!

Ознан паксясо, вирьсэ,чейбулосо.

Монь озксом – седейбенчстэ прыця морот,

Конатнень кочкан эрьва киулосо!

…Кеман мон Пазнэнь. Ансяк аволь сенень,

Кона конёвсто сурсонзо тандавтни…

1989