***

                                            Саша братонтень

Вирев, лисьмапряв Ицял ёнксось,

Зярдо, эрси, тозонь саван,

Мон прок эрзянь кезэрень ёвксос

Сэрей пичензэ юткс сован.

Тосонь лисьмапря лангс аватне

Зорява ведь мельга яксить.

Лавтовост трокс каязь курсятне

Сярдонь сюрот теке лыкить.

Зорянть амольдясызь ведратнес,

Крута янга кудов кандсызь,

Весе  сыцятнень-ютыцятнень

Яксярго кечестэ симдсызь.

Нать,  секс тосонь таркань ломантнень

Сельмест прок лисьмапрят невтить.

Нать, секс тосонь тейтерь-аватнень

Чамаст валскень зорякс цветить.