***

                                 Иван Шумилкиннэнь

Вай, тон, кудряв аля, виде сэрь укшторо,

Тон монень и ойме, тон монень и моро.

Кадытинь вишкинекс, ней кода кепетить,

Секень вант, истяня тештес  токить кедеть.

Парыне ялгинем, седей шкастонь оям,

Монькс, нать, тусь обуцят, монькс панжовсь

тонь коеть.

Кадык прянок велькссэ даволтнэ ютакшность.

Моронок эзть салсевть,

лопанок эзть пракшно.

Зярдояк нусманякс мартот а ультяно,

Эрьга вана рядсек вейсэ аратано.

Эрьга сырнень струнакс тарадот аравтыть,

Кадык лангаст сурсост варматне ютавтыть.

Чачома велентень кастоманок кисэ

Седей паронь арсезь моронок гайгезэ.

Ды сонзэ кунсолозь и тонеть, и монень,

Кадык паро ломанть ютамсто сюконить.