ВЕЛЕНЬ ВАЛСКЕ

Валскесь лекси важов кизэсэ.

Тикшесь пургсезь сиянь росасо.

Грацьлевкст пижнить эсест пизэсэ,

Конат сэрей килейтнень прясо.
 

Ломантне ракшат панить. Вейсэ

Молезь, ракшатне байгтнень правтыть.

Зорянь мизолкст сырнень манейсэ

Кудо вальмань суликат артыть.
 

Ванстови экше сэтьмечисэнть

Летьке цецятнень каштмолемаст.

Менельганть таргазь Каргонь Кистэнть

А прыть баягатнень гайнемаст.
 

Истямо шкане, ононь неезь,

Видькстан: вечкилинь мон удомо.

Лембе лексемасо Морфеесь

Яла яксилизе кудонок.
 

Тонь вакссояк истямо шкасто,

Полам, Морфеесь яла эриль.

Конязь сельместэть, прок цецясто,

Валдо сельведь цитнезь кевериль.